Palambua ang Interes sa Ginharian sang Dios sang Paghidait
1 Sa bulan sang Pebrero, igatanyag naton ang libro nga Mahimu Ka Mabuhi sing Dayon sa Paraiso sa Duta. Ang aton tulumuron amo dapat ang pagbulig sa bunayag sing tagipusuon nga katawhan nga mapalambo ang apresasyon para sa Ginharian sang Dios kag sa kon ano ang pagahimuon sini. Ang punto-de-vista nga mga pamangkot makabulig sa aton sa sining katuyuan.
2 Pagkatapos sang mainabyanon nga panamyaw, ayhan mahimo kita makasiling sing kaangay sini:
◼ “Ang makakilibot nga mga pagbalhin sa gobierno nagakahanabo sa bug-os nga duta, kag ang tulumuron nga paghidait masunson ginasambit. Nagapati ka bala nga matigayon gid ang matuod nga paghidait? [Pakumentuha sia.] Bisan pa madamo ang nagapaabot nga paluntaron sang tawhanon nga mga gumalahom ang paghidait, talupangda kon paano nagasaad ang Dios nga paluntaron ang paghidait sa Salmo 46:9. [Basaha.] Anong mga pagbalhin sa banta mo ang paluntaron sang pagpanghikot sang Dios? [Pamatii ang sabat sang tagbalay, nian ipakita ang tract nga Kabuhi sa Mahidaiton nga Bag-ong Kalibutan.] Mahanduraw mo bala kon ano ang ginalaragway diri?” Binagbinaga ang impormasyon sa ubos sang subtitulo nga “Kabuhi sa Bag-ong Kalibutan sang Dios.” Nian mahimo kita mamangkot: “Nagahunahuna ka bala nga pahanabuon sang gobierno sang Dios ini nga mga pagbalhin?” Buksi ang Kapitulo 13 sang Mabuhi sing Dayon nga libro kag ipaathag ang nahaunang duha ka parapo. Itanyag ang libro kag maghimos para sa isa ka pagduaw liwat.
3 Ukon mahimo kita makasiling:
◼ “Kita tanan may yara madamong problema nga dapat lubaron kada adlaw. Nagapati ka bala nga makalaum kita sing paumpaw gikan sa sining mga problema? [Pakumentuha sia.] Ayhan nagahunahuna ang iban nga ang Dios wala nagasapak sa aton kahimtangan. Apang, talupangda kon ano ang ginasaad niya sa Bugna 21:3, 4.” Basaha ang mga bersikulo. Sa sining punto mahimo matanyag ang Mabuhi sing Dayon nga libro, ang bag-o nga magasin, ukon ang tract nga Makalampuwas Bala Ining Kalibutan? Kon ginatanyag ang tract, mahimo mabinagbinag ang materyal sa pahina 2 kag 3 sa ubos sang subtitulo nga “Ang Palaabuton Sining Kalibutan.” Kon ginpakita ang interes, matanyag mo ang Mabuhi sing Dayon nga libro. Kon ginatanyag mo ang brosyur nga Nagaulikid Gid Bala ang Dios sa Aton?, mahimo mapautwas ang pamangkot: “Ngaa ginatugutan sang Dios ang pag-antos?” Ipakita ang bahin 6 sang brosyur, kag maghimos nga ipaathag ini sa masunod nga pagduaw.
4 Ayhan pakamaayuhon mo nga ipakita ang isa ka artikulo gikan sa isa sang pinakaulihi nga mga magasin paagi sa pagkomento sa isa ka espesipiko nga punto sa pinili nga artikulo.
Kon ang tagbalay nagapabutyag sing interes, ipakilala ang magasin, ayhan paagi sa pagsiling:
4◼ “Ginapaathag sing detalyado pa sini nga artikulo ang topiko. [Basaha ang isa ukon duha ka napili na nga daan nga dinalan.] Ang artikulo nagapaathag sang dugang pa nga mga punto nga makapalig-on gid sa imo kag sa imo pamilya. Sanglit daw interesado ka sa sini nga tema, nalipay kami nga ibilin sa imo ini nga guwa kag ang iya kaupod nga magasin.”
5 Ang mga tawo sa karon masunson nga ginaligban sa kon diin sila makakuha sing mga sabat sa mga problema nga ginaatubang sang katawhan. Pribilehiyo naton nga ipaambit sa ila ang maathag nga paglaum para sa palaabuton. (Binu. 17:27) Nian, kabay nga makugi naton nga iliso ang igtalupangod sang katawhan sa Ginharian sang Dios, ang matuod nga tuburan sang paghidait.