Magdumala sing mga Pagtuon sa Biblia sa Mabuhi sing Dayon nga Libro
1 Tuhoy sa Mabuhi sing Dayon nga libro, ang isa ka babayi nagsiling: “Masunod sa Biblia, nasapwan ko ini nga libro nga amo ang pinakasibu kag nagapahulag nga literatura nga akon na nabasa!” Kita tanan nagaugyon nga ini nga libro amo ang isa sang pinakamaayo nga nabalhag na sa pagbulig sa mga tawo nga mahangpan ang Biblia kag sa pagpahulag sa ila nga mangin aktibo nga mga dumalayaw ni Jehova.
2 Sang 1982, sang ginpaguwa ang Mabuhi sing Dayon nga libro, 60,098 ka manugbantala ang nagdumala sing 26,056 ka pagtuon sang Biblia sa Pilipinas. Sang Nobiembre, 1992, 111,665 ka manugbantala ang naghiwat sing 95,357 ka pagtuon sang Biblia. Sa karon, 62 milyones ka kopya sining libro ang gin-imprinta sa 115 ka pamulong. Daku gid ang epekto sini nga libro sa aton bug-os kalibutan nga hilikuton!
3 Magpahamtang sing mga Tulumuron: Ining tumalagsahon nga pagtubo amo ang resulta sang pagpakamaayo ni Jehova kag sang kalangkag sang iya katawhan nga buligan ang mga tawo paagi sa nagaluwas-kabuhi nga mensahe sang Biblia. (Roma 10:13-15; 1 Tim. 2:4) Ginakilala naton ang pagkahilingagawon sang mga tion kag ang pagkakinahanglanon sing kakugi sa pagbantala sang Ginharian sang Dios.
4 Samtang ang organisasyon nagalakat sing abante, ano ang aton ginahimo sing indibiduwal? Determinado bala kita nga makigbahin sing bug-os sa nagahimo sing disipulo nga hilikuton? Agod mahimo ini, dapat kita magpahamtang sing personal nga mga tulumuron. Sarang bala kita mangin mas makugi sa pagtatap sa interes? Ngaa indi magpahamtang sing tulumuron nga magsugod sing isa ka bag-ong pagtuon sa Biblia sa bulan sang Abril?
5 Sin-o ang Makadumala sing Pagtuon sa Biblia?: Madamong manugbantala gikan sa madamong ginhalinan ang nalipay magdumala sing pagtuon sa Biblia sa Mabuhi sing Dayon nga libro. Bangod sang simple nga estilo sini, bisan ang bag-uhan nga mga manugbantala makapakigbahin sa sining hilikuton. Dugang pa, gintun-an ini sing personal sang madamo sa aton, gani pamilyar kita sa mga kaundan sini. Ang isa ka manugbantala nga wala sing pagtuon sang Biblia antes gamiton ang Mabuhi sing Dayon nga libro nagsulat: “Tatlo ang akon pagtuon kag handa sugdan ang ikaapat. Nagapasalamat gid ako tungod sang paghimo sang pagtuon sa Biblia nga mahapos dumalahan.”
6 Ang mga kabataan man nagadumala sing mga pagtuon sa Mabuhi sing Dayon nga libro. Isa ka lamharon nga utod nga lalaki ang nagbilin sang libro sa iya desk sa eskwelahan. Nagbukas ini sang dalan para sa pila ka pagtuon sa Biblia. Gintilawan sang iban nga mga kabataan nga pangayuon ang pahanugot sang mga ginikanan nga nasugilanon nila sa pamalaybalay nga pag-alagad nga magtuon sing Biblia upod sa ila kabataan. Ang aton mga kabataan indi na bata pa katama agod magpamulong nahanungod sa saad ni Jehova nga dayon nga kabuhi sa paraiso nga duta.
7 Bata man ukon tigulang, ang isa sang pinakadaku nga kalipay nga matigayon sang bisan sin-o sa pag-alagad amo ang pagdumala sing isa ka pagtuon sang Biblia sa puluy-an. Gani ipangamuyo sang tagsatagsa sa aton ang bulig ni Jehova kag himuslan ang tanan nga kahigayunan nga mapahayag ang aton paglaum sing dayag. Gamita ang Mabuhi sing Dayon nga libro sa pagbulig sa iban sa pagtuon kon paano sila makapakigbahin sa pagdayaw sa aton Dios, nga si Jehova.—Sal. 148:12, 13.