Simple kag Epektibo nga mga Pagduaw Liwat
1 Tayuyon ka bala nga nagahimo sing mga pagduaw liwat, ukon nabudlayan ka bala bangod indi ka makahibalo kon ano ang isiling? Tatlo ka butang ang magabulig sa imo nga magmadinalag-on: (1) maayo nga paghanda; (2) ikasarang sa pagpaathag sang isa ukon duha ka punto sa pila ka simple nga mga tema sa Biblia; kag (3) kahanda sa pagpamati sa punto-de-vista sang tagbalay.
2 Sa paghanda sa paghimo sing pagduaw liwat, binagbinaga kon ano nga tema ang labing maayo nga hambalan upod sa tagbalay. Nagpautwas ka bala sing pamangkot sa katapusan sang imo nagligad nga pagduaw, ukon nagpakita bala sing interes ang tagbalay sa isa ka partikular nga tema? Repasuha ang imo mga nota, kag gamita ang Reasoning nga libro sa pagpangita sing impormasyon nga kinahanglan mo sa paghimo sing epektibo nga pagduaw liwat. Kon nagahimo sing pagduaw, tamyawa ang tagbalay sa ngalan.
3 Kon Ang Lalantawan kag Magmata! ang imo napahamtang sa tagbalay, ang imo pagduaw liwat mahimo mapasad sa isa ukon duha ka simple nga mga punto nga napili mo gikan sa magasin. Kon nakapahamtang ka sing tract sa nahauna nga pagduaw, mahimo ka makakomento sa tract ukon makapatuhoy sa isa ka nagakaigo nga punto sa magasin ukon brosyur.
4 Kon “Kabuhi sa Mahidaiton nga Bag-ong Kalibutan” ang imo napahamtang, magsiling lamang:
◼ “Sang nagligad nga pagduaw ko, ginhambalan naton ang nahanungod sa saad sang Dios nga isa ka mahidaiton nga bag-ong kalibutan. Subong sang ginhambalan naton, ang mas maayo nga mga kahimtangan magaabot paagi sa Ginharian sang Dios. Ano sa banta mo ang ginakinahanglan para mangin bahin kita sinang mahidaiton nga bag-ong kalibutan?” Tuguti ang tagbalay sa pagkomento, ugaling patuhuyan ang mga punto sa Salmo 37:9, 11, 29.
5 Kon “Ano ang Paglaum sang Napatay nga mga Hinigugma?” ang imo napahamtang, ining malip-ot nga mga komento mahimo nga magaumpisa sang isa ka paghambalanay:
◼ “Pagkatapos sang aton paghambalanay sang nagligad, ginbilinan ko ikaw sing tract nga natig-uluhan Ano ang Paglaum sang Napatay nga mga Hinigugma? Ang ikatlong parapo nagapautwas sing pila ka makawiwili nga pamangkot: ‘Ngaa ang mga tawo nagakapatay? Diin ang mga patay? Kag paano kita makapat-od nga mabuhi sila liwat?’ Ang masunod nga subtitulo, nga natig-uluhan ‘Kamatayon, kag Kon Ano ang Nagakatabo Kon Mapatay Kita,’ nagasabat sa tagsa ka pamangkot. Talupangda kon ano ang ginasiling sini sa ikaapat nga parapo.” Basaha ang parapo, lakip ang duha ka kasulatan, kag pamangkuta ang tagbalay sang iya punto-de-vista.
6 Sa lakat sang paghambalanay, ang tagbalay mahimo magpabutyag sing pila ka punto-de-vista nga indi husto. Indi kinahanglan nga baison ang tanan nga ginasiling niya. Sa baylo, magpabilin sa topiko nga ginahambalan. Ang bisan anong dimakasulatanhon nga mga ideya niya mahimo matadlong sa palaabuton nga mga pagduaw liwat.
7 Sa tanan nga paagi planuha nga tatapon ang bisan ano nga interes paagi sa paghimo sing simple kag epektibo nga mga pagduaw liwat sa Mayo.