Si Jehova Nagahatag sing Gahom
1 Subong katawhan ni Jehova, ginhatagan kita sing hilikuton nga ibantala ang maayong balita samtang ginahuptan ang aton paggawi nga “maayo sa tunga sang mga pungsod.” (Mat. 24:14; 1 Ped. 2:12) Bangod sang makahalanguyos nga mga tion subong man sang aton kaugalingon nga mga kaluyahon kag mga kakulangan, indi gid naton mahimo ini nga hilikuton sa aton kaugalingon lamang. (2 Tim. 3:1-5) Daw ano kita ka malipayon nga makapangayo kita sing bulig kay Jehova!
2 Si apostol Pablo nagbatas sing madamong pagtilaw. (2 Cor. 11:23-27) Paano niya ini gin-atubang kag gintapos ang iya gintangdo nga hilikuton? Si Jehova naghatag sa iya sing “gahom nga labaw sa kinaugali.” (2 Cor. 4:7) Ginkilala ni Pablo inang bulig sang Dios sang nagsulat sia: “Sa tanan nga butang may kusog ako bangod sa iya nga nagahatag sing gahom sa akon.” (Filip. 4:13) Si Jehova magabulig man sa aton sa amo nga paagi. Paano naton matigayon ini nga bulig?
3 Paagi sa Pagpangamuyo sa Walay Langan: Si Jesus naglaygay sa aton nga ‘mangayo, mangita, kag manuktok sing padayon,’ kag indi mag-untat. (Luc. 11: 5-10) Ang aton mapinadayunon nga pagpangamuyo nagapakita kay Jehova sang kadalumon kag kabaskugon sang aton handum, kag sang pagkamatinuuron sang aton motibo. (Sal. 55:17; 88:1, 13; Roma 1:9-11) Ginkilala ni Pablo ang importansia sang mapinadayunon nga pagpangamuyo sang ginlaygayan niya kita nga “magpangamuyo sa w alay langan.” (1 Tes. 5:17) Ang pangamuyo amo ang isa sang pangunang mga paagi sa pagtigayon sang bulig ni Jehova.
4 Paagi sa Pagsunod sa Teokratikong Panuytoy: Ang “teokrasya” nagakahulugan sang paggahom sang Dios, nga gugma. Nagalakip ini sang pagbaton sa mahigugmaon nga awtoridad ni Jehova kag sang pagsunod sa iya mga instruksion sa dalagku kag magagmay nga mga desisyon. Ang “matutom kag mainandamon nga ulipon” nagarepresentar sa teokratikong paggahom sa sining duta. (Mat. 24:45-47) Ang pagkooperar sa organisasyon nga ginagamit sang “ulipon” kinahanglanon gid agod matigayon naton ang pagpakamaayo ni Jehova. (Ipaanggid ang Hebreo 13:17.) Padyaan ni Jehova ang aton katutom kag kahanda paagi sa paghatag sang gahom nga ginakinahanglan naton sa nagakaigo nga tion.—Heb. 4:16.
5 Paagi sa Pagpabilin nga Suod sa Aton mga Kauturan: Ang gugma amo ang nagapakilala nga tanda sang mga disipulo ni Jesus. (Juan 13:34, 35) Bangod sang nanuhaytuhay nga mga personalidad, ang mga pagbinangig mahimo nga magautwas sa tunga naton bangod sang personal nga mga pagbinais. Dapat kita mangin mainawaon sing mapinalanggaon; nagapinatawaray sing hilway. (Efe. 4:32) Sa sini magapabilin kita nga suod sa aton mga kauturan sa pagtuo kag mapalig-on sang ila mabakod nga pagbatas sa idalom sang pagtilaw. “Nakahibalo nga ang amo man nga pag-antos ginakinahanglan sa bug-os nga paghiliupod sang [aton] mga kauturan,” may hatag-Dios kita nga kusog sa pagbatu sa kaanggid nga mga pag-ipit.—1 Ped. 5:9.
6 Paagi sa Paghupot sang Maayo nga Rutina sang Personal nga Pagtuon: Ang pagpalig-on sang aton painuino kag tagipusuon sa espirituwal nagabulig sa aton sa pagbatu sa pagsalakay ni Satanas. (1 Ped. 5:8) Ang isa ka iskedyul sang personal nga pagtuon magapauswag sang aton diosnon nga ihibalo. Magamit naton ini sa pag-atubang sa adlaw-adlaw nga mga kabudlayan. Ginpadaku ni Pablo nga ang “sibu nga ihibalo” may importante nga bahin sa pagtigayon sing kaluwasan. (1 Tim. 2:3, 4) Dapat kita tayuyon nga magkuha sing espirituwal nga pagkaon.
7 Ang tanan nga butang nga ginakinahanglan naton agod magpabilin nga mabakod ginaaman paagi sa Cristianong kongregasyon. Ang bug-os tagipusuon nga pagsakdag sa mga hilikuton sini magagarantiya nga “magalakat [kita] kag indi paglapyuon.”—Isa. 40:29-31.