Buligi Sila sa Pag-alagad Liwat
1 Si apostol Pablo nagsulat sa iya mga masigka-Cristiano: “Oras na para sa inyo nga magbugtaw gikan sa katulugon, kay karon ang aton kaluwasan labing malapit na sangsa tion nga nangin mga tumuluo kita.” (Roma 13:11) Nabalaka si Pablo sa iya mga kauturan nga ginatuyo sa espirituwal; nalangkag sia nga ipasag-uli sila sa ginpapagsik nga hilikuton.
2 Masiling gid nga ang kagab-ihon sining daan nga kalibutan madalom na kag ang pamanagbanag sang bag-ong kalibutan malapit na. (Roma 13:12) May rason gid kita nga mabalaka sa aton mga kauturan nga nag-untat sa pagpakig-upod sa aton subong mga manugbantala sang maayong balita. Sang nagligad nga tuig sang pag-alagad, sa Pilipinas lamang, kapin sa 3,000 ka manugbantala ang liwat nga ginpaaktibo. Paano naton mabuligan ang iban pa nga mga diaktibo sa pag-alagad liwat kay Jehova?
3 Kon Ano ang Mahimo sang mga Gulang: Ang kalabanan nga mga diaktibo wala magbiya sa kamatuoran; nag-untat lamang sila sa pagbantala bangod sang pagluya sang buot, personal nga mga problema, materyalismo, ukon mga kabalaka sa kabuhi. (Lucas 21:34-36) Kon posible, mas maayo nga buligan sila antes sila mangin diaktibo. Dapat pahibaluon sang sekretaryo sang kongregasyon ang konduktor sang Pagtinuon sa Libro sang Kongregasyon kon ang isa ka manugbantala nangin ditayuyon sa pag-alagad. Sarang mahimo ang pagduaw sa pagbantay (shepherding). Dapat hibaluon sang mga gulang ang kabangdanan sang problema kag kon paano mahatag ang bulig.—Tan-awa ang Septiembre 15, 1993, Lalantawan, pahina 20-3.
4 Kon Paano ang Iban Makabulig: Ang kalabanan sa aton may kilala nga nangin diaktibo. Ayhan suod naton sia nga abyan sang nagligad. Ano ang mahimo naton sa pagbulig? Ngaa indi maghapit para sa isa ka malip-ot nga pagduaw? Sugiri sia nga nahidlaw ka nga makaupod sia. Mangin masinadyahon kag positibo. Ipabutyag ang imo kabalaka nga wala nagapahangop nga nagamasakit sia sa espirituwal. Magsugid sing makapalig-on nga mga eksperiensia sa kongregasyon. Magpresentar sa pag-upod sa iya pakadto sa mga miting. Pahibalua ang mga gulang sang iya reaksion.
5 Kon ang isa nga nangin di-aktibo magatambong liwat sa mga miting, ayhan nahuya sia nga makita ang iban nga kilala niya anay. Indi sia pagpamangkuta, “Diin ka maghalin?” Sa baylo, abiabiha sia. Ilakip sia sa paghambalanay. Ipakilala sia sa mga wala niya makilala. Tupari sia sa tion sang miting, nagapat-od nga may songbook sia kag materyal nga ginatun-an. Palig-una sia sa pagbalik, kag magtanyag sing bulig.
6 Bangod may mainit nga pagpalangga para sa mga nagtalang, si Jehova kag si Jesus nagakasadya kon makapanumbalik sa espirituwal ang subong sa ila. (Mal. 3:7; Mat. 18:12-14) Maagom man naton ini nga kalipay kon magamadinalag-on kita sa pagbulig sa iban sa pag-alagad liwat kay Jehova.