Tatapa ang Tanan nga Interes Agod Buligan ang Iban

¹ Kon ang isa magapakita bisan sing diutay nga interes sa mensahe sang Ginharian, luyag naton himuon ang bisan ano nga masarangan naton agod buligan ina nga tawo. Gani nagahimo kita sing mga pagduaw liwat upod ang tulumuron nga mapalambo ang iya interes kag makasugod sing pagtuon sang Biblia sa puluy-an. Paano ini sarang mahimo?

² Kon ginhambalan ninyo sang nagligad ang nahanungod sa paglapnag sang mga problema sa pag-asawahay sa karon kag nagbilin ka sing “Mabuhi sing Dayon” nga libro, sarang mo mabuksan ang inyo paghambalanay sa sining paagi:

◼ “Sang nagligad, ginhambalan naton ang nahanungod sa pag-asawahay kag sa praktikal nga laygay sang Biblia nga makabulig sa aton sa pagsapo sing daku pa nga kalipay. Indi bala matuod nga bisan sa labing maayo nga mga pamilya, nagautwas ang mga problema sa tion kag tion? [Pasabta sia.] Ang Biblia nagahatag sa aton sing pinakamaayong laygay nga makabulig sa aton sa paglubad sang mga problema sa mga kaangtanan sa pamilya. Ang isa ka pamilya sarang mapakamaayo paagi sa pagtuon sing tingob sang Biblia.” Buksi ang pahina 246, parapo 23. Basaha ang Juan 17:​3, kag magtanyag sing bulig sa pamilya agod masugdan ang pagtuon sa Biblia.

³ Kon ginhambalan mo ang nahanungod sa mga kabataan kag sa pagkinahanglan nila sing paghanas, mahimo nimo padayunon ang paghambalanay sa sining paagi:

◼ “Sang nagligad ginhambalan naton ang nahanungod sa espirituwal nga paghanas nga ginakinahanglan sang mga kabataan kag kon paano sila mabuligan sang mga ginikanan. Madamong ginikanan ang nahangawa sa malain nga pagginawi sang tuman kadamo nga mga pamatan-on karon. Ano ang opinyon mo nahanungod sa . . . ? [Magsambit sing isa ka halimbawa sang malain nga pagginawi sang mga pamatan-on nga masunson makita sa inyo komunidad. Pasabta sia.] Ipakita ko sa imo ang pila ka praktikal nga laygay nga ginahatag sa Biblia.” Buksan ang parapo 22 sa pahina 246 sang Mabuhi sing Dayon nga libro, basaha ang Efeso 6:4. Luyag sang kalabanan nga mga kabataan ang disiplina kag panuytoy. Kon ginaaman ini sang mga ginikanan, ang mga kabataan mas malipayon kag mas matinahuron. Ipaathag kon paano naton ginatun-an ang Biblia upod sa aton mga kabataan.

⁴ Kon ang tema sang inyo paghambalanay amo ang Paraiso nga duta, nian mahimo nimo masiling ini agod pukawon liwat ang interes:

◼ “Gintan-aw naton ang pila ka ilustrasyon nga nagpakita sa aton kon ano ang mangin kaangay sang duta kon himuon ini sang Dios nga isa ka paraiso. Diutay lamang ang kahulugan sini sa aton kon indi naton ini maagom upod sa aton mga hinigugma. Nagaugyon ka bala?” [Pasabta sia.] Buksi ang pahina 162 sa Mabuhi sing Dayon nga libro. Basaha ang Bugna 21:​3, 4, kag. ipaathag kon paano ang aton mga hinigugma mahimo mangin pirme nga kaupod. Kon may maayo nga reaksion, basaha ang Juan 5:​28, 29 agod ipakita nga ang mga patay magabalik sa kabuhi. Ipakita ang panghapin sang libro kag magsiling: “Matuod gid ini​—mahimo kita mabuhi sing dayon sa Paraiso sa duta!” Maghimos sing isa pa ka pagduaw.

⁵ Ang katuyuan sang pagduaw liwat amo ang pagbulig sa mga interesado nga makapanginpulos gikan sa mensahe sang Ginharian. Ipatuhoy ang ila igtalupangod sa espesipiko nga mga punto nga may praktikal nga balor sa literatura, nagapadaku kon paano ini makabulig sa ila sa paghangop sing maayo pa sang Biblia. Ang mga pagduaw liwat nga nagatuman sining mga tulumuron magabulig mismo sa iban sa pagpanginpulos sa labing maayo nga paagi.