Tatapa ang Interes nga Imo Nasapwan
1 Kon nagapamalaybalay, limitado lamang ang tion nga ginahinguyang naton upod sa interesado. Ang matuod nga pagpanudlo nga hilikuton ginahimo kon nagaduaw kita liwat kag nagadumala sing mga pagtuon sa Biblia. (Mat. 28:19, 20) Agod makatudlo sing epektibo sa pagbalik naton, dapat naton repasuhon ang ginhambalan naton sa una nga pagduaw kag nian pasangkaron ini.
2 Kon ginhambalan ninyo ang pagkawalay kalig-unan sang kahimusan sang pamilya, mahimo nimo magamit ang kapitulo 29 sang “Mabuhi sing Dayon” nga libro. Ayhan makasiling ka:
◼ “Ginhambalan naton sang nagligad ang kaalam sang pagsunod sa Biblia agod matigayon ang malipayon nga pamilya. Ano sa banta mo ang yabi agod mahiusa ang mga pamilya karon?” Pasabta sia. Patuhuyi ang parapo 27 sa pahina 247, kag basaha ang Colosas 3:12-14. Ipaathag kon paano ang tayuyon nga pagtuon sa Mabuhi sing Dayon nga libro makabulig sa paglubad sa mga problema.
3 Kon ginhambalan ninyo ang nagalain nga mga kahimtangan sa kalibutan sa imo una nga pagduaw, ayhan makasiling ka:
◼ “Ginapakita sang Biblia nga si Satanas amo ang panguna nga kabangdanan sang karon nga mga kahimtangan sa kalibutan. Madamo ang nagapalibog kon ngaa ginpahanugutan sia sang Dios nga magpadayon sing tuman kadugay. Ano sa banta mo?” Pasabta sia. Buksi ang pahina 20, parapo 14 kag 15, sa Mabuhi sing Dayon nga libro, kag ipaathag kon ngaa wala pa ginlaglag si Satanas. Nian basaha ang Roma 16:20.
4 Kon ginhambalan ninyo ang mga pagpakamaayo sa idalom sang pagginahom sang Ginharian, sa imo pagduaw liwat ayhan makasiling ka:
◼ “Ang maayo nga mga pagpakamaayo nga dalhon sang Ginharian sang Dios sa duta kag sa katawhan ginalaragway sa pahina 12 kag 13. Ano ang nakita mo nga nagaganyat sa imo? [Pasabta sia.] Hunahunaa kon mangin kaangay sang ano ang magkabuhi sa isa ka kalibutan nga kaangay sini.” Basaha ang parapo 12. Kon interesado, ipakiana ang pamangkot sa parapo 13, kag hinun-anuni ang sabat. Maghimos nga padayunon ang paghambalanay sa imo masunod nga pagduaw.
5 Ayhan makasugod ka sing pagtuon paagi sa pagsiling:
◼ “Nasapwan sang madamo nga tawo ang mga sabat sa ila mga pamangkot sa Biblia paagi sa paggamit sini nga libro.” Buksi ang mga kaundan, kag mamangkot: “Anong topiko ang makawiwili gid sa imo?” Pasabta sia, buksi ang kapitulo nga nagganyat sang ila interes, kag basaha ang nahauna nga parapo. Ipaathag ang paagi sa pagtuon kag ipakita ini sa kalalangan sang paghinun-anon sa isa ukon duha ka parapo. Maghimo sing mga kahimusan nga magduaw liwat.
6 Ang pagtatap sang interes sa Mabuhi sing Dayon nga libro nagapasundayag sang aton handom nga tumanon sing bug-os ang aton ministeryo. (2 Tim. 4:5) Paagi sa paghimo sini, ginabuligan naton ang aton mga bumalasa sa pagtigayon sing kabuhi nga walay katapusan.—Juan 17:3.