Himuon Bala Naton Ini Liwat?—Isa Pa ka Panawagan Para sa mga Auxiliary Payunir
1 Himuon naton liwat ang ano? Magaauxiliary payunir bala kita sa tion sang Memoryal? Ang suplemento sang Pebrero 1997 nga Ang Aton Ministeryo sa Ginharian nagganyat sang aton igtalupangod paagi sa madukot nga dinalan: “Kinahanglan—20,000 ka Auxiliary Payunir.” Nagsalig kami anay nga binagbinagon ninyo sing hanuot yadto nga panawagan. Sang gintipon ang Abril 1997 nga report sa pag-alagad, nalipay kita nga mahibaluan nga 22,410 ang nagpalista sa pag-auxiliary payunir! Kon idugang naton yadto nga numero sa 14,869 ka regular payunir kag sa 456 ka espesyal payunir nga nagreport sadto nga bulan, makita naton nga 30 porsiento sang kabilugan nga manugbantala ang nagpayunir. Himuon bala naton ini liwat sini nga tion sang Memoryal?
2 Mainit namon nga ginadayaw ang tanan nga nagpanikasog sing dugang agod mapauswag ang ila pag-alagad sa latagon sang nagligad nga tuig. Maathag gid nga kamo tanan ginpahulag bangod sang dimakagod nga gugma para kay Jehova nga Dios kag para sa inyo isigkatawo. (Luc. 10:27; 2 Ped. 1:5-8) Ang mga manugbantala nga may lainlain nga kahimtangan sa kabuhi naghusay sang ila hilikuton agod makaauxiliary payunir. Sa isa ka kongregasyon, 51 ka manugbantala ang dulungan nga nagpayunir sa isa ka bulan, lakip ang kalabanan nga mga gulang, ang isa ka iloy nga may 15-ka-bulan nga anak nga babayi, ang isa ka utod nga babayi nga nag-untat sa iya trabaho kag nakakita sing part-time nga trabaho agod makapayunir sia, kag ang isa ka tigulang nga utod nga babayi nga wala pa gid anay makapayunir. Ang manugtatap sang sirkito nagsulat: “Daku gid nga panikasog sa pagbantala nga hilikuton ang ginahimo. . . . Indi lamang ini may epekto sa teritoryo kundi ang mga kongregasyon napuno man sing kapagsik. Ang mga kauturan nalipay nga makilala ang isa kag isa sing labi pa kag subong man makita ang maayo nga mga resulta sang ministeryo.”
3 Ang mga pamatan-on nalakip man sang nagligad nga tuig. Isa ka 13-anyos nga dibawtismado nga manugbantala ang makunyagon nga naghulat sang tion nga masimbuluhan niya ang iya dedikasyon kay Jehova. Pagkatapos mabawtismuhan sang Pebrero, nagsulat sia tuhoy sa iya handum nga mag-auxiliary payunir sang Marso: “Bangod wala na sing nagaupang sa akon, gilayon ko nga ginhatag ang akon aplikasyon. . . . Ang madamong matahom nga eksperiensia nga naagom namon wala kuntani magmatuod kon indi tungod sa inyo mahigugmaon nga imbitasyon nga magpayunir. Nagapasalamat ako kay Jehova sa sining pribilehiyo nga malakip sa mga . . . nagsabat.” Tulumuron niya nga himuon ini liwat.
4 Ayhan isa ikaw sa 22,410 nga nag-auxiliary payunir sang nagligad nga Abril, ukon sa 13,690 sang Marso, ukon sa 14,332 sang Mayo. Himuon mo bala ini liwat karon nga tuig? Kon wala ka makapayunir sang nagligad nga tuig, himuon mo bala ini karon nga tuig? Malampasan bala naton ang 22,410 karon nga Abril? Amo yadto ang pinakamadamo nga nag-auxiliary payunir sa isa ka bulan sa sanga sang Pilipinas.
5 Magkonsentrar sa Abril kag Mayo: Karon nga tuig, ang Memoryal magatupa sa Sabado, Abril 11, nagahimo sa Abril nga isa ka ekselente nga bulan para sa dugang nga hilikuton sa ministeryo. (2 Cor. 5:14, 15) Sa nahaunang 11 ka adlaw sang bulan, higayon naton nga maagda ang pinakamadamo nga interesado sa pagtambong sa Memoryal. Kon plano mo nga mag-auxiliary payunir, ihatag palihug ang imo aplikasyon sing abanse sa petsa nga luyag mo magsugod.—1 Cor. 14:40.
