Paggamit sang Mabuhi sing Dayon nga Libro sa mga Pagduaw Liwat
1 Ginpaanggid ni apostol Pablo ang mga nagapakita sing interes sa kamatuoran sa linghod nga mga tanum, nga nagakinahanglan sing tayuyon nga pagbunyag kag pagkultibar. (1 Cor. 3:6-9) Amo man sa karon, ang mga interesado nagakinahanglan sing mahigugmaon nga pag-atipan nga mahatag naton kon nagaduaw kita liwat agod kultibahon ang ila espirituwal nga pagtubo.
2 Ang mga indibiduwal nga ginaduaw naton masami nga nagakinahanglan sing mga pahanumdom agod madumduman nila ang mga punto nga ginhambalan anay naton sa nagligad nga pagduaw. Gani sa tagsa ka pagduaw liwat maayo nga repasuhon sa malip-ot ang ginhambalan ninyo sang nagligad nga tion.
3 Sa pagduaw liwat, napahamtang man ukon wala ang “Mabuhi sing Dayon” nga libro, ayhan luyag mo gamiton ining direkta nga pagpalapit sa pagsugod sing isa ka pagtuon:
◼ “Madamo sang amon nasugilanon nga mga tawo ang nakakita sing mga sabat sa ila mga pamangkot sa Biblia paagi sa paggamit sini nga libro.” Nian sa pagbukas sa mga kaundan, mahimo ka mamangkot: “Diin diri nga tema ang nagawili gid sa imo?” Buksi ang kapitulo nga nagawili sa iya kag ipakita kon paano ang tagsa ka parapo ginanumeruhan kag may pamangkot para sa sini sa ubos sang pahina. Tuptupi ang pila lamang ka punto kag maghimo sing mga kahimusan nga makaduaw liwat.
4 Ang isa pa ka pagpalapit amo ang:
◼ “Nalipay gid ako sa aton paghambalanay sang nagligad nga semana. Madamo nga tawo ang natingala kon ngaa pirme kami nagaduaw sa ila mga puluy-an. Ginahunahuna ko nga ang komento sa pahina 29 sini nga libro magawili sa imo. [Basaha ang parapo 11 gikan sa Mabuhi sing Dayon nga libro.] Pasad sa ginasiling diri, ano ang ginakinahanglan agod ang aton pagsimba mangin kalahamut-an sa Dios? [Pasabta sia.] Sadto anay sang adlaw ni Jesus, may mga tawo nga naghunahuna nga ang ila relihion kalahamut-an sa Dios. Talupangda kon ano ang ginasiling sang parapo 2 sining kapitulo nahanungod sa ila.”
5 Sa pagtatap sa napahamtang nga “Mabuhi sing Dayon” nga libro, makasiling ka:
◼ “Sang nagligad nga pagduaw ko, ginhambalan naton ang mga kahimtangan sa kalibutan nga nagakinahanglan sing pagbalhin. Napaligban mo na bala kon ngaa ginatugutan sang Dios ang kalautan?” Pasabta sia kag buksi ang pahina 29, parapo 2, nagapatalupangod sang mga pamangkot sa pagtuon. Basaha kag hambali ang parapo, nga ginabasa ang mga kasulatan. Madugangan mo ini paagi sa pagliton sa mga laragway sa libro, halimbawa, sa pahina 78, 84-5, 119, 147, 149-53, kag 156-8.
6 Kon Isa ka Tract ang Nabilin: Kon kaisa isa ka tract ang nabilin sa nahauna nga pagduaw. Sa imo pagbalik, mahambalan ninyo ang isa ukon duha ka parapo gikan sa tract upod ang mga kasulatan nga ginsitar. Nian ipakita kon paano ginhambalan sing detalyado pa ang isa sang mga kasulatan sa Mabuhi sing Dayon nga libro.
7 Samtang ginabunyagan naton sing maayo ang linghod nga mga tanum sang Cristianong pagtuo nga ginaatipan naton, ang Dios magapatubo sini sa iya kaugalingon nga kadayawan kag kahimayaan.—1 Cor. 3:7.