Ang Balor sang Biblia sa Kalibutan Karon
1 Madamo sa karon ang nagatamod sa Biblia subong karaan kag direalistiko. Samtang amo ini ang pinakalapnag nga napanagtag nga libro sa bug-os nga maragtas, diutay lamang ang nagabasa sini kag mas diutay pa ang nagasunod sa gihapon sa mga panuytoy sini.
2 Sa kabaliskaran, ginapakabahandi naton ang Biblia subong Pulong sang Dios. Ginapakita sang mga katunayan nga ini sibu sa maragtas. Dugang pa, ang tumalagsahon nga paghilisantuanay sini, ang mga tagna sini, kag ang makusog magpahulag nga puwersa sini sa kabuhi sang mga tawo tanan nagapakita nga ang Biblia “inspirado sang Dios.” (2 Tim. 3:16) Ang aton apresasyon para sa sini dapat magapahulag sa aton nga palig-unon ang iban nga usisaon ang matuod nga balor sini.
3 Ang isa ka pagpalapit mahimo amo:
◼ “Bangod sang mabug-at nga mga problema nga ginaatubang sang katawhan, madamo nga mga tawo ang nabudlayan sa pagpati sa Dios, ukon ginapangduhaduhaan nila ang ikasarang sang Dios sa paglubad sa mga problema nga ginaatubang naton. Ano ang balatyagon mo tuhoy sina? [Pasabta sia.] Talupangda ang tig-ulo sining tract, Kon Ngaa Imo Masaligan ang Biblia.” Basaha ang nahauna kag ikaduha nga mga parapo sa pahina 2. Kon ang tagbalay nagapakita sing interes, mahimo mo basahon kag ipaathag ang mga kasulatan nga ginasambit sa ikaduha nga parapo. Nian matanyag mo ang libro nga The Bible—God’s Word or Man’s? upod ang New World Translation, nagapakita kon paano sini ginapalig-on ang pagsalig sa Pulong sang Dios.
4 Ang isa pa ka pagpalapit mahimo nga kaanggid sa sini:
◼ “Wala ka bala nagaugyon nga ang katawhan nagakinahanglan sing panuytoy sa paglubad sa mga problema sa kabuhi? [Pasabta sia.] Sang nagligad, ang mga tawo masunson nga nagadangop sa Biblia para sa panuytoy, apang ang tion nagbalhin na. Nagahunahuna ka bala nga ang Biblia may praktikal nga balor karon? [Pasabta sia.] Talupangda ang ginasiling sang 2 Timoteo 3:16. [Basaha.] Ang nasulat nga Pulong sang Dios wala lamang nagabulig sa aton sa paghimo sing maalamon nga mga desisyon kundi nagahatag man sing masaligan nga paglaum para sa palaabuton.” Basaha ang Juan 17:3. Kon ang tagbalay nagaugyon, ipakita ang isa ukon duha ka espesipiko nga mga punto nga napili mo gikan sa Kapitulo 12 sang libro nga The Bible—God’s Word or Man’s? sa pag-ilustrar sang praktikal nga balor sang Biblia.
5 Ayhan masapwan mo nga mabuligon nga gamiton ang pila sa mga introduksion nga ginbalay sa pahina 10 sang Reasoning nga libro sa idalom sang subtitulo nga “Bible/God.” Ang dugang nga impormasyon ginapresentar sa pahina 58-68 nga mahimo makabulig sa pagsabat sa mga pamangkot sang tagbalay ukon sa paglandas sa ila mga pagpamatok.
6 Pagtanyag sing New World Translation: Mahimo ka mamangkot kon bala ang tagbalay may kopya sang Biblia kag kon nahapusan sia sa pagbasa sini. Depende sa sabat, ihatag ang pila sang mabuligon nga mga bahin sang New World Translation. Mahimo mo mapatalupangod ang isa ukon duha ka punto gikan sa pahina 276-80 sang Reasoning nga libro.
7 Mangin alisto sa pagpalig-on sa mga tawo nga basahon ang Biblia. Paagi sa pag-aplikar sa mga prinsipio sini sa ila personal nga mga kabuhi, matigayon nila ang madamong mga kaayuhan karon kag sa palaabuton.—Sal. 119:105.