6 Sanglit ang Mayo may lima ka Sabado kag Domingo, ang mga manugbantala nga nagatrabaho sa bug-os nga tion mahimo nga mahapusan sa pag-auxiliary payunir sa sina nga bulan. Paagi sa pag-iskedyul sing napulo ka oras sa pag-alagad sa latagon sa tagsa sang lima ka Sabado kag Domingo, napulo na lang ka oras ang kinahanglan nga iskedyulon mo sa bulan agod malab-ot ang lalambuton nga 60 ka oras.
7 Sa Abril kag Mayo, itanyag naton ang mga suskripsion kag indibiduwal nga mga kopya sang Ang Lalantawan kag Magmata! Magapalig-on ini sa madamo pa sa aton nga manikasog kag magpayunir. Ngaa masiling naton ina? Ang magasin mahapos itanyag kag makalilipay gamiton sa ministeryo. Sarang ini magamit sa tanan nga bahin sang pag-alagad—sa pamalaybalay kag pagbantala sa mga tiangge, subong man kon nagapakigsugilanon kita sa mga tawo sa dalan, paradahan, kag parke. Labi pa ka importante, ginasakdag sang Lalantawan kag Magmata! ang mga kamatuoran sang Ginharian. Ginapatalupangod sini ang katumanan sang tagna sang Biblia, nagapamatuod nga ang Ginharian sang Dios nagagahom na. Ginatandog man sini ang kabuhi sang mga bumalasa paagi sa pagbinagbinag sing mahinangpanon sang tunay nga mga kinahanglanon sang katawhan. Kon hunahunaon naton kon paano natandog ang aton kabuhi sining bilidhon nga mga balasahon, mapahulag kita sa pagpakigbahin nga mapanagtag ini sing lapnag gid sa Abril kag Mayo.
8 Bilang paghanda para sa sining dugang nga hilikuton sa magasin, makabenepisyo kamo gikan sa pagrepaso sining mga artikulo: “Ang Lalantawan kag Magmata!—Suno sa Tion nga mga Balasahon sang Kamatuoran” (Enero 1, 1994, Lalantawan), “Gamita sa Pinakamaayo nga Paagi ang Aton mga Magasin” (Enero 1996, Ang Aton Ministeryo sa Ginharian), kag “Maghanda Sang Imo Kaugalingon nga Presentasyon sa Magasin” (Oktubre 1996, Ang Aton Ministeryo sa Ginharian).
9 Ang mga Gulang Nagapanguna: Agod mahatag sa madamong manugbantala nga nagpayunir sang nagligad nga tuig ang ila mga kinahanglanon, ang mga gulang sa isa ka kongregasyon naggamit sang isa ka Sabado sa isa ka bulan subong pinasahi nga adlaw sa pag-alagad para sa bug-os nga kongregasyon. Ginhimo ang kahimusan sa pagtipon sa madamong lainlain nga oras sa sina nga adlaw, nagahatag sing kahigayunan sa tanan sa kongregasyon nga makigbahin sa lainlain nga porma sang pagpanaksi. Naglakip ini sang pagpangabudlay sa mga duog nga may negosyo, pagpanaksi sa dalan, pagpamalaybalay, pagduaw liwat, pagsulat, kag pagpanaksi paagi sa telepono. Ang resulta tumalagsahon, nga may 117 ka manugbantala nga nakigbahin sa pag-alagad sa latagon sa sina nga adlaw. Naghinguyang sila sing kabilugan nga 521 ka oras sa ministeryo kag nakapahamtang sing 617 ka magasin, brosyur, kag libro! Ang kalipay sadto nga Sabado ginpadayon tubtob sang Domingo, nga may mataas nga tumalambong sa Miting Publiko kag Pagtinuon sa Lalantawan.
10 Sa kada Miting sa Serbisyo sa Abril kag Mayo, dapat pahanumdumon ang kongregasyon kon san-o kag kon diin hiwaton ang mga miting antes magguwa sa latagon sa masunod nga semana, ilabi na kon may dugang nga kahimusan nga ginhimo luwas sa kinaandan na nga gin-iskedyul. Ang mga regular payunir subong man ang mga manugbantala nga wala mag-auxiliary payunir ginapalig-on nga suportahan ining mga kahimusan sang grupo suno sa ginatugot sang ila mga kahimtangan.
11 Ang manugtatap sa pag-alagad dapat makigsapol sa utod nga nagatangdo sing mga teritoryo agod mahimo ang mga kahimusan nga mapangabudlayan ang mga teritoryo nga talagsa lang ginatuptupan. Mahimo hatagan sing dugang nga igtalupangod ang mga balay nga wala sing tawo kag ang pagpanaksi sa dalan kag sa mga tiangge. Ang pagpanaksi sa gab-i mahimo mapadaku. Ang bastante nga suplay sang mga magasin dapat orderon para sa Abril kag Mayo bilang pagpaabot sa dugang nga hilikuton.
