Natilawan Mo Na Bala ang Magpanaksi sa Gab-i?
1 Kita tanan nalipay mangin mapatubason sa aton hilikuton. Sa pihak nga bahin, kon indi naton makita ang positibo nga mga resulta, ang hilikuton mahimo mangin makatalaka kag di-makaalayaw. (Ipaanggid ang Manugwali 3:10-13.) Mahimo naton mapadapat ining prinsipio sa aton pagbantala nga hilikuton. Nahibaluan naton gikan sa aton inagihan nga kon magpamalaybalay kita kag masugilanon ang mga tawo nahanungod sa Biblia, nagapauli kita nga napapagsik sa espirituwal. Nagabatyag kita nga tunay nga may hinimuan.
2 Sa pila ka lugar mabudlay na maabtan ang mga tawo sa puluy-an sa aga kag hapon. Ginlubad sang madamong kongregasyon ini nga problema paagi sa paghimo sing mga kahimusan para sa pagpanaksi sa gab-i, kag nakaagom sila sing daku nga kadalag-an. Ang mga manugbantala nagareport nga kon magduaw sila sa huluhapon na, mas madamo nga tawo ang yara sa balay kag mas relaks sila kag mas nahuyog sa pagpamati sa mensahe sang Ginharian. Natilawan mo na bala ang magpanaksi sa gab-i sa inyo teritoryo?—Ipaanggid ang Marcos 1:32-34.
3 Ang mga Gulang Nagaorganisar sing Pagpanaksi sa Gab-i: Sa pila ka lugar ang mga miting antes mag-alagad sa latagon sa huluhapon na ukon sa kasisidmon ginasakdag sang lamharon nga mga manugbantala pagpauli nila halin sa eskwelahan kag sang mga hamtong nga nakatapos na sang ila sekular nga pagpamugon sa sina nga tion. Nasapwan sang pila ka manugbantala nga indi makaguwa sa latagon sa talipuspusan sang semana nga ang pagpanaksi sa gab-i sa sulod sang semana isa ka praktikal nga paagi agod makapakigbahin sila sing tayuyon sa pagbantala nga hilikuton.
4 May nanuhaytuhay nga mga hilikuton nga mapakigbahinan mo sa tion sang pagpanaksi sