Nagasab-ug Bala Kamo sing Bugana?
1 Si apostol Pablo nagsiling sa 2 Corinto 9:6: “Ang nagasab-ug sing halushalos magaani man sing halushalos; kag ang nagasab-ug sing bugana magaani man sing bugana.” Matuod ini ilabi na sa aton pagsimba. Kon mas madamo nga tion kag panikasog ang ginahinguyang naton sa paghanda para sa mga miting kag sa pagbantala sang mensahe sang Ginharian, mas labi kita nga magatubo sa espirituwal. Apang kon haluson ukon indi kita bug-os sa aton ginahimo, ang aton pag-uswag mangin mas mahinay. Nagasab-ug bala kamo sing bugana?
2 Personal nga Pagtuon sa Biblia: Agod mangin mabungahon nga mga ministro, dapat kita anay magsab-ug sing bugana sa aton personal nga pagtuon. (Sal. 119:97, 105; Mat. 5:3) Bangod sang tanan nga kabalaka sa adlaw-adlaw nga pagkabuhi, dapat gid kita manikasog nga mangin mahunahunaon sa aton espirituwal nga mga kinahanglanon. Masami ini nagakinahanglan nga ‘himuslan ang nagakaigo nga panahon.’ (Efe. 5:16) Ang iban nagabugtaw sing temprano sa pat-od nga mga adlaw ukon nagapain sang pila ka gab-i para sa personal nga pagtuon. Sa anong paagi kita nagaani sing bugana? Matigayon naton ang mas mabakod nga pagtuo, mas masanag nga paglaum, kag mas malipayon nga panghunahuna.—Roma 10:17; 15:4; 1 Ped. 1:13.
3 Mga Miting sa Kongregasyon: Sa Salmo 122:1, si David nagsiling: “Nagkasadya ako sang nagsiling sila sa akon: ‘Magkadto kita sa balay ni Jehova.’” Amo man bala sina ang imo balatyagon? Ang pagsab-ug sing bugana nagakahulugan sang regular nga pagtambong sa aton lima ka semanal nga mga miting. Mamat-od nga indi ninyo pagtugutan ang malain nga paniempo sa pag-upang. Kon mas madamo nga sablag ang ginalandas naton, mas daku ang mga pagpakamaayo sa aton.
4 Mag-abot sing temprano kag makigbahin sa makapalig-on nga paghambalanay upod sa inyo mga kauturan. Maghanda sing maayo para sa Pagtinuon sa Lalantawan agod makasab-ug kamo sing bugana paagi sa pagkomento. Paagi sa “pagbunyag sing hilway” sa iban sa mga miting, kamo man ‘pagabunyagan sing hilway.’—Hulu. 11:25.
5 Ministeryo sa Latagon: Kon mas madamo nga tion ang ginahinguyang naton sa ministeryo sa latagon, mahimo gid nga magaani kita sing makawiwili nga mga eksperiensia, mabungahon nga mga pagduaw liwat, kag mapatubason nga mga pagtuon sa Biblia.
6 Ang bugana nga pagsab-ug nagakahulugan sang pagpauswag sang kalidad subong man sang kadamuon. Ang isa ka maayo nga bulig sa pagpauswag sang kalidad sang aton ministeryo amo ang Reasoning nga libro. Ginalista sa pahina 9-15 ang kapin sa 40 ka introduksion nga nagatuptop sang 18 ka topiko nga nagabulig sa pagpukaw sing interes sa mga ganhaan. Kon makasapo kamo sing interes, pat-ura nga balikan ini kag aniha ang bunga sang inyo pagsab-ug. Ginalauman nga ang inyo mga panikasog magadul-ong sa isa ka pagtuon sa Biblia.
7 Kon nagasab-ug kita sing bugana, mapaabot naton ang daku pa nga mga pagpakamaayo gikan kay Jehova.—Mal. 3:10.