Pamangkot

◼ Nagakaigo bala gihapon nga magdumala sing pagtuon sa Biblia upod sa isa ka diaktibo nga utod nga lalaki ukon babayi sa panuytoy sang isa sang mga katapo sang Komite Sang Kongregasyon sa Pag-alagad?

Ang mga gulang may salabton nga bantayan ang kongregasyon, lakip na ang mga katapo nga nangin diaktibo. Ginaduaw nila sila kag ginahibalo kon ano nga personal nga bulig ang kinahanglan. Kon nagakaigo, mahimo ini maglakip sang pagsugid sa isa ka diaktibo sang kapuslanan sang personal nga pagtuon sa Biblia. Ginapaathag sang Organisado sa Pagtuman sang Aton Ministeryo, pahina 103, nga ang Komite Sang Kongregasyon sa Pag-alagad magapamat-od kon sin-o ang mahimo nga makabenepisyo gikan sa sini nga aman.

Ang manugtatap sa pag-alagad magapamat-od kon sin-o ang labing maayo nga makabulig, kon ano nga mga topiko ang tun-an, kag kon ano nga publikasyon ang labi gid nga makabulig. Ayhan ang isa nga nagtuon anay sa iya ukon ang isa nga kilala niya kag ginatahod ang labing maayo nga makabulig. Ang isa ka sangkol kag hamtong nga utod nga babayi mahimo mapangabay sa pagbulig sa isa ka diaktibo nga utod nga babayi. Sa masami indi kinahanglan nga updan sang isa pa ka manugbantala ang gintangdo nga magdumala sing pagtuon. Kon gintangdo, mahimo isipon sang manugbantala nga nagadumala sing pagtuon ang oras, mga pagduaw liwat, kag ang pagtuon.​—⁠Tan-awa ang Disiembre 1987 nga Ang Aton Ministeryo sa Ginharian, pahina 1 kag 3.

Sanglit ang estudyante bawtismado na, sa masami ang pagtuon indi kinahanglan nga magpadayon sa madugay nga tion. Ang tulumuron amo ang pagbulig sa diaktibo nga makatambong liwat sa tanan nga miting sang kongregasyon kag mangin tayuyon nga manugbantala sing maayong balita. Bantayan sang manugtatap sa pag-alagad ang lakat sini nga mga pagtuon. Ang resulta sining mahigugmaon nga bulig amo nga sarang na maabaga sining mga utod nga lalaki kag babayi ang ila salabton kay Jehova kag malig-on nga ‘manggamot kag mapasad’ sa kamatuoran.​—⁠Efe. 3:​17; Gal. 6:⁠5.