“Ang Tawo nga Maalwan Pakamaayuhon”

HALIN pa sang una, importante na nga bahin sang matuod nga pagsimba ang paghalad. Naghalad sang mga sapat ang mga Israelinhon, kag kilala gid ang mga Cristiano sa ila “halad sang pagdayaw.” Pero may iban pa nga mga halad nga nahamuot gid ang Dios. (Heb. 13:15, 16) Nagaresulta ini nga mga halad sa kalipay kag mga pagpakamaayo, nga makita naton sa masunod nga mga halimbawa.

Ang matutom nga alagad sang Dios sang una nga si Hana gusto gid makabata, pero baw-as sia. Nangamuyo sia kag nagpanaad kay Jehova nga kon makabata sia sing lalaki, ‘ihatag niya sia kay Jehova sa bug-os niya nga kabuhi.’ (1 Sam. 1:10, 11) Sang ulihi, nagbusong si Hana, kag ginbun-ag niya ang iya bata nga si Samuel. Sang nalutas na si Samuel, gindala sia ni Hana sa tabernakulo para tumanon ang iya ginpanaad. Ginpakamaayo ni Jehova si Hana bangod sang iya pagsakripisyo. Nakabata sia sing lima pa ka kabataan, kag si Samuel nangin manalagna kag manunulat sang Biblia.—1 Sam. 2:21.

Pareho kanday Hana kag Samuel, pribilehiyo man sang mga Cristiano subong ang pagdedikar sang ila kabuhi sa pag-alagad sa ila Manunuga. Nagpromisa si Jesus nga padyaan gid kita bangod sang aton ginasakripisyo sa pagsimba kay Jehova.—Mar. 10:28-30.

Sang unang siglo, nakilala ang Cristiano nga si Dorcas bangod “madamo sia sing maayo nga binuhatan kag mabinuligon sia sa mga imol.” Amo ini ang iya mga halad para buligan ang iban. Pero “nagmasakit sia kag napatay,” nga nagpasubo gid sa kongregasyon. Sang mabal-an sang mga disipulo nga ara lang si Pedro sa malapit nga lugar, ginpangabay nila sia nga magkadto gilayon sa ila. Handurawa ang ila kalipay sang nag-abot si Pedro kag ginbanhaw si Dorcas! Sia ang una nga ginbanhaw sang isa ka apostol. (Binu. 9:36-41) Wala nalipatan sang Dios ang mga halad ni Dorcas. (Heb. 6:10) Ginsulat sa Pulong sang Dios ang kasaysayan parte sa iya kaalwan para sundon naton ang iya maayo nga halimbawa.

Maayo man nga halimbawa si apostol Pablo kay maalwan sia sa paghatag sing tion kag atension sa iban. Ginsulatan niya ang iya Cristiano nga mga kauturan sa Corinto: “Sa akon bahin malipay gid ako nga ihatag ang tanan kag gamiton ako sing bug-os para sa inyo kalag.” (2 Cor. 12:15) Naeksperiensiahan gid ni Pablo nga ang pagsakripisyo para sa iban wala lang nagpahalipay sa iya, kundi bangod sini, ginpakamaayo sia kag ginkahamut-an ni Jehova, kag amo ini ang mas importante.—Binu. 20:24, 35.

Gani nalipay gid si Jehova kon gamiton naton ang aton tion kag kusog para sa Ginharian kag sa pagbulig sa aton mga kauturan. Pero may iban pa bala nga paagi para masuportahan naton ang pagbantala sang Ginharian? Huo! Magluwas sa aton tion kag kusog, mapadunggan naton ang Dios paagi sa aton kinabubut-on nga mga amot. Ginagamit ini para pasangkaron ang pagbantala sa bilog nga kalibutan, lakip sa sini ang pagsuportar sa mga misyonero kag sa iban pa nga yara sa pinasahi nga bug-os tion nga pag-alagad. Ginagamit man ini sa paghanda kag pag-translate sa mga publikasyon kag mga video, sa pagbulig sa mga nahalitan sang kalamidad, kag sa pagpatindog sang bag-o nga mga Kingdom Hall. Makasalig kita nga “ang tawo nga maalwan pakamaayuhon.” Isa pa, ginapadunggan naton si Jehova kon ginahatag naton sa iya ang aton hamili nga mga butang.—Hulu. 3:9; 22:9.

