Mangin Mahunahunaon sa Magasin sa Oktubre
1 Ang Lalantawan kag Magmata! nagaunod sang makapalig-on nga mensahe sang dayon nga maayong balita. Ang mangin mahunahunaon sa magasin nagakahulugan sang pagbasa sini sing mahalungon agod tan-awon kon paano ang mga artikulo mahimo makaganyat sa mga tawo sa aton teritoryo.
2 Una, mangin pamilyar sa mga artikulo nga ginapadaku sa panghapin. Ang mga ilustrasyon mismo sa panghapin masami nga nagapahulag sa tagbalay nga batunon ang mga magasin. Pilia ang mga artikulo nga makaganyat sa mga tawo sa inyo teritoryo. Ang kalabanan bala nga mga tawo may palareho nga relihiosong pagtuo? Ano ang panguna nila nga mga ginakabalak-an? Ginahunahuna ini nga mga punto, makahanda ikaw sing epektibo nga presentasyon. Talupangda ang mga nabalay sa idalom.
3 Kon nagatanyag sang Oktubre 1 nga “Lalantawan,” mahimo mo ipadaku ang artikulo nga “Ang Biblia—Ano ang Matuod nga Kapuslanan Sini?” Mahimo mo isiling:
◼ “Makasapo ikaw sang isa ka Biblia sa madamo nga puluy-an sa aton komunidad. Madamo sa ila ang nagapati nga nagaunod ini sang pila ka butang nga may pinasahi nga kapuslanan.” Nian mahimo ka mamangkot: “Ano sa banta mo ang nagahimo sa Biblia nga pinasahi?” Pagkatapos makasabat ang tagbalay, mahimo ka makasiling: “May madamo sing ebidensia nga nagapamatuod nga ang Biblia gin-inspirar sang Dios kag isa ka masaligan nga tuytuy para sa aton. Nagaunod ini sing ihibalo nga makadul-ong sa aton sa kabuhi nga walay katapusan. [Basaha ang Juan 17:3.] Madamo nga tawo ang nagatahod sini apang indi kahibalo kon paano ini gamiton. Ginapaathag sining artikulo sa Ang Lalantawan kon paano mo magamit sing personal ang Biblia sa pagpangita sing mga sabat sa imo mga pamangkot tuhoy sa palaabuton.” Ipaathag ang kahimusan sa pagsuskriber kag itanyag ini sa tagbalay.
4 Nagagamit sang Oktubre 15 nga “Lalantawan,” mahimo pasulabihon mo ang isa ka simple nga introduksion kaangay sini:
◼ “Ang halos tanan napatyan sang isa ka hinigugma. Ini nga artikulo nagapautwas sang pamangkot: ‘Ano ang Kahimtangan sang Patay?’ Ano sa banta mo ang nagakatabo kon mapatay ang isa ka tawo? [Pasabta sia.] Kon luyag mo mahibaluan kon paano ginasabat sang Biblia ina nga pamangkot, luyag ko ibilin sa imo ini nga kopya sang magasin. Subong man, sarang mo mabaton sing regular ini nga magasin paagi sa isa ka suskripsion.”
5 Ginausisa sang Oktubre 22 nga “Awake!” ang isa sang madamo nga ebidensia nga nagapakita sang kapaslawan sang butig nga relihion. Nagagamit sang mga artikulo sa “When Religion Takes Sides in War,” mahimo ka makapamangkot:
◼ “Kon yari diri karon si Jesus, ano sa banta mo ang iya pagabatyagon tuhoy sa tanan nga kasingki sa palibot naton? [Pasabta sia.] Gintudluan kita ni Jesus nga higugmaon ang tanan, bisan ang aton mga kaaway. Apang, madamo nga relihion nga nagapangangkon nga mga Cristiano ang nagadampig sa politikanhon nga mga inaway. Ano sa banta mo ang epekto sina sa mga tawo nga luyag magkabuhi nahisuno sa ginpanudlo ni Jesus? [Pasabta sia.] Ginahinun-anunan sining isyu sang Awake! inang makatulublag nga pamangkot kag ginapaathag kon paano igaaman sang Ginharian sang Dios ang sabat.”
6 Tinguhai nga itanyag ang mga magasin sa tagsa ka balay, bisan pa kon indi ikaw makahinun-anon sa Biblia. Huo, mangin mahunahunaon sa magasin sa Oktubre!