Pagsugod sing mga Pagtuon sa Biblia Paagi sa Mabuhi sing Dayon nga Libro
1 Ang gugma sa katawhan dapat magpahulag sa aton nga mangin madagmit sa pagbalik agod buligan yadtong ginagutom kag ginauhaw sa kamatuoran. (Mat. 5:6) Dapat naton palambuon ang bisan anong diutay nga interes nga aton masapwan, kon indi naton luyag nga madula ini. Ang paghanda amo ang sekreto agod magmadinalag-on.
2 Ang aton tulumuron amo ang makasugod sing mga pagtuon sa Biblia. (Mat. 28:20) Ang una nga mga kopya sang Mabuhi sing Dayon nga libro nagaunod sining mga introduksion: “Isa gid ini ka ekselente nga libro nga magamit sa pagtuon upod sa tanan, pamatan-on ukon tigulang, walay sapayan sang ila nalab-ot nga edukasyon.” Ang mga estilo sini nagahimo sa mga pagdumala sang pagtuon nga mahapos, nagabulig bisan sa bag-uhan nga mga manugbantala nga makapakigbahin.
3 Paano Kita Makasugod sing mga Pagtuon?: Sa aton pagbalik, maayo nga hambalan ang pila ka pamangkot nga nasambit sa aton una nga pagduaw. Ayhan ginhambalan ninyo ang kahimtangan sang mga patay, nagbilin sing pamangkot nga, “Ano ang paglaum sang aton napatay nga mga hinigugma?” Ipaathag nga ang pagkabanhaw isa ka malig-on nga paglaum; ang Biblia nagaunod sing madamo nga halimbawa sang pagkabanhaw nga natabo na. Repasuha ang mga ilustrasyon sa mga pahina 167-9. Nian hambali ang ginasiling sa parapo 1 kag 2 sa pahina 166.
4 Mahimo nga nasugilanon mo ang isa ka ginikanan nga nagakabalaka nahanungod sa mga problema sang pagpadaku sa kabataan. Mahimo mo masiling ang kaangay sini:
◼ “Luyag sang tanan nga ginikanan ang pinakamaayo para sa ila kabataan. Ang Biblia nagaunod sing mga instruksion nga makabulig sa mga ginikanan sa paghanas sa ila mga kabataan agod makatigayon sing makaalayaw nga kabuhi. Bangod sina, ginarekomendar namon nga ang mga pamilya magtuon sing tingob sa Biblia. [Patuhuyi ang parapo 23 sa pahina 246.] Ang matigayon nga ihibalo makadala sing dayon nga mga pagpakamaayo sa bug-os nga pamilya!” Basaha ang Juan 17:3. Manaad nga magbalik kag ipakita sa pamilya kon paano masugdan ang ila pagtuon.
5 Kon isa ikaw ka pamatan-on ukon bag-uhan nga manugbantala kag ginapaathag mo ang paglaum sa Paraiso sa imo una nga pagduaw, buksi ang libro sa pahina 3 kag magsiling sing simple:
◼ “Ang Biblia nagasaad nga yadtong nagahimo sang kabubut-on sang Dios makapaabot nga magkabuhi sa isa ka kalibutan nga kaangay sini. Ini nga libro nakabulig sa akon nga matun-an kon ano ang himuon ko agod matigayon ina nga pagpakamaayo. Luyag ko ikaw buligan nga makita kon paano mo man matigayon ini.” Magtanyag nga ipasundayag ang aton paagi sa pagtuon.
6 Subong mga disipulo ni Jesus, may katungdanan kita nga buligan ang mga tawo. (Roma 10:14) Responsabilidad naton nga palambuon ang nasapwan naton nga interes. (Mat. 9:37, 38) Kon ginatuman naton ini nga asaynment sing nagakaigo, ang tanan makaambit sa resulta nga mga pagpakamaayo.—1 Tim. 4:16.