Mga Paagi sa Paghatag nga Ginpili sang Iban Para sa Bug-os Kalibutan nga Hilikuton

Pareho sang tion ni apostol Pablo, madamo karon ang ‘nagapain’ sang kuarta kag ginahulog ini sa mga kahon alamutan sang kongregasyon nga nasulatan sing “Worldwide Work.” (1 Cor. 16:2) Kada bulan, ginapadala ini sang mga kongregasyon sa opisina sang mga Saksi ni Jehova nga nagatatap sa ila teritoryo. Mahimo ka man direkta nga makapadala sing donasyon sa legal nga korporasyon nga ginagamit sang mga Saksi ni Jehova sa pungsod nga imo ginaistaran. Para mahibaluan ang ngalan sang panguna nga legal nga korporasyon nga ginagamit sang mga Saksi ni Jehova sa pungsod nga imo ginaistaran, palihug kontaka ang sanga talatapan sa adres nga makita sa www.jw.org. Depende sa ginatugutan sa inyo lugar, ang mga donasyon nga mahimo mo ipadala sing direkta amo ang masunod:

DONASYON NGA WALA KONDISYON

Mga donasyon paagi sa electronic bank transfer, debit card, ukon credit card. Sa pila ka sanga talatapan, puede mo man ini mahimo paagi sa jw.org ukon iban pa nga ginagamit nga website.
Mga donasyon nga kuarta, alahas, ukon iban pa nga malahalon nga pagkabutang. Maglakip sang sulat nga nagasiling nga ang kuarta ukon pagkabutang gindonar mo nga wala kondisyon.

DONASYON NGA MAY KONDISYON

Gindonar nga kuarta nga may kondisyon nga puede ibalik kon kinahanglan sang nagdonar.
Maglakip sang sulat nga nagasiling nga ang donasyon may kondisyon.

CHARITABLE PLANNING

Magluwas sa direkta nga mga regalo nga kuarta kag malahalon nga pagkabutang, may iban pa nga paagi sang paghatag nga makabulig sa bug-os kalibutan nga hilikuton sang Ginharian. Nalista ini sa masunod nga mga parapo. Ano man nga pamaagi sa pagdonar ang imo gusto, kontaka anay ang sanga talatapan nga nagatatap sa inyo teritoryo para mahibaluan kon ano nga pamaagi ang puede gamiton. Bangod lainlain ang legal nga mga pagsulundan kag kasuguan sa buhis, dapat magkonsulta anay sa kalipikado nga mga eksperto sa buhis kag kasuguan antes magpili sang pinakamaayo nga paagi sa pagdonar.

Insurance kag Retirement Plan: Puede himuon ang korporasyon nga ginagamit sang mga Saksi ni Jehova nga benepisyaryo sang isa ka life insurance policy, sang indibiduwal nga deposito sa pagretiro, ukon sang isa ka retirement/pension plan.

Deposito sa Bangko: Mga deposito sa bangko nga ihatag sa korporasyon nga ginagamit sang mga Saksi ni Jehova kon mapatay na ang nagdeposito, suno sa mga ginapatuman sang bangko sa inyo lugar.

Stock kag Bond: Mga stock kag bond nga ginadonar sa korporasyon nga ginagamit sang mga Saksi ni Jehova bilang regalo nga wala kondisyon ukon paagi sa nasulat nga kasugtanan nga ihatag ini sang nagdonar kon mapatay na sia.

Real Estate: Ang puede ibaligya nga real estate (balay, bilding, ukon lote) mahimo idonar sa korporasyon nga ginagamit sang mga Saksi ni Jehova bilang regalo nga wala kondisyon ukon mahimo ini ihatag sang nagdonar kon mapatay na sia. Halimbawa, kon balay ang idonar, mahimo niya ini maistaran tubtob buhi sia.

Testamento kag Trust: Mahimo ipapanubli sa korporasyon nga ginagamit sang mga Saksi ni Jehova ang pagkabutang ukon kuarta paagi sa isa ka legal nga testamento ukon himuon ang korporasyon nga benepisyaryo sang isa ka trust agreement. Mahimo ini magbuhin sa balayran nga buhis.

Subong ginapahangop sang termino nga “charitable planning,” ini nga sahi sang mga donasyon kinahanglan planuhon sang nagdonar. Para sa mga luyag maghatag sing pinansial nga bulig sa bug-os kalibutan nga hilikuton sang mga Saksi ni Jehova paagi sa pila ka porma sang pagdonar, ginhimo ang brosyur nga Charitable Planning to Benefit Kingdom Service Worldwide sa Ingles kag Espanyol. Ini nga brosyur nagahatag sing impormasyon parte sa lainlain nga paagi sang pagdonar subong ukon sa ulihi, pareho sang pagpanubli kon mapatay ang nagdonar. Mahimo nga may mga impormasyon sa sini nga brosyur nga indi maaplikar sa imo sitwasyon bangod sang kasuguan sa buhis ukon iban pa nga kasuguan sa pungsod nga imo ginaistaran. Paagi sini nga mga pagdonar, madamo ang nakasakdag sa aton mga hilikuton sa bug-os nga kalibutan, kag nabuhinan man ang ila ginabayaran nga buhis. Kon may ara sini nga brosyur sa pungsod nga imo ginaistaran, mahimo ka makapangayo sa sekretaryo sang inyo kongregasyon.

Para sa dugang nga impormasyon, kadtui ang jw.org/hil kag i-klik ang “Maghatag sing Donasyon sa Amon Bug-os Kalibutan nga Hilikuton” sa idalom nga bahin, ukon kontaka ang sanga talatapan.