Ang Madinalag-on nga mga Pagduaw Liwat Nagakinahanglan sing Epektibo nga Pagpanudlo
1 Ngaa dapat kita mangin mapisan sa pagduaw liwat sa mga interesado? Ang ngalan ni Jehova nakilal-an paagi sining paghimo-sing-disipulo nga hilikuton, kag ang mga mahinadlukon sa Dios nabuligan sa dalan padulong sa kabuhi. (2 Cor. 2:17–3:3) Ini nga ihibalo dapat magpahulag sa aton nga maghanda sing maayo antes magduaw liwat.
2 Ang maayong manunudlo magabulig sa estudyante sa pagtukod sa sadsaran nga napasad na. Kaangay sang isa ka manunudlo sa eskwelahan nga nagatukod sa ihibalo nga ginatigayon sang mga estudyante sa adlaw-adlaw, sa masami dapat naton tatapon ang aton unang pagduaw paagi sa pagkomento sing dugang pa sa amo gihapon nga topiko.
3 Kon magabalik ka pagkatapos mapahamtang ang brosyur nga “Nagaulikid Gid Bala ang Dios sa Aton?” mahimo mo ini masapwan nga epektibo:
◼ “Sang nagduaw ako sang nagligad, ginhambalan naton ang ‘katapusan nga mga adlaw.’ Ayhan nagapalibog ka kon paano namon nahibaluan nga nagakabuhi na kita sa katapusan nga mga adlaw. (2 Tim. 3:1) Ang mga disipulo ni Jesus nabalaka man nga mahibaluan ini. [Basaha ang Mateo 24:3.] Sa iya sabat, ginlaragway ni Jesus ang mga kahimtangan nga makita naton karon.” Ipakita ang bahin sang tanda nga ginpaathag sa mga parapo 3 kag 4 sa pahina 19. Kon maayo ang sabat, magpadayon sa mga parapo 5-8 sa pahina 20. Magtanyag sa pagbalik,kag sa pagsabat sang mga pamangkot nga ginpautwas sa panghapin sang brosyur.
4 Sa pagtatap sang interes sa brosyur nga “Ano ang Katuyuan sang Kabuhi?-Paano Mo Masapwan Ini?” mahimo ka makasiling:
◼ “Nalangkag gid ako sa pagpadayon sang aton paghambalanay nahanungod sa aton katuyuan sa pagkabuhi. Sa walay duhaduha, nagaugyon kita nga duha nga tuyo sang Dios nga magkabuhi kita sa makalilipay kag mahidaiton nga mga kahimtangan sa-baylo sang kon ano ang ginaagom naton karon. sa banta mo, tumanon bala niya ang iya saad?” Pasabta sia. Basaha ang Isaias 55:11, kag nian ipaathag ang mga parapo 25 tubtob 27 sa pahina 30. Irekomendar ang personal nga pagtuon sa Biblia subong ang labing maayo nga paagi sa pagsapo sang matuod nga katuyuan sa kabuhi.
5 Sa pagtatap sa nagligad nga interes nga ginpakita sa brosyur nga “Agoma ang Kabuhi sa Duta sing Dayon!” mahimo mo ini liwat ipakita kag magsiling:
◼ “Ginhambalan naton ang matahom nga kalibutan nga ginlaragway diri sa sining brosyur; luyag ko isugid sa imo kon ngaa ang pagtuo kay Jesucristo importante katama sa mga tawo nga luyag magkabuhi didto.” Buksi ang larawan 41, kag basaha ang Isaias 9:6. Patuhuyi ang larawan 62, kag basaha ang Juan 3:16, nagapadaku sang pagkakinahanglanon sang pagkamatinumanon. Ipaathag nga ang mga Saksi ni Jehova nagabulig sa mga tawo sa pagpakita sing pagtuo paagi sa pagtuon sa Biblia kag sa pagpanikasog nga magkabuhi nahisuno sini.
6 Pagkatapos sang tagsa ka pagduaw liwat, pamangkuta ang imo kaugalingon: May pila bala ka pat-od nga butang ako nga ginahunahuna nga ihambal? Ginhuptan ko bala ang igtalupangod nga natuon sa Biblia? Nagtukod bala ako sa sadsaran nga ginpasad sa una nga pagduaw? Ang akon bala presentasyon gindesinyo agod magdul-ong sa pagtuon sa Biblia? Ang positibo nga mga sabat nagahatag sing pasalig nga nagapanikasog ikaw nga mangin isa ka maayong manunudlo sang Pulong sang Dios.