Ngaa Ginatugutan sang Dios nga Piguson sang mga Mabakod ang mga Maluya?

May pila ka rekord sa Biblia sang makapasubo nga pagpamigos sang mga mabakod sa maluya. Ang isa ka halimbawa amo ang kay Nabot.a Gintugutan ni Ahab, nga hari sang Israel sang ikapulo nga siglo B.C.E., ang iya asawa nga si Jezebel nga ipapatay si Nabot kag ang mga bata nga lalaki sini para maangkon sang hari ang iya ulubasan. (1 Hari 21:1-16; 2 Hari 9:26) Ngaa gintugutan sang Dios ina nga pag-abuso sang gahom?

Talupangdon naton ang isa ka importante nga rason: Ang Dios indi makabutig. (Tito 1:2) Ano ang labot sini sa pagpamigos? Sa ginsuguran, ginpaandaman na sang Dios ang katawhan nga ang pagrebelde sa iya may malain gid nga resulta, ang kamatayon. Subong sang ginsiling sang Dios ang kamatayon nangin bahin na sang kabuhi sang mga tawo halin sang pagrebelde sa hardin sang Eden. Matuod gid ini kay ang una nga tawo nga napatay resulta sang pagpigos, sang ginpatay ni Cain ang iya utod nga si Abel.—Genesis 2:16, 17; 4:8.

Ginsumaryo sang Biblia ang kasaysayan sang tawo halin sadto: “Ang isa ka tawo may gahum sa isa sa iya kasamaran.” (Manugwali 8:9) Matuod gid bala ini? Ginpaandaman ni Jehova ang iya katawhan, ang pungsod sang Israel, nga mangin mapiguson ang ila mga hari amo nga mangayo sila sing bulig sa Dios. (1 Samuel 8:11-18) Bisan gani ang maalam nga si Hari Solomon nanukot sing tuman kadaku nga buhis sa iya katawhan. (1 Hari 11:43; 12:3, 4) Ang malaut nga mga hari pareho kay Ahab labi pa gid ka mapiguson. Hunahunaa ini: Kon ginpunggan sang Dios ini nga pagpamigos, indi bala nga mangin kabutigan ang iya ginsiling?

Dumduma man nga nangangkon si Satanas nga nagaalagad lang ang mga tawo sa Dios bangod makabenepisyo sila. (Job 1:9,10; 2:4) Kon ginproteksionan sang Dios ang tanan niya nga alagad, indi bala nga ginapakita lamang sini nga matuod ang panumbungon ni Satanas? Kag kon ginpunggan sang Dios ang tanan nga porma sang pagpamigos, indi bala nga sia ang mangin balasulon sang mas daku pa nga kabutigan? Kon proteksionan kita sang Dios, madamo ang mahimo maghunahuna nga mangin madinalag-on ang paggahom sang tawo nga wala sia. Pero kabaliskaran gid ang ginasiling sang Pulong sang Dios, nga ang tawo indi makagahom sang iya kaugalingon. (Jeremias 10:23) Kinahanglan naton ang Ginharian sang Dios agod matapos ang inhustisya.

Buot bala silingon sini nga wala sing ginahimo ang Dios sa pagpamigos? Indi. Binagbinaga ang duha ka butang nga iya ginahimo: Una, ginapakita niya kon ano gid ang pagpamigos. Halimbawa, ginbuyagyag sang iya Pulong ang tanan nga plano ni Jezebel kay Nabot. Ginpahayag sang Biblia sang ulihi nga ini nga kalautan padihot sang isa ka gamhanan nga gumalahom nga luyag magtago sang iya identidad. (Juan 14:30; 2 Corinto 11:14) Ginapakilala sia sang Biblia nga si Satanas nga Yawa. Paagi sa pagbuyagyag sang kalautan kag pagpamigos kag ang kabangdanan sini, ginabuligan kita sang Dios nga malikawan ang kalautan. Ginaamligan niya ang aton wala katapusan nga palaabuton.

Ikaduha, naghatag ang Dios sing masaligan nga paglaum nga tapuson ang pagpamigos. Ang iya pagbuyagyag, paghukom, kag pagsilot kanday Ahab kag Jezebel, kag sa mga pareho sa ila, nagapasalig sa aton nga silutan ang mga malauton. (Salmo 52:1-5) Naghatag man ang Dios sing masaligan nga paglaum nga sa indi madugay dulaon niya ang tanan nga malain nga epekto sang kalautan sa iya mga hinigugma.b Maeksperiensiahan man sang matutom nga si Nabot kag sang iya bata nga mga lalaki nga magkabuhi sa paraiso nga duta nga wala sing inhustisya.—Salmo 37:34.