Ang Libro nga Nagahatag sing Matuod nga Panuytoy
1 Ang kalibutan nagbalhin sing dramatiko sini nga siglo. Bisan pa nga may mga pag-uswag sa komunikasyon, medisina, kag transportasyon, ang kalidad sang pagkabuhi sang pamilya padayon nga nag-usmod. Minilyon ang ginatuytuyan sang nagabulubalhin nga mga pilosopiya sang mga tawo.
2 Sa sining nagabalhin nga kalibutan, ang katawhan ni Jehova nakabenepisyo sing daku paagi sa pagsunod sa iya Pulong. Ang Biblia wala magbalhin sa linibo ka tuig, kag ang laygay sini amo sa gihapon ang pinakapraktikal sa paglubad sa mga problema nga ginaatubang naton karon. Paano naton mabuligan ang iban sa pag-apresyar nga nagahatag ini sing matuod nga panuytoy para sa aton moderno nga adlaw?
3 Kon nabilin mo ang tract nga “Kon Ngaa Imo Masaligan ang Biblia” sa nahauna nga pagduaw, mahimo ka makabalik kag makasiling:
◼ “Sanglit ang Biblia nagasiling nga mensahe ini halin sa Dios kag nga nagahatag sia sa aton sing kabuhi nga dayon kon magkabuhi kita nahisuno sa sini, nagabatyag ka bala nga mapuslanon nga usisaon sing labi pa ang nahanungod sini? [Pakumentuha sia.] Talupangda ang ginatagna sang Biblia nahanungod sini nga kalibutan. [Basaha ang 2 Timoteo 3:1-5 sing direktra gikan sa pahina 5 sang tract.] Sa banta mo nagakaigo bala ini sa kalibutan karon? [Pakumentuha sia.] May maayong rason bala sa pagpaabot sing maayo pa nga mga kahimtangan sa palaabuton?” Nian mapaathag mo ang katapusan nga duha ka parapo sa tract ukon ang pahina 161 sang libro nga The Bible—God’s Word or Man’s?, agod ipadaku ang paglaum nga ginahatag sang Biblia para sa katawhan.
4 Kon ang tagbalay interesado sa praktikal nga balor sang Biblia kag ginpakita mo ang mga halimbawa sa kapitulo 12 sang “The Bible—God’s Word or Man’s?,” mahimo ka makasiling:
◼ “Interesado kita sa mga butang nga praktikal karon, indi bala? Magaugyon ka bala nga ang pagtapos sa inaway praktikal? [Pasabta sia.] Kon matun-an sang mga tawo ang magkabuhi sing ululupod nga may paghidait, maayo ini nga panugod, indi bala? [Pasabta sia.] Amo gid sina ang ginatagna sang Biblia. [Basaha ang Isaias 2:2, 3.] Napamangkot mo na bala kon paano kag kon san-o ini magaabot?” Ipaathag nga luyag mo hambalan ini nga pamangkot sing labi pa sa masunod nga pagduaw mo.
5 Kon nabilin mo ang “New World Translation,” mahimo ka makasiling:
◼ “Sa pagbasa sang Biblia nga ginbilin ko sa imo, ayhan natalupangdan mo nga ginagamit sini ang personal nga ngalan sang Dios sa kabug-usan. Importante ini nga pag-uswag sangsa madamong iban pa nga mga badbad sang Biblia. Bisan pa nga ang iban nga mga tawo mahimo mangalag-ag sa paggamit sa ngalan nga Jehova, dapat naton dumdumon nga ginsugid niya ang iya ngalan sang nagligad kag ginpalig-on ang iya mga alagad nga gamiton ini sa pagpakilala sa iya subong ang matuod kag buhi nga Dios. Talupangda ang ginsulat sang salmista sa Salmo 83:18.” Basaha ang kasulatan, kag tuguti ang tagbalay sa pagkomento. Suno sa interes nga ginpakita, mahimo mo gamiton ang dugang nga impormasyon nga masapwan sa idalom sang tig-ulo nga “Jehovah,” sugod sa pahina 191 sang Reasoning nga libro.
6 Ang Biblia lamang ang nagahatag sang panuytoy nga ginakinahanglan sang tawo. (Jer. 10:23) Busa, hanuot naton nga agdahon ang iban nga makabenepisyo gikan sa maalamon kag praktikal nga laygay sini.