Ang Mainabyanon nga mga Pagpakigsugilanon Mahimo Maglab-ot sa Tagipusuon
1 Ang pagpakigsugilanon amo ang “minitlang sa baba nga pagbayluhanay sing mga ideya.” Ang pagsugod sing mainabyanon nga pagpakigsugilanon sa topiko nga ginakabalak-an sang tanan mahimo magganyat sang ila interes kag magbulig sa aton sa paglab-ot sang ila tagipusuon. Mas epektibo ang makighambal sa mga tawo sa mainabyanon kag relaks nga paagi sangsa maghatag sa ila sing sermon.
2 Kon Paano Sugdan ang Isa ka Mainabyanon nga Pagpakigsugilanon: Ang pagpakigsugilanon naton sa iban wala nagakahulugan nga dapat naton ipresentar ang madamong makapulukaw nga mga punto kag mga kasulatan. Nagakahulugan lamang ini sang paghaylo sa isa ka tawo nga makighambal sa aton. Halimbawa, kon nagapakigsugilanon kita sa aton tupad-balay, mainabyanon kag relaks kita. Wala naton ginahunahuna ang aton masunod nga ihambal kundi natural nga nagasabat sa ginasiling niya. Ang pagpakita sing matuod nga interes sa ginasiling niya mahimo magapalig-on sa iya sa pagpakigsugilanon sing padayon sa aton. Amo man kon nagapanaksi sa iban.
3 Ang mga topiko subong sang krimen, mga problema sang pamatan-on, lokal nga mga isyu, mga kahimtangan sa kalibutan, ukon bisan panahon mahimo magamit sa pagsugod sing mainabyanon nga mga pagpakigsugilanon. Ang mga tema nga nagaapektar sing direkta sa kabuhi sang tawo tuman ka epektibo sa pagpukaw sang ila interes. Sa tion nga makasugod na sa pagpakigsugilanon, mainabyanon naton nga maliton ini sa mensahe sang Ginharian.
4 Ang pagtigayon sing relaks nga pagpakigsugilanon wala nagakahulugan nga indi kinahanglan ang abanse nga paghanda. Kinahanglan ini. Apang, indi kinahanglan ang paghanda sing dimaliwat nga balayan ukon ang pagsaulo sing sermon, nga magaresulta sa isa ka pagpakigsugilanon nga wala nagahisanto sa karon nga mga kahimtangan. (Ipaanggid ang 1 Corinto 9:20-23.) Maayo nga maghanda sing isa ukon duha ka Makasulatanhon nga tema, nian dihunon ang mga pagpakigsugilanon sa palibot sini. Ang pagrepaso sa mga tema nga masapwan sa Reasoning nga libro mabuligon sa sini.
5 Kinahanglanon nga mga Kinaiya Para sa Isa ka Mainabyanon nga Pagpakigsugilanon: Kon nagapakigsugilanon kita sa iban, dapat kita mangin mainabyanon kag sinsero. Ang yuhum kag masadya nga dagway nagapabanaag sining mga kinaiya. Kita ang may labing maayo nga mensahe sa kalibutan; labi gid ini ka makagalanyat sa mga bunayag sing tagipusuon. Kon mabatyagan nila nga ang aton interes sa ila ginapahulag sang isa ka sinsero nga handum nga ipaambit ang pila ka maayong balita sa ila, nian mahimo sila mapahulag sa pagpamati.—2 Cor. 2:17.
6 Ang pagpakigsugilanon dapat mangin isa ka makalilipay nga eksperiensia. Busa, dapat kita mangin malulo kag mataktikanhon sa pagtanyag sang mensahe sang Ginharian. (Gal. 5:22; Col. 4:6) Panikasugi nga makabilin sing maayo nga impresyon bisan pa wala sia mamati.
7 Ang pagsugod sing isa ka mainabyanon nga pagpakigsugilanon indi resulta sang pagsaulo sang sermon. Pagpukaw lamang ini sang interes sa isa ka tema nga ginakabalak-an sang tawo. Tinguhaan naton nga lab-uton ang tagipusuon sang katawhan paagi sa pagpaambit sa ila sang maayong balita sang Ginharian.—2 Ped. 3:13.