Ang Lalantawan kag Magmata!—Mga Balasahon sang Kamatuoran
1 Ang Enero 1, 1994, nga guwa sang Ang Lalantawan, pahina 22, nagpahanumdom sa aton nga ang aton mga magasin nagabalhag sing “suno sa tion nga mga artikulo nga nagahinun-anon sang matuod nga mga kinahanglanon sang katawhan.” Sa Abril kag Mayo, itanyag naton ining mga magasin sa tanan nga masugilanon naton.
2 Ang pamalaybalay nga hilikuton nagahatag sing labing maayo nga kahigayunan agod mapahamtang ang mga magasin. Ang epektibo nga impormal nga pagpanaksi, pagpanghikot sa dalan, kag pagpangabudlay sa komersial nga teritoryo mga ekselente man nga paagi sa pagpauswag sang pagpanagtag.
3 Mga Topiko nga Mahambalan: Ang Abril 1 nga guwa sang Ang Lalantawan nagabinagbinag sang mga topiko nga “Isa ka Mas maayo nga Kalibutan—Damgo Lamang Bala?” kag “Isa ka Mas Maayo nga Kalibutan—Malapit Na!” Nahisanto gid ini sa katuyuan sang magasin nga ibantala ang Ginharian sang Dios. Ginapakita sang ikaduha nga artikulo kon paano ang paraiso mangin isa ka katunayan sa idalom sang pagginahom ni Cristo.—Luc. 23:43.
4 “Sa Diin Ikaw Makasapo sing Masaligan nga Panuytoy?” amo ang pamangkot nga ginhinun-anunan sa Abril 15 nga guwa. Ginausisa sing dugang sang Mayo nga mga guwa ini nga topiko sa mga artikulo nga “Ginahatag Bala sang Relihion ang Inyo mga Kinahanglanon?” kag “Ngaa Basahon ang Biblia?” Mahapos naton masugilanon ang mga tawo nga nagabatyag nga ang ila kabuhi kulang sing katuyuan.
5 Pagpauswag sang mga Napahamtang: Ang Enero 1 nga guwa naghatag sing apat ka panugda agod mapauswag ang mga napahamtang. Ginpalig-on kita nga (1) magmangin mahunahunaon sa magasin. Kon ginabasa mismo naton ini, dapat naton hunahunaon kon ano nga mga artikulo ang makagalanyat sa mga tawo sa aton teritoryo. Subong man, kon pirme kita nagadala sing mga kopya, mahimo ini naton mapahamtang sa mga kaupdanan sa trabaho, mga kaingod, mga manunudlo, mga kabutho, ukon sa mga nagapamalaklon.
6 Ginpahanumdom kita nga (2) huptan nga simple ang aton mga presentasyon. Magpili sing isa ka makawiwili nga punto, kag ihambal ini sa pila ka tinaga. Kon mapahamtang mo ang magasin, mahimo ini “magapakigsugilanon” sa mga tawo sa panimalay.
7 Ang isa pa ka kinahanglanon amo ang (3) magmangin mapasibusibuon. Maayo nga maghunahuna sing pila ka artikulo nga mahambalan—ang isa para sa mga pamatan-on, ang isa para sa mga lalaki, kag ang isa pa para sa mga babayi.
8 Sa katapusan, kinahanglan kita (4) magpahamtang sing personal nga tulumuron para makapahamtang. Samtang ang kongregasyon indi makapahamtang sing lalab-uton, mahimo kita makahimo sang aton kaugalingon nga tulumuron. Magabulig ini sa aton nga mangin mas mapagsik sa pagtanyag sing mga magasin.
9 Luyag naton nga mahibaluan sang tanan ang nahanungod sa Ginharian sang Dios. Himusli sing bug-os ang mga magasin sa pagpalapnag sang mensahe sang Ginharian.—Mat. 10:7.