Tatapa Ang Interes Sa Kingdom News
1 Sining Nagligad Nga Pila Ka Semana, Nalipay Kita Sa Pribilehiyo Nga Mapanagtag Ang Kingdom News Num. 35, Nga Natig-uluhan “Magahigugmaanay Pa Ayhan Ang Tanan Nga Tawo?” Ang Mga Manugbantala Bisan Diin Nagapanikasog Nga Mapalab-utan Ang Madamo Nga Takus Kon Mahimo Sini nga Guwa Sang Kingdom News. (Mat. 10:11) Walay Sapayan Nga Ang Kampanya Natalana Nga Matapos sa Domingo, Nobiembre 16, Kon May Dugang pa Nga Teritoryo Nga Dapat Tuptupan, Ayhan pangabayon Kamo Sang Mga Gulang Nga Padayunon Ang Pagpanagtag Sing Kingdom News Num. 35 Tubtob Maubos Ang Suplay Sang Kongregasyon. 2 Ini Nga Guwa Sang Kingdom News Nagpukaw Sa Interes Sang Madamo Nga Tawo. Nakita Nila Nga Sa Kabilugan Ang Mga Tawo Wala Na Sing Kinaugali Nga Pagpalangga Kag Busa Nagapalibog Kon Ano Ang Nagahulat Sa Palaabuton. (2 Tim. 3:3) Luyag Naton Tatapon Ang Napukaw Nga Interes.
3 Ang mga Resulta Sang Kingdom News: Sadtong 1995 nga kampanya sa Kingdom News, isa ka tigulang nga utod nga babayi ang nagpadala sing mga kopya paagi sa koreo. Ang isa ka babayi nga nakabaton sing kopya nagtambong sa miting sa Kingdom Hall bangod luyag niya makahibalo sing dugang pa tuhoy sa kon ano ang ginapatihan sang mga Saksi ni Jehova. Sa sadto nga miting ginbaton niya ang isa ka pagtuon sa Biblia kag pagkatapos sadto pirme na sia nagatambong sa mga miting. Wala magdugay, ginsulatan niya ang iya anay simbahan, nga nagahalin sia subong miembro sini!
4 Sa karon, ginatos ka tawo sa teritoryo ang nakabasa sang mensahe sa Kingdom News Num. 35. Apang ano ang ila reaksion sa sini? Bisan pa nga naluyagan gid nila ang ila nabasa, ang kalabanan nagahulag lamang kon duawon sila liwat sang isa sang mga Saksi ni Jehova. Nagaplano bala kamo sa pagbalik? Ang mahigugmaon nga pag-ulikid sa aton isigkatawo dapat magpahulag sa aton sa pagbalik. Ang tanan nga nagpakita sing interes sa Kingdom News dapat liwat duawon.
5 Ano ang Isiling Ninyo sa Inyo Pagbalik? Mahimo kamo makakomento tuhoy sa mensahe sa Kingdom News kag nian magpautwas sing makapahunahuna nga pamangkot. Mamati sing maayo samtang ginapabutyag sang tagbalay ang iya kaugalingon agod mahibaluan ninyo ang iya ginahunahuna. Nian ipatalupangod ang isa ka nagakaigo nga punto sa Ginapatuman nga brosyur, nga ginpakita sa Kingdom News. Kon mamati sia, tinguhai nga sugdan sa gilayon ang isa ka pagtuon sa Biblia.
6 Yari ang pila ka ginapanugda nga mga presentasyon nga matilawan ninyo kon nagabalik sa mga nagpakita sing interes sa “Kingdom News” Num. 35:
◼ “Ayhan nadumduman mo ang naimprinta nga impormasyon nga ginbilin ko sa imo sining karon lang. Ang mensahe sini nagahinun-anon sang importante nga butang nga nagabahinbahin karon sa katawhan—ang kakulang sing gugma para sa iban.” Ipatuhoy ang igtalupangod sa ebidensia nga ginhatag sa pahina 2 sang Kingdom News sa ubos sang tig-ulo nga “Ang Gugma sa Isigkatawo Nagbugnaw.” Nian mamangkot, “Sa banta mo, katuyuan bala sang Dios nga magkabuhi ang katawhan sa sining paagi?” Pasabta sia. Buksi ang leksion 5 sa Ginapatuman nga brosyur, kag tinguhai nga makasugod sing pagtuon sa Biblia.
◼ “Sang una naton nga pagkilalahay, ginbilinan ko ikaw sing pila ka impormasyon tuhoy sa tema ‘Magahigugmaanay Pa Ayhan ang Tanan nga Tawo?’ Sa banta mo, posible bala ina nga kalibutan?” Pasabta sia. Buksi ang leksion 6 sa Ginapatuman nga brosyur, kag basaha ang parapo 6. Nian basaha ang saad sang Dios sa Miqueas 4:3, 4. Kon ang tagbalay interesado, itanyag ang brosyur kag ang isa ka pagtuon.
◼ “Sang nagligad ko nga pagduaw sa imo, nagbilin ako sing balasahon nga natig-uluhan ‘Magahigugmaanay Pa Ayhan ang Tanan nga Tawo?’ Nagatanyag ini sing isa ka walay bayad nga pagtuon sang Biblia sa puluy-an. Nagbalik ako agod ipakita sa imo ang bulig sa pagtuon nga ginagamit namon. [Ipakita ang Ihibalo nga libro.] Ginapaathag sing maayo sining libro ang tion nga ang tanan nga tawo magahigugmaanay, kag ginasabat sini ang iban pa nga mga pamangkot nga mahimo nga ginapaligban mo: Ngaa nagatigulang kita kag nagakapatay? Ngaa ginapahanugutan sang Dios ang pag-antos? Ano ang nagakatabo sa aton napatay nga mga hinigugma? Mahimo ko bala mapasundayag sa imo ang kurso sa pagtuon?” Kon ang tagbalay indi magpasugot, pamangkuta sia kon luyag niya basahon sing kinaugalingon ang libro. Kon luyag niya, itanyag ang isa ka kopya sa iya. Magplano sa pagbalik.
7 Sa tion nga ang teritoryo matuptupan sing maayo sing Kingdom News Num. 35, mahimo naton matanyag ang Ihibalo nga libro sa nabilin nga bahin sang bulan. Ang madamong pinili nga ginpanugda nga mga presentasyon para sa sini nga libro masapwan sa likod nga pahina sang Marso, Hunyo, kag Nobiembre 1996; kag Hunyo 1997 nga mga guwa sang Ang Aton Ministeryo sa Ginharian.
8 Ining pinasahi nga pagpanagtag sing Kingdom News dapat magpahulag sa aton tanan nga dugangan ang aton mga panikasog sa pagbantala nga hilikuton. Sa bulig ni Jehova makasalig kita nga ining kampanya pat-od nga magamadinalag-on, nagabulig sa mga tawo nga mahangpan ang katuyuan sang Dios para sa tanan nga katawhan nga maghigugmaanay. Kabay nga padayon nga pakamaayuhon ni Jehova ang aton makugi nga mga panikasog samtang ginatatap naton ang interes sa Kingdom News.