Maauxiliary Payunir Ka Bala sa Nobiembre ukon sa Disiembre?
1 Ginpalig-on ni Jesus ang iya mga sumulunod nga itanyag ang ila kaugalingon sa ministeryo, kag ginpasalig niya sila nga ang paghimo sini makadala sa ila sing kalipay kag madamong espirituwal nga pagpakamaayo. (Mat. 10:8b; Binu. 20:35) Sang nagligad nga Nobiembre 2,307 ka indibiduwal sa Pilipinas ang nakatigayon sang mga pagpakamaayo sang mauswagon nga hilikuton subong mga auxiliary payunir, samtang sang nagligad nga Disiembre 4,307 ang nakigbahin sa sini nga hilikuton. Mahimo ka bala makapalista subong auxiliary payunir sa Nobiembre ukon ayhan sa Disiembre ukon ayhan sa sining duha ka bulan?—Sal. 34:8.
2 Masami nga maayo ang panahon sa sulod sining mga binulan pagkatapos sang tig-ululan kag ilabi na sa Disiembre bangod may mga pista opisyal sa mga eskwelahan nga mahimo magpahapos sa pag-auxiliary payunir. Walay sapayan nga ang distrito nga mga kombension pagahiwaton sa ulihi nga bahin sang Disiembre, may yara gihapon tatlo ka semana sang bulan nga magamit sa pag-auxiliary payunir.
3 Ngaa indi maghimo sing positibo nga mga plano karon sa pag-auxiliary payunir sa Nobiembre kag Disiembre? Agod magmadinalag-on, kinahanglan ang mahalungon nga pagplano. Makighambal sa iban nga nakapayunir bisan may sekular sila nga mga trabaho kag mga responsabilidad sa pamilya. Makabenepisyo ka gikan sa ila mga eksperiensia. Subong man, magpalapit kay Jehova sa pangamuyo, nagapangayo sang iya bulig.—Isa. 40:29-31; Sant. 1:5.
4 Kon posible para sa pila ka mga gulang kag ministeryal nga mga alagad ang mag-auxiliary payunir, isa ka pagpalig-on ini sa iban kon lawagon ang pagtangdo sa ila antes sang hingapusan sang Oktubre. Sa masami mapalig-on ang mga kauturan sa pagpalista kon mahibaluan nila nga may mga kauturan nga lalaki nga nagapanguna kag sa amo indi sila magaisahanon sa ila pagpanghikot subong payunir.
5 Wala sing duhaduha sa sini, mangin malipayon gid yadtong nagaplano nga makaalagad subong mga auxiliary payunir. Matigayon mo bala ini nga pribilehiyo sa Nobiembre kag Disiembre? Kon manikasog ka nga pasangkaron ang imo pribilehiyo sa pagpaambit sang maayong balita sa iban, pat-od nga igabubo sa imo ni Jehova ang bugana nga pagpakamaayo.—Mal. 3:10.