Papagsika ang Pagtubo Paagi sa Makahulugan nga mga Pagduaw Liwat
1 Agod buligan ang mga nagpakita sing interes, importante nga amanan naton sila sing madamong espirituwal nga pagkaon paagi sa tayuyon nga mga pagduaw liwat. Ang aton mga pagduaw amat-amat nga magabulig sa pagpapagsik sang ila espirituwal nga pagtubo. (1 Cor. 3:6-9) Apang, agod mangin makahulugan ang aton mga pagduaw liwat, kinahanglan nga maghanda kita sing abanse, nga nagahunahuna sina nga tawo.
2 Pagduaw Liwat sa mga Ginbilinan Naton sing Tract: Ayhan ang Mahidaiton nga Bag-ong Kalibutan nga tract napahamtang sa una nga pagduaw.
Pagkatapos marepaso sing malip-ot kon ano ang nahambalan, mahimo kita makapamangkot:
◼ “Anong gobierno ang makapaluntad sini nga mga pagbalhin? [Pakumentuha sia.] Walay duhaduha nga nalipay ka magkabuhi sa mga kahimtangan nga kaangay sini. Paano ini posible?” Nian binagbinaga ang materyal sa ubos sang subtitulo nga “Kon Paano Ini Posible Para sa Imo.” Kon ginpakita ang interes, sarang maliton ang igtalupangod sa Mabuhi sing Dayon nga libro, sa Kapitulo 15, “Kon Paano Mangin Sakop sang Pangulohan sang Dios.” Mahimo naton mahambalan ang nahaunang duha ka parapo kag nian mamangkot: “Paano kita dapat maapektuhan sang pagtuon nahanungod sa Dios?” Sabta ang pamangkot kag maghimos nga padayunon ang paghambalanay sa masunod nga pagduaw.
3 Kon nagaduaw liwat sa mga ginbilinan naton sang brosyur nga “Nagaulikid Gid Bala ang Dios sa Aton?”, mahimo kita makasiling:
◼ “Sang nagligad nga pagduaw ko nahambalan naton ang madamong problema nga ginaatubang sang katawhan kag kon ano ang ginasaad sang Dios nga himuon sa sini. Apang, ngaa ginatugutan sang Dios ang pag-antos sing tuman na kadugay? Ang sabat masapwan sa bahin 6 sang brosyur nga ginbilin ko sa imo.” Sa tapos mabinagbinag ang pila ka parapo, mahimo kita makapamangkot: “Ano ang kinahanglan nga himuon naton agod makabenepisyo gikan sa mga saad sang Dios?” Ang materyal sa ubos sang Bahin 11, “Ang Pundasyon sang Bag-ong Kalibutan nga Ginapasad Karon,” sa pahina 28-31, mahimo mapatalupangod para hinun-anunan sa masunod nga pagduaw.
4 Pagduaw Liwat sa mga Ginbilinan Naton sing mga Magasin: Kon nagpili ka sing isa ka espesipiko nga artikulo nga nagwili sa tagbalay, palambua ang dugang nga mga punto gikan sa artikulo pagbalik mo, nagasentro sang igtalupangod sa isa ka pangunang kasulatan kag sa materyal nga nagahinun-anon sini. Subong man, mahimo matawag ang igtalupangod sa masunod nga guwa sang magasin kon nagaunod ini sang artikulo sa amo man nga topiko. Kon wala, mahimo naton mapatuhuyan ang materyal sa Mabuhi sing Dayon nga libro tuhoy sa sina nga tema kag maghimos nga hambalan ini sa aton masunod nga pagduaw.
5 Ang pagpakita naton sing personal nga interes paagi sa paghimo sing regular nga mga pagduaw liwat magapakita sang aton gugma sa ila kag kay Jehova. (Juan 13:34, 35) Kabay nga padayon naton nga papagsikon ang espirituwal nga pagtubo sa mga yara sa aton teritoryo paagi sa tayuyon nga paghimo sing makahulugan nga mga pagduaw liwat.