Pirme Madamo sing Himuon
1 Para sa katawhan ni Jehova, pirme may “madamo sing himuon sa buluhaton sang Ginuo.” (1 Cor. 15:58) May semanal nga mga miting nga pagahandaan kag pagatambungan. Ginapalig-on kita nga makigbahin sa ministeryo sa latagon kada semana. Dapat magpain sing tion para sa personal kag pamilya nga pagtuon. Ang mga gulang kag ministeryal nga mga alagad may madamo nga asaynment sa kongregasyon. Kon kaisa ginapangabay kita sa pagbulig sa mga nagakinahanglan. Dugang pa, may mga obligasyon kita may kaangtanan sa aton pamilya, palamugnan, kag eskwelahan.
2 Kon kaisa, ang iban sa aton mahimo magabatyag nga daw natabunan sang tanan nga dapat naton himuon. Apang, ang labing masako nga mga tawo mahimo malakip sa mga labing malipayon kon ang pagkatimbang kag nagakaigo nga pagtamod ginahuptan.—Manugw. 3:12, 13.
3 Si apostol Pablo isa sang may madamo nga buluhaton. Nangabudlay sia sing labaw sa iban nga mga apostoles. Nangabudlay sia sing lakas subong ebanghelisador, kag sa amo man nga tion wala nagpatumbaya sang iya mga responsabilidad subong manugbantay sang panong. Luwas sini nga tanan, gin-atipan niya ang iya personal nga mga kinahanglanon paagi sa pagpangabudlay subong manughimo sing kayangkayang. (Binu. 20:20, 21, 31, 34, 35) Walay sapayan sang iya masako nga iskedyul, si Pablo nalangkag pirme sa paghimo sing labi pa sa pag-alagad kay Jehova.—Ipaanggid ang Roma 1:13-15.
4 Ginhuptan ni Pablo ang iya pagkatimbang kag malipayon nga tagipusuon paagi sa pagsalig kay Jehova para sa kusog. (Filip. 4:13) Nahibal-an niya nga ang Dios indi malipat sang iya binuhatan. (Heb. 6:10) Ang kalipay sa pagbulig sa iban agod makilala si Jehova nagpapagsik sa iya. (1 Tes. 2:19, 20) Ang pagpasalig sang iya pasad-sa-Biblia nga paglaum nagpahulag sa iya nga magpabilin nga mapisan.—Heb. 6:11.
5 Dapat man naton binagbinagon ang maayo nga mga resulta sang aton mga pagpangabudlay. Ang pagpakigbahin naton sa mga miting nagapabakod kag nagapalig-on sa iban. (Heb. 10:24, 25) Ang aton mga panikasog sa paglab-ot sa tanan paagi sa maayong balita nagaamot sa pag-uswag sang kongregasyon samtang ang mga bag-unan nagapakig-upod sa aton. (Juan 15:8) Ang pagbulig sa iban nga nagakinahanglan nagapauswag sang isa ka suod, kaangay sang pamilya nga espiritu sa kongregasyon. (Sant. 1 :27) Dugang pa, indi gid kita dapat malipat nga ang pagkamangin masako sa maayong mga buluhaton kalahamut-an kay Jehova nga Dios. Ginakabig naton nga isa ka daku nga pribilehiyo ang mag-alagad sa iya. Para sa aton wala na sing maayo pa nga dalanon sang kabuhi!
6 May dugang pa nga kapuslanan ang madamo sing buluhaton. Kon masako kita sa espirituwal nga mga butang, ang panahon daw nagaligad sing mas madasig. Sa pagkahibalo nga ang pagligad sang tagsa ka adlaw nagadala sa aton sing suod pa sa bag-ong kalibutan, malipayon naton nga ginabaton ang masako nga pagkabuhi nga ginaagom naton karon. Nahibaluan man naton ang kaalam sang pagpabilin nga masako, tungod sa rason nga mas diutay ang aton tion nga madalahig sa walay pulos nga mga paghimud-os sang kalibutan.—Efe. 5:15, 16.
7 Matuod, may madamo nga himuon sa buluhaton sang Ginuo. Apang makapabilin kita nga malipayon kon padayon kita nga magsalig kay Jehova nga Dios kag kay Jesucristo, nga nagahimo sang aton pag-alagad nga makapapagsik kag makaalayaw.—Mat. 11:28-30; 1 Juan 5:3.