Ang Lalantawan kag Magmata!—Mga Magasin Para sa Aton Hilingagawon nga mga Tion!
1 Samtang nakita naton kon ano ang nagakahanabo sa palibot naton sa kalibutan kag subong man sa sulod sang teokratikong organisasyon, maapresyar naton kon daw ano ka hilingagawon nga ibantala naton ang “maayong balita” sang Ginharian. (Mar. 13:10) Nagahatag ini sa aton sing rason nga himuon ang aton ministeryo nga may kakugi sa bulan sang Abril.
2 Ang importansia sang aton mensahe ginapadaku sa pinasahi nga hilikuton nga pagahimuon naton sini nga bulan. Malangkagon naton nga ginahulat ang pagpaguwa sa Kingdom News nga igapanagtag naton sa Abril kag Mayo. Agod mapalig-on ang aton kapagsik para sa sining hilikuton, Ang Lalantawan kag Magmata! magaunod sing mga artikulo nga nagapadaku sang matagnaon nga kahulugan sang mga hitabo sa kalibutan. Paano kita makahanda sing isa ka presentasyon nga magapukaw sang interes sa mga magasin?
3 Ayhan makahimo ikaw sing isa ka epektibo nga presentasyon paagi sa pagsunod sining tatlo ka sadsaran nga mga tikang: (1) Magpili sing artikulo sa isa sang mga magasin nga magaganyat sa mga tawo sa inyo komunidad. (2) Magpili sing isa ka pinamulong ukon isa ka kasulatan sa sining artikulo nga magapukaw sang interes sang tagbalay. (3) Maghanda sing malip-ot nga presentasyon nga nagalakip sang mainabyanon nga panamyaw, isa ka pamangkot ukon pinamulong nga nagapadaku sang isa ka Makasulatanhon nga panghunahuna, kag hanuot nga imbitasyon nga magsuskriber. Subong sang makita mo, indi ini mabudlay himuon. Ngaa indi maghanda sing isa ka presentasyon upod sa isa pa ka manugbantala nga kaupod mo sa ministeryo?
4 Sanglit ang Abril 22 nga “Awake!” nagabangon sang pamangkot, “Are These the Last Days?,” sarang mo marepaso ang materyal sa ubos sang tig-ulo nga “Last Days” sa pahina 13 sang Reasoning nga libro. Mahimo ka makasugod paagi sa pagsiling:
◼ “Nagaduaw kami agod ipaathag ang kahulugan sang magamo nga mga hitabo sa palibot naton. Talupangda kon ano ang ginasiling sini nga artikulo . . . ”
5 Ang Abril 1 nga “Lalantawan” nagapautwas sang pamangkot: “Relihion—Isa Bala ka Ginadilian nga Tema?” Kon nagatanyag sing suskripsion, mahimo ka makasiling:
◼ “Masunson ginasiling nga ang relihion amo ang isa ka tema nga indi dapat hambalan bangod tuman ini ka balaisan. Ano ang panghunahuna mo nahanungod sina?” Nian patuhuyi ang isa ka pinamulong sa artikulo.
6 Mahimo nimo gamiton ang Abril 15 nga “Lalantawan” nga may artikulo nga “Matigayon Bala ang Relihiosong Kamatuoran”? Ayhan makatigayon ka sing maayo nga sabat paagi sini nga introduksion:
◼“Bangod madamo katama ang mga relihion karon, ang iban nga mga tawo nagapalibog kon bala matigayon ang relihiosong kamatuoran. Ginapakita sini nga artikulo nga ikaw kag ako sarang makasapo sing makaalayaw nga sabat sa sining pamangkot. . . . ”
7 Samtang nagahinampot ang katapusan, kabay nga dugangan naton ang aton mga panikasog nga buligan ang mga tawo nga makapalagyo gikan sa Babilonya nga Daku. (Bug. 18:4) Ang Lalantawan kag Magmata! may yara importante nga papel sa sining indi-na-gid-maliwat nga hilikuton.