Ang Sibu-sa-Tion nga Kingdom News nga Ipanagtag sa Bug-os nga Kalibutan
1 Sa Domingo, Abril 23, isa ka pinasahi nga pamulongpulong publiko ang igahatag nahanungod sa talalupangdon nga tema nga “Ang Katapusan sang Butig nga Relihion Malapit Na.” Pagkatapos sang miting sina nga adlaw, ang apat-ka-pahina nga Kingdom News ipaguwa. Ang sibu-sa-tion nga mensahe nga ginaunod sini igapanagtag sa bug-os nga kalibutan sa sulod sang tatlo-ka-semana sugod sa Abril 24 tubtob sa Mayo 14.
2 Sa tanan nga bahin sang kalibutan, ang mga tawo ginaligban kag ginasit-an sing mga problema. Pat-od gid nga yadtong nabalaka sa mga nagakatabo maganyat sa Kingdom News, kay magatuytoy ini sa ila sa Pulong sang Dios subong ang wala nagasayop nga tuburan sang panuytoy para sa tawo. (Sal. 119:105) Kita tanan nagalaum nga makakuha sing isa ka kopya sang Kingdom News kon ipaguwa ini sa Abril 23. Samtang karon, madamo ang dapat himuon bilang paghanda para sa sining maid-id nga tatlo-ka-semana nga kampanya.
3 Palig-una ang Tanan nga Makigbahin sing Makugi: Sin-o ang makapakigbahin sa hilikuton? Pat-od gid nga nalangkag makigbahin ang tagsatagsa nga isa na ka manugbantala! Kamusta naman ang mga estudyante sang Biblia nga nagatambong sing tayuyon sa mga miting sa kongregasyon? Ang iban madugaydugay na nga nagapakigbuylog sa aton kag padayon nga nagauswag. Kon ginpahisanto nila ang ila kabuhi sa mga prinsipio sang Kasulatan, kalipikado bala sila nga pagaisipon subong mga manugbantala sang Ginharian? Mahimo ipaathag sang manugbantala nga nagadumala sing pagtuon sa Biblia ang nahanungod sini sa estudyante, kag kon luyag niya makigbahin sa pag-alagad sa latagon, repasuhon sa iya sang duha ka gulang ang materyal sa mga pahina 98 kag 99 sang libro nga Organisado sa Pagtuman sang Aton Ministeryo. Dapat ini himuon sa gilayon agod yadtong kalipikado mangin dibawtismado nga mga manugbantala makapakigbahin sing lubos sa kampanya. Ang mga estudyante sang Biblia nga indi pa kalipikado mangin dibawtismado nga mga manugbantala mahimo gihapon mapalig-on nga ipaambit ang tract sa mga kakilala ukon sa mga katapo sang pamilya.—Tan-awa man Ang Lalantawan, Nobiembre 15, 1988, pahina 17, parapo 8.
4 Ini nga hilikuton indi mabudlay; ang tanan mahimo makapakigbahin. Sa ila semanal nga pangpamilya nga pagtuon, mahimo ilakip sang mga ginikanan ang mga sesyon sa pag-ensayo sa tract agod ang tanan nga mga katapo sang pamilya mangin handa sa pagtanyag sang Kingdom News sa balay-balay. Ang simple nga presentasyonc amo sa masami ang labing maayo. Pagkatapos sang malip-ot nga introduksion, itanyag ang Kingdom News sa tagbalay, kag palig-una sia nga basahon ini. Kon magpakita sing interes ang mga tagbalay, irekord ini agod makabalik ka sa pagpalambo sang interes. (1 Cor. 3:6, 7) Ang yabi sa kadalag-an amo ang simple kag nahanda sing maayo nga presentasyon.
5 May ‘madamo nga himuon’ sa Abril kag Mayo. Sa guwa sang Ang Aton Ministeryo sang Ginharian sa masunod nga bulan, ihatag ang dugang nga impormasyon sa suplemento nga natig-uluhan “Madamo sing Ginahimo sa Buluhaton sang Ginuo.”—1 Cor. 15:58.