Makalilibog nga Pamangkot

MADAMO kag lainlain ang pagpati parte sa kabuhi kag kamatayon. Ang pila nagapati nga kon ang isa mapatay, buhi gihapon sia, ayhan sa lain nga porma ukon sa lain nga lugar. Ang iban nagapati nga mabun-ag sila liwat. Pero may nagapati naman nga ang kamatayon amo ang katapusan sang tanan.

Mahimo nga may kaugalingon ka nga pagpati sa sini nga topiko, depende sa gintudlo sa imo ukon sa ginhalinan mo nga lugar. Bangod madamo kag lainlain ang pagpati parte sa nagakatabo sa kamatayon, may makasugid bala sa aton sing masaligan kag husto nga mga sabat sa sining makalilibog nga pamangkot?

Sa sulod sang ginatos ka tuig, gintudlo sang mga lider sang relihion nga imortal ang kalag sang tawo. Ang mga miembro sang halos tanan nga dalagku nga relihion—mga Cristiano, Hindu, Judiyo, Muslim, kag iban pa—nagapati nga imortal ang kalag, nga padayon kuno ini nga nagakabuhi kon mapatay ang lawas sang tawo kag yara ini sa lugar sang mga espiritu. Ang mga Budhista naman nagapati nga paagi sa madamo nga pagkabun-ag liwat, makalab-ot ang isa sa kahimtangan nga indi na makaeksperiensia sing kabudlayan. Ining pinakamalipayon nga kahimtangan ginatawag nila nga Nirvana.

Parte sa sini nga mga panudlo, ang kalabanan nga tawo sa bilog nga kalibutan nagapati nga kon ang isa mapatay, padayon sia nga magakabuhi sa iban nga kalibutan. Gani para sa madamo, ang kamatayon importante nga bahin sang siklo sang kabuhi kag kabubut-on kuno ini sang Dios. Pero ano ang ginasiling sang Biblia parte sa sini? Palihug basaha ang masunod nga artikulo. Mahimo nga ang sabat lain sa ginapatihan mo.