Pinasahi nga Kingdom News Para sa Tanan
1 Sugod sang Abril 24, ginpanagtag naton ang pinasahi nga Kingdom News nga nagpukaw sa interes sang mabinalak-on nga mga tawo bisan diin! Ang mensahe sini indi lamang suno-sa-tion kundi hilingagawon man. Handum sang mga manugbantala sa tanan nga kongregasyon nga mapalab-ot ining mensahe sa linibo ka tawo. Nagapanikasog ka bala nga makapakigbahin sing bug-os?
2 Ang tagsa ka kongregasyon ginpadalhan sing bastante nga suplay sing Kingdom News. Pila na ang imo napanagtag? Kon diutay pa lang ang imo napanagtag sangsa ginlauman mo, mahimo mo bala ang labi pa antes matapos ang pagpanagtag sa Mayo 14? Ano abi kon mag-auxiliary payunir ka?
3 Magarepaso ang mga gulang kon bala matuptupan ang tanan nga teritoryo sa Mayo 14. Kon indi, dapat magpabulig ang mga gulang sa kaingod nga mga kongregasyon. Dapat ini matapos paagi sa aton bug-os tagipusuon nga mga panikasog, lakip na ang maayo nga kooperasyon sa ulot sang mga kongregasyon.
4 Ayhan nalipay ka sing daku sa sining hilikuton bangod madamo katama ang nakigbahin, lakip na ang bag-ong mga manugbantala kag mga pamatan-on. Kabay kuntani nga ining espiritu sang kalipay magapadayon, nga nagapalig-on sa tanan nga duawon liwat yadtong mga nagbaton nga may kahamuot. Ginlaygayan kita nga maghimo sing husto nga house-to-house record, nagalista sadtong mga nagpakita sing interes. Ang naulihi nga bahin sang Mayo mahimo mangin isa ka maayong tion sa paghimo sing mga pagduaw liwat nga may tulumuron nga makasugod sing bag-ong mga pagtuon.
5 Ano ang aton isiling sa pagbalik naton? Ayhan masapwan mo nga epektibo ang magsiling: “Ayhan madumduman mo ang tract nga ginbilin ko sa imo sining karon lang; ginalauman ko nga nabasa kag nabinagbinag mo na ini. Ang mensahe sini pat-od gid nga ginbaisan sa aton komunidad, kay nagahinun-anon ini tuhoy sa importante nga mga hulusayon nga nagaatubang sa bug-os nga katawhan.” Patuhuyi ang pila ka nagapahunahuna nga mga dinalan sa ikaduhang pahina, kag nian mamangkot: “Ano sa banta mo ang kinahanglan naton nga himuon agod mapat-od naton nga nakahanda kita sa kon ano ang dalhon sang palaabuton?” Pasabta sia. Kon may interes, ipaathag ang iban pa nga mga punto sa pahina 2-4 sang Kingdom News, kag magtanyag sing isa ka pagtuon sa Biblia.
6 Kon nagapangabudlay ikaw sa teritoryo sang iban nga kongregasyon, pat-ura nga ihatag sa kongregasyon ang mga ngalan sang bisan sin-ong mga interesado nga nakita mo agod maduaw liwat sila sang mga manugbantala sina nga kongregasyon.
7 Ang pinasahi nga pagpanagtag sining Kingdom News nagpukaw sing kakunyag kag nagpahulag sa aton tanan nga dugangan ang aton mga panikasog sa pagbantala sang Ginharian nga hilikuton. Makasalig kita nga magamadinalag-on gid ini, nagadugang sang ihibalo sang tawo bisan diin nahanungod sa dakung ngalan kag katuyuan ni Jehova. (Isa. 12:4, 5) Kon mas madamo ang aton mahimo, mangin mas daku ang aton kalipay.—Sal. 126:3.