Gamita ang mga Magasin sa Pagpaambit sang Kamatuoran
1 Ang matinuuron nga impormasyon ginapakadiutay gid sa karon bangod sang sobra nga pagpasayod, nagapatalang nga mga pangako sa politika, kag malalangon nga internasyonal nga mga pangangkon. Ang Lalantawan kag Magmata! pinasahi bangod ini lamang ang nagabantala sang kamatuoran nahanungod sa Ginharian sang Dios kag nagapaathag kon ano ang dapat himuon sang tanan agod maagom ang mga pagpakamaayo nga ginadala sini.
2 Sa isa ka pungsod ang opisyal sang ministri sang impormasyon nga nag-apresyar sa kabilihanan sining mga magasin gilayon nga nagbulig agod matigayon ang pahanugot para mapanagtag ini. Sia nagsiling: “Ginakabig ko Ang Lalantawan nga isa sang pinakamaayo nga mga magasin; nalipay gid ako sa pagbulig.” Paano ninyo itanyag ining nagahatag sing kabuhi nga mga magasin sa Mayo? (Juan 17:3) Ayhan ang masunod nga mga panugda mangin mabuligon.
3 Kon ginagamit ninyo ang nagabukas nga mga artikulo sang Mayo 15 nga “Lalantawan,” ayhan makasiling kamo:
◼ “Ginapakighambal namon sa mga tawo ang nahanungod sa pinakamabakal nga libro sa kalibutan. Nakahibalo ka bala kon ano ini? [Pasabta sia.] Huo, ini amo ang Biblia. Ang rason kon ngaa madamo gid nga mga tawo ang nagbakal sang Biblia masapwan sa 1 Timoteo 3:16.” Sa tapos mabasa ang teksto, ipadaku ang mga punto sa isa sang mga artikulo.
4 Ukon pagkatapos sang malip-ot nga introduksion, ayhan masiling ninyo ini:
◼ “Ayhan natalupangdan mo nga ginakabalak-an sa bug-os nga kalibutan ang mga problema nga ginaatubang sang kabataan. Ano nga mga problema nga nakita mo sa inyo lugar ang ginakabalak-an mo?” Pasabta sia. Ipakita ang pila sa serioso nga mga problema nga ginaatubang sang kabataan subong sang ginhinun-anunan sa nagabukas nga mga artikulo sang Mayo 8 nga Awake!, kag ipakita ang solusyon nga ginahatag sang Ginharian sang Dios.
5 Sa inyo rekord sang mga pagduaw liwat, ayhan may listahan kamo sadtong nagpakita sing diutay nga interes sa primero. Mahimo ninyo magamit ini nga listahan sa pagtigayon sing isa ka ruta sa magasin. Kon makita ninyo ang isa ka artikulo nga ayhan makagalanyat sa isa ka partikular nga tawo, pat-ura nga duawon ina nga indibiduwal kag itanyag ang magasin.
6 Dipormal nga Pagpanaksi: Isa ini ka ekselente nga paagi sa pagpukaw sing interes sa magasin. Ang makagalanyat sa mata nga mga panghapin mahimo nga bastante na sa pagsugod sing paghambalanay. Isa ka utod nga babayi ang nagbutang sang pila ka mga guwa sa iya lamesa agod makita ini sang iya nagalabay nga mga kaupod sa trabaho; nakapahamtang sia sing pila. Magdala sing pila ka kopya, kag itanyag ini karon nga bulan kon nagapamalaklon, nagakadto sa eskwelahan, ukon nagasakay sa bus.
7 Paagi sa bulig sang Ang Lalantawan kag Magmata!, nasapwan naton ang mga sabat sa importante nga mga pamangkot nahanungod kay Jehova kag sa iya pagsimba. Luyag naton gamiton ining mga balasahon sa tanan nga posible nga paagi sa pagbulig sa iban nga makilala “si Jehova nga Dios sang kamatuoran.”—Sal. 31:5.