Buligi ang Iban sa “Pagtuman sang mga Butang nga Nasulat”
1 Indi bastante nga ‘pamatian’ ang mga pulong sang mga tagna sa Bugna. Agod makabenepisyo sing lubos, dapat ‘tumanon’ sang isa kon ano ang nasulat. (Bug. 1:3) Ang pagpahamtang sing literatura nahauna lamang nga tikang padulong sa paghimo sing mga disipulo. Sa tion nga masapwan naton yadtong handa mamati, dapat kita magbalik sa gilayon agod buligan sila nga makatuon sing dugang pa. Ano ang isiling naton sa aton pagduaw liwat?
2 Kon ginhambalan ninyo ang nahanungod sa simbuliko nga apat ka manugkabayo sa imo nahauna nga pagduaw, mahimo nimo sugdan ang inyo paghambalanay sa sining paagi:
◼ “Ginhambalan naton sang nagligad ang nahanungod sa pagsakay sang simbuliko nga ‘apat ka manugkabayo nga magaresulta sa daku nga kasingki kag kalisdanan sa duta. Nakita naton ini nga nagakahanabo sa atubangan mismo sang aton mga mata. Madamo ang nagapalibog kon san-o matapos ining kalisdanan agod maagom naton ang kabuhi sa mahidaiton nga kalibutan. Ano ang imo opinyon? [Pasabta sia.] Ang mga disipulo ni Jesus interesado sa sabat sa sining pamangkot.” Basaha ang Mateo 24:3, diin ginpautwas ang pamangkot, kag nian ang Mat 24 bersikulo 34, diin ginhatag ni Jesus ang sabat.
3 Kon ginhambalan ninyo ang Ginharian sang Dios sa nahauna nga pagduaw, mahimo ka magpadayon paagi sa pagpamangkot:
◼ “Sa opinyon mo, anong sahi sang gobierno ang ginakinahanglan agod mapaayawan ang tanan nga mga kinahanglanon sang katawhan? [Pasabta sia. Basaha ang Jeremias 10:23.] Subong sang nakita mo, wala gid gintuyo sang Dios nga dapat tuytuyan sang tawo ang iya kaugalingon nga mga hilikuton. Ang mga pagtinguha nga himuon ina nga wala sing bulig sang Dios amo ang kabangdanan sang kalabanan nga mga problema naton. Ang Ginharian sang Dios amo lamang ang gobierno nga makaaman kon ano ang aton ginakinahanglan.” Buksi ang pahina 230 sa Reasoning nga libro, kag ipaathag ang mga kasulatan sa ubos sang nahaunang subtitulo. Maghimos nga padayunon ang paghambalanay sa masunod nga semana.
4 Ayhan luyag mo tilawan ini sa pagsugod sing Makasulatanhon nga paghambalanay:
◼ Ipakita ang ilustrasyon sa pahina 302 sang Revelation nga libro, kag ipaathag: “Maagom sang katawhan ining mga kahimtangan kon ang kabubut-on sang Dios ginahimo sa duta subong sang sa langit. Apang, nahadlok ang iban nga basi magabalik liwat ang malain nga mga kahimtangan. Mangin imposible ina bangod ang tanan nga mga malauton pagadulaon.” Basaha ang Salmo 37: 10, 11. Agdaha ang tagbalay nga himuslan ang aton programa sa pagtuon sang Biblia agod makatuon sing dugang pa.
5 Kon nabilin mo ang tract nga “Kabuhi sa Mahidaiton nga Bag-ong Kalibutan”:
◼ Mahimo nimo matudlo ang ilustrasyon sa panghapin kag nian basahon ang parapo 1 sa ubos sang tig-ulo nga “Kabuhi sa Bag-ong Kalibutan sang Dios.” Nian magsiling: “Kon luyag naton magpuyo sa kalibutan nga kaangay sina, may importante nga butang nga dapat naton himuon.” Basaha ang katapusan nga parapo, kag itanyag ang Revelation nga libro.
6 Sanglit ang aton tulumuron amo ang magsugod sing mga pagtuon sa Biblia, mag-iskedyul sing tion para sa mga pagduaw liwat, kag maghanda sing maayo. Sa sining paagi mabuligan gid naton ang mga bunayag sing tagipusuon.—Bug. 22:6, 7.