Indi Pagkalimti ang mga Nagbugnaw
1. Ngaa dapat naton tinguhaan nga palig-unon ang mga nagbugnaw?
1 May kilala ka bala nga nagbugnaw? Ayhan wala na sia nagpakig-angot sa kongregasyon kag naanod palayo. Ayhan nasalapuan mo sia samtang nagapakigbahin ka sa pamalaybalay nga ministeryo. Dapat naton dumdumon nga espirituwal nga utod gihapon naton sia. Luyag naton ipabatyag liwat ang aton gugma sa iya kag buligan sia nga makabalik sa kongregasyon kag sa ‘manugbantay kag manugtatap sang aton kalag.’—1 Ped. 2:25.
2. Paano naton mapalig-on ang nagbugnaw?
2 Ipakita ang Imo Interes: Mapabatyag naton sa nagbugnaw nga ginadumdom gihapon naton sia paagi sa pagpanawag sa iya sa telepono ukon pagduaw sa iya. Ano ang mahimo naton isiling? Mahimo naton sia mapalig-on paagi sa pagpahibalo sa iya nga ginakabalak-an gihapon naton sia. Hupti nga positibo kag makapalig-on ang pagsugilanon. (Fil. 4:8) Mahimo naton hinambitan ang isa ka punto nga naluyagan gid naton sa sining karon lang nga miting. Mahimo man naton sia maagda sa masunod nga miting ukon sa nagahilapit nga asambleya kag magtanyag nga amanan sia sing pulungkuan ukon sing masakyan.
3. Paano nakapanumbalik ang isa ka utod nga babayi?
3 Nasalapuan sa teritoryo ang isa ka utod nga babayi nga nagbugnaw sing kapin sa 20 ka tuig. Bisan pa indi niya luyag magtuon sa Biblia, ginabalikan sia pirme sang utod nga babayi nga nakasalapo sa iya kag ginabilinan sia sang bag-o nga gua sang mga magasin. Pagkatapos sang distrito nga kombension, ginpaambit sang utod ang pila ka dalagku nga mga punto sa kombension sa nagbugnaw nga utod, kag sang ulihi nakapanumbalik ang nagbugnaw.
4. Paano naton dapat tratahon ang isa nga nagpakig-angot na liwat sa kongregasyon paagi sa pagtambong sa mga miting?
4 Kon ang Isa Manumbalik: Paano naton dapat tratahon ang nagbugnaw nga nagatambong na liwat sa mga miting? Ti, paano bala gintratar ni Jesus ang iya mga disipulo pagkatapos sang ila temporaryo nga pagbiya sa iya? Mapinalanggaon nga ginpatuhuyan niya sila subong iya “mga utod” kag nagpakita sing pagsalig sa ila. Ginhatagan pa gani niya sila sing importante nga asaynment. (Mat. 28:10, 18, 19) Wala magdugay pagkatapos sini, nangin masako sila sa pagbantala sang maayong balita “nga wala nagauntat.”—Binu. 5:42.
5. Hinambiti ang mga kahimtangan nga dapat naton hambalon ang mga gulang tuhoy sa isa nga nagbugnaw.
5 Antes tanyagan sing pagtuon sa Biblia ang nagbugnaw ukon antes agdahon ang madugay na nga nagbugnaw sa pag-upod sa aton sa ministeryo, dapat anay kita mangayo sing panuytoy sa mga gulang. Kon masalapuan naton sa aton teritoryo ang isa nga nagbugnaw nga manugbantala, dapat naton pahibaluon ang mga gulang agod nga makahatag sila sing kinahanglanon nga bulig.
6. Ano nga kalipay ang mahimo naton mabatyagan sa pagbulig sa mga nagbugnaw?
6 Subong sang maathag nga ginpakita sang Biblia, yadtong makalab-ot lamang sa inangan ang maluwas. (Mat. 24:13) Busa, talupangda ang mga nasandad ukon naanod palayo. Kon padayon naton nga ginapabanaag ang gugma ni Jehova paagi sa pagpakita sing sinsero nga interes sa mga nagbugnaw, mabatyagan naton ang kalipay sa pagtan-aw sa ila nga nagapadayon liwat sa ila sagrado nga pag-alagad upod sa aton.—Luc. 15:4-10.