12 Madamong Manugbantala ang Mahimo nga Kalipikado: Ang unang dinalan sang aplikasyon sa pag-auxiliary payunir nagasiling (sa Hiligaynon): “Bangod sang akon gugma kay Jehova kag sang akon handum nga buligan ang iban nga mahibaluan ang tuhoy sa iya kag sa iya mahigugmaon nga mga katuyuan, luyag ko dugangan ang akon bahin sa pag-alagad sa latagon paagi sa pagpalista subong isa ka auxiliary payunir.” Ang gugma kay Jehova kag kaluyag nga buligan ang iban sa espirituwal tuman ka importante sa aton dedikasyon. (1 Tim. 4:8, 10) Agod makalipikar sa pag-auxiliary payunir, ang isa dapat nabawtismuhan, may maayong moralidad, kag makahinguyang sing 60 ka oras sa ministeryo sa sulod sang isa ka bulan. Samtang ginabinagbinag naton tanan ang aton mga kahimtangan, mahimo bala makapayunir ang pila sa aton nga wala pa gid anay makahimo sini karon nga tuig sa Abril ukon Mayo?
13 Mahimo marealisar sang madamo sa kongregasyon nga makapayunir man gali sila kon makita nila ang iban nga may mga kahimtangan kaangay nila nga nagpalista. Ang kabataan nga nagabutho, mga tigulang, bug-os tion nga mga mamumugon, lakip na ang mga gulang kag mga ministeryal nga alagad, kag ang iban pa nakaauxiliary payunir. Nalab-ot sang isa ka ginang sang puluy-an kag iloy sang duha ka kabataan nga nagaobra sing bug-os tion ang 60 ka oras, nakapahamtang sing 108 ka magasin, kag nakasugod sing 3 ka pagtuon sa Biblia sa isa ka bulan nga pag-auxiliary payunir. Paano niya ini nahimo? Gingamit niya ang tigpalanyaga sa pagpangabudlay sa malapit nga teritoryo, nagpanaksi sia paagi sa sulat, kag nagbantala sia sa paradahan kag dalan. Gingamit man niya ang iya day-off gikan sa obra kada semana sa pagpakigbahin upod sang kongregasyon sa pag-alagad sa latagon. Bisan nga sang primero naghunahuna sia nga ang pag-auxiliary payunir isa ka dimalab-ot nga tulumuron, paagi sa pagpalig-on sang iban kag sa praktikal nga iskedyul, ang mga sablag nalandas.
14 Ginpasalig ni Jesus ang iya mga disipulo: “Ang akon gota mahulas kag ang akon lulan mamag-an.” (Mat. 11:30) Amo ina ang titulo sang isa ka makapalig-on nga artikulo sa Agosto 15, 1995, Lalantawan. Nagasugid ini tuhoy sa isa ka utod nga babayi nga may mahuol, bug-os tion nga obra. Naghunahuna bala sia nga indi gid para sa iya ang mag-auxiliary payunir? Wala. Sa katunayan, nakaauxiliary payunir sia kada bulan. Ngaa? Bangod para sa iya ang pagpayunir nakabulig sa iya nga huptan ang iya pagkatimbang. Ang pagbulig sa mga tawo samtang nagatuon sila sang kamatuoran sang Biblia kag makita sila nga nagabalhin sang ila kabuhi agod pahamut-an ang Dios amo ang labing daku nga tuburan sang kalipay sa iya masako nga kabuhi.—Hulu. 10:22.
15 Ang bisan ano man nga personal nga mga sakripisyo kag mga pagbag-o nga ginahimo sang isa agod makapayunir ginatumbasan sing daku bangod sang mga pagpakamaayo nga ginaagom. Ang isa ka utod nga babayi nagsulat tuhoy sa iya eksperiensia sa pag-auxiliary payunir: “Nagbulig ini sa akon nga indi magmaiyaiyahon kag hunahunaon sing labi ang pagbulig sa iban. . . . Ginarekomendar ko ini sa mga makasarang sa paghimo sini.”
