Pagbalik Agod Pukawon ang Interes sa Biblia
1 Masumalang naton kon kaisa sa pag-alagad sa latagon ang mga tawo nga nagapakita sing interes sa maayong balita apang tuman kasako makighambal sa aton kon magduaw kita. Ginatilawan bala naton nga magduaw liwat sa iban nga oras agod ipaambit ang kamatuoran sa ila? Ukon ayhan may makawiwili kita nga paghambalanay upod sa tagbalay, apang wala sia magkuha sing bisan ano nga literatura. Nagabalik bala kita agod makigsugilanon pa sa iya?
2 Importante nga tatapon ang tanan nga interes nga makita naton. Nagaduaw liwat lamang bala kita sa mga nakakuha sing literatura? Kon amo, mahimo naton malaktawan ang pila ka interesado. Indi gid naton luyag hukman ang isa subong ditakus bangod lamang wala sia magkuha sing literatura. (Ipaanggid ang Roma 14:4.) Ayhan pagkatapos sang aton pagduaw, mahimo nga nahunahuna sang tagbalay kon ano ang ginsiling naton kag gani labi nga magapamati kon magbalik kita.
3 Kon magbalik sa tawo nga masako anay, mahimo ka makasiling:
◼ “Nalipay ako nga makita ka liwat. Sang nagligad nga pagkadto ko, wala kita makahambalanay bangod wala ka sing tion. Nakita ko nga isa ikaw ka masako nga tawo, gani indi ako magadugay. Ayhan nabalaka ikaw nahanungod sa imo maayong panglawas kag sa iya sang imo hinigugma. Ti, nakahibalo ka bala nga nagsaad ang Dios nga tapuson ang tanan nga balatian? [Pasabta sia.] Talupangda ang punto sa parapo 4 sining brosyur nga natig-uluhan ‘Toloka! Ginahimo Ko nga Bag-o ang Tanan nga Butang.’ ” Kon may tion pa, basaha ang parapo kag nian binagbinaga ang isa sang mga kasulatan sa ubos sang pahina 4 nga nagalaragway sang mga kahimtangan sa bag-ong kalibutan. Kon ang tagbalay mamati, mahimo nimo masugdan ang isa ka pagtuon sa Biblia.
4 Kon nagaduaw liwat sa isa nga nagbaton sing tract, mahimo ka makasiling sing subong sini:
◼ “Sang nagligad nga pagkitaay naton, ginbaton mo ang isa ka kopya sining tract nga natig-uluhan Sin-o Gid ang Nagagahom sa Kalibutan? Nabudlayan bala ikaw sa pagbaton nga si Satanas ang nagagahom sining kalibutan? [Pasabta sia.] Talupangda ang nahaunang parapo sa pahina 6.” Basaha ang parapo, nian mamangkot: “Ngaa luyag ni Satanas nga dayaon kita?” Sa tapos makasabat ang tagbalay, binagbinaga ang ikap-at nga parapo sa pahina 3. Ayhan makapadayon ikaw paagi sa maid-id nga pagbinagbinag sa tract, ukon ayhan luyag mo ipakilala ang brosyur nga Nagaulikid Gid Bala ang Dios sa Aton? kag binagbinagon ang parapo 8 sa pahina 13.
5 May maayong rason agod mangin positibo kag tatapon ang interes nga nakita naton sa aton pagbantala nga hilikuton bisan pa nga ginpakita ini sa limitado nga paagi.
6 Kon may maayo nga paghambalanay kamo sang isa nga ayhan medyo interesado, indi pagkalimti nga duawon sia liwat agod palambuon ang interes. Ayhan magaresulta ini sa isa ka pagtuon sa Biblia kag sa pagpahamtang sa isa sa dalan padulong sa kabuhi.—1 Tim. 4:16.