Pagtanyag Sing Maayong Balita Nga May Pagkahilingagawon

¹ Ginapakita naton ang aton tudok nga apresasyon sa mga saad sang Ginharian sang Dios paagi sa bug-os tagipusuon nga pagpakigbahin sa Cristianong ministeryo. Dapat kita makigbahin sa sining hilikuton nga may pagkahilingagawon. Ngaa? Bangod ang mga manugpangabudlay diutay lamang, ang katapusan sining malauton nga sistema sang mga butang malapit na, kag ang kabuhi sang mga tawo sa aton teritoryo nadalahig. (Ezeq. 3:​19; Mat. 9:​37, 38) Paano naton mapakita ang pagkahilingagawon sa aton hilikuton sa latagon? Paagi sa abanse nga paghanda sing maayo nga mga presentasyon, paagi sa pagpangita sa mga tawo bisan diin man sila makita, paagi sa paghupot sing rekord sang tanan nga nagpakita sing interes kag sa pagbalik gilayon agod mapalambo ina nga interes. Ang masunod nga mga panugda mahimo nga makabulig samtang ginatanyag naton ang maayong balita nga may pagkahilingagawon sa Pebrero. Ang tanyag amo ang Creation nga libro.

² Mahimo nimo masugdan ang isa ka paghambalanay paagi sa paghinambit sa malip-ot sang pila ka problema sa komunidad, kag nian makasiling ka:

◼ “Madamo nga tawo ang nagapati nga may Dios, apang nagapamangkot sila: ‘Ano bala nga sahi sang palaabuton ang luyag niya para sa amon?’ Paano mo ina sabton? [Pasabta sia.] Nakahibalo ka bala nga ginapaathag sing maayo sang Biblia ang kabubut-on sang Dios para sa katawhan kag ang mga tikang nga ginahimo niya agod matuman ini?” Buksi ang pahina 239 sa Creation nga libro. Basaha ang Bugna 21:4 sa parapo 13. Ipakita ang mga larawan sa pahina 237 tubtob 239 agod ipaathag kon ano ang kahulugan sini para sa aton palaabuton. Itanyag ang libro. Maghimo sing kahimusan nga makabalik sa kombeniente nga tion agod mapadayon ang paghambalanay.

³ Mahimo nga masundan mo ang nagligad nga paghambalanay sa Bugna 21:4 paagi sining malip-ot nga presentasyon:

◼ “Sadtong nagligad ko nga pagduaw, ginhambalan naton ang tuhoy sa saad sang Dios nga maghanda sing bag-ong dutan-on nga katilingban para sa katawhan. [Ipatalupangod liwat ang larawan sa pahina 237 sa Creation nga libro.] Luyag mo bala makita ang imo pamilya nga nagaagom sining makalilipay nga mga kahimtangan? [Pasabta sia.] Ang pamangkot amo, Daw ano ka masaligan ang mga saad sang Dios? Talupangda palihug ang ginsiling niya.” Basaha ang Bugna 21:​5, 6a. Ihatag ang naimprinta nga pamangkot para sa parapo 13 kag 14 sa pahina 239, kag basaha ang sabat. Hinambiti ang tanyag nga walay bayad nga pagtuon sa Biblia. Maghimo sing kahimusan nga ipasundayag ini sa ulihi.

⁴ Sanglit madamo ang nabalaka tuhoy sa nagadugang nga mga problema sang katawhan, mahimo nga masiling mo ang subong sini sa nahauna nga pagduaw:

◼ “Ang tanan nga nasugilanon ko nabalaka tuhoy sa aton mga problema sa aton komunidad. [Hinambiti ang pila.] Sa sulod sang mga dekada ang mga politiko nanaad nga lubaron ini, kag ang pila nagtilaw nga himuon ini. Ano sa banta mo ang mga rason nga ang mga kahimtangan padayon nga nagalala? [Pasabta sia.] Ginapaathag sang Biblia nga ini bangod nagakabuhi kita sa katapusan sang sistema sang mga butang.” Basaha ang Mateo 24:3 gikan sa pahina 223, parapo 20 sang Creation nga libro, nian basaha ang mga tig-ulo sa parapo 22-27 sa pahina 224 kag 225 kag pamangkuta ang tagbalay kon nagaugyon sia nga nagakatabo ini karon. Itanyag ang libro kag maghimo sing kahimusan nga makabalik kag mahambalan kon paano lubaron sang Dios ang mga problema sang katawhan.

⁵ Kon nanaad ka nga magbalik agod ipaathag ang solusyon sang Dios para sa mga problema karon, mahimo nga tilawan mo ini nga paagi:

◼ “Nanikasog gid ako nga makabalik agod mapadayon naton ang aton paghambalanay tuhoy sa matuod nga solusyon para sa mga problema sang katawhan. Sadtong nagligad ko nga pagduaw, nahangpan naton nga ginapakilala sang Biblia ang aton tion subong ang katapusan sang sistema sang mga butang. Ano ang kahulugan sini para sa aton? Nagakahulugan ini nga dulaon sang Dios sa dili madugay ang bug-os malauton nga sistema kag buslan ini sing bag-o.” Basaha kag ipaathag ang Bugna 21:​1, 4. Paagi sa paggamit sa larawan sa pahina 4-5 sang Ihibalo nga libro, ipakita kon ano ang mangin mga kahimtangan kon ang bag-ong sistema yari na. Magtanyag sing pagtuon sa Biblia kag tinguhai nga masugdan ini sa gilayon.

⁶ Bangod madamo katama nga tawo ang interesado sa palibot, mahimo nga masiling mo ang kaangay sini sa pag-umpisa sing isa ka paghambalanay:

◼ “Nakita naton nga halos ang tanan nabalaka tuhoy sa polusyon sa aton hangin, tubig, kag kalan-on. Sa pila ka pungsod ang kahimtangan sang palibot makatalagam na. Sanglit ang Dios amo ang Manunuga sang duta, ano sa banta mo ang himuon niya tuhoy sini? [Pasabta sia.] Ang Biblia nagasiling nga ang Dios makighusay sa kon paano naton ginagamit ang planeta. [Basaha ang Bugna 11:​18b.] Handurawa lamang ang magkabuhi sa isa ka duta nga hilway sa tanan nga polusyon!” Ipakita ang saad sang Dios tuhoy sa isa ka paraiso, subong sang ginapakita sa Bugna 21:​3, 4. Ipakita ang larawan sa pahina 237 sa Creation nga libro. Itanyag ang libro kag maghimo sing kahimusan sa pagbalik.

⁷ Kon nagabalik sa isa nga nagpakita sing interes sa Paraiso nga duta, mahimo ka makasiling:

◼ “Sadtong nagligad ko nga pagduaw, nag-ugyon kita nga agod malubad ang problema sang nadagtaan nga duta, ang Dios magapasilabot sa ginahimo sang tawo. Apang ang pamangkot amo, Ano ang dapat naton himuon agod makalampuwas pasulod sa matarong nga bag-ong kalibutan sang Dios?” Basaha ang Juan 17:⁠3. Agdaha ang tagbalay nga himuslan ang aton wala bayad nga kurso sa pagtuon sa Biblia agod matigayon ining pinasahi nga ihibalo.

⁸ Daw ano nga pribilehiyo nga gamiton subong modernong-adlaw nga mga mangangani kag himuon ang nagaluwas-kabuhi nga hilikuton sa pagbantala! Kabay nga kita tanan magpabilin nga masako sa pagtanyag sing maayong balita nga may pagkahilingagawon, ‘nakahibalo nga ang aton pagpangabudlay indi walay pulos.’​—⁠1 Cor. 15:⁠58.