16 Nagakinahanglan Ini Sing Maayo nga Iskedyul: Sa katapusan nga pahina sini nga suplemento, ginkopya namon ang halimbawa nga mga iskedyul nga nagguwa sa Pebrero 1997 nga Ang Aton Ministeryo sa Ginharian. Ayhan isa sini ang nagakabagay sa imo kahimtangan. Samtang imo ini ginarepaso, binagbinaga ang imo kinaandan nga rutina sang binulan nga hilikuton. Anong mga proyekto sa balay ang sarang mahimo sing abanse sa imo pagpayunir ukon umalagi nga mapaiway kag himuon pagkatapos sang pagpayunir? Mahimo bala makuha ang pila ka tion nga ginahinguyang mo sa kalingawan, pagliwaliwa, ukon iban pa nga mga porma sang dibersion? Sa baylo nga hunahunaon ang kabilugan nga 60 ka oras nga kinahanglanon, planuha ang imo iskedyul para sa adlaw-adlaw ukon sa kada semana. Duha ka oras lamang sa isa ka adlaw ukon 15 ka oras sa isa ka semana ang kinahanglan agod makaauxiliary payunir. Tan-awa ang halimbawa nga mga iskedyul, kag nagauyat sing lapis, tan-awa kon ano nga kahimusan ang himuon mo may kaangtanan sa isa ka personal nga iskedyul sa pag-alagad nga nagakabagay gid sa imo kag sa imo pamilya.
17 Ang maayo nga reaksion kag dugang nga suporta nga ginpakita sang kongregasyon para sa ministeryo sang nagligad nga tuig nagpapagsik sa isa ka regular payunir nga nagsulat: “Madamo nga salamat sa inyo mahigugmaon nga pagpalig-on nga panikasugan sing dugang pa nga suportahan ang pag-auxiliary payunir. . . . Ang inyo ginpanugda nga mga iskedyul nakabulig sa madamo nga wala pa anay makapayunir nga makita nga masarangan nila ini. . . . Nalipay gid ako nga mangin bahin sang organisasyon ni Jehova kag sundon ang malipayon kag mahigugmaon nga pagpanguna sang matutom kag mainandamon nga ulipon.”
18 Ang Hulubaton 21:5 nagapasalig sa aton: “Ang mga plano sang isa nga mapisan pat-od gid nga para sa kaayuhan.” Ang Hulubaton 16:3 nagapalig-on sa aton: “Itugyan kay Jehova ang imo mga buluhaton kag ang imo mga plano magalig-on.” Huo, paagi sa mapangamuyuon nga paglakip kay Jehova sa aton desisyon kag sa malig-on nga pagsalig sa iya nga buligan kita nga magmadinalag-on, mangin positibo kita sa aton mga plano nga mag-auxiliary payunir. Ayhan pagkatapos makita ang kadalag-an sang aton iskedyul sa isa ukon duha ka bulan nga pag-auxiliary payunir, sarang naton mamarkahan ang kahon sa aplikasyon para sa pag-auxiliary payunir nga mabasa (sa Hiligaynon): “Tseke diri kon luyag mo mag-alagad sing padayon subong auxiliary payunir tubtob nga may dugang nga pahibalo.” Ano man ang kahimtangan, mahimo kita makaplano nga mag-auxiliary payunir liwat sa Agosto, diin may yara lima ka Sabado kag Domingo. Sa paghingapos naton sang tuig sa pag-alagad sa Agosto, ang nahiusa nga panikasog pagahimuon agod ang tanan makapakigbahin sing bug-os kon mahimo sa ministeryo.
19 Si Jesus nagtagna: “Sia nga nagatuo sa akon, ina man nga isa magahimo sing mga buhat nga ginahimo ko; kag magahimo sia sing mga buhat nga dalagku pa sa sini.” (Juan 14:12) Ang pag-alagad subong mga masigkamanugpangabudlay sang Dios sa tion nga ining tagna may daku nga katumanan isa gid ka makalilipay nga pribilehiyo naton. Karon na ang tion nga ibantala ang maayong balita sing labi pa, nagahimulos sang tion nga himuon ini. (1 Cor. 3:9; Col. 4:5) Ang masunson nga pag-auxiliary payunir isa gid ka maayo nga paagi sa paghimo sang aton bahin subong mga manugbantala sang Ginharian. Malangkagon naton nga ginahulat nga makita kon mangin daw ano ka daku ang ambahanon sang pagdayaw sini nga tion sang Memoryal gikan sa mga auxiliary payunir. (Sal. 27:6) Nagahunahuna sang mga resulta sang nagligad nga tig-ilinit, nagapamangkot kita, ‘Himuon bala naton ini liwat?’ Nagasalig kami nga himuon naton ini!
[Kahon sa pahina 3]
Makaauxiliary Payunir Ka Bala?
“Bisan ano man ang imo personal nga kahimtangan, kon ikaw bawtismado, may maayong moral nga tindog, makahimos nga masugata ang kinahanglanon nga maghinguyang sing mga 60 ka oras sa isa ka bulan sa pag-alagad sa latagon kag nagapati nga ikaw makaalagad sing isa ukon kapin pa ka mga bulan subong auxiliary payunir, ang mga gulang sa kongregasyon malipay sa pagbaton sang imo aplikasyon para sa sining pribilehiyo sa pag-alagad.”—Organisado sa Pagtuman sang Aton Ministeryo, pahina 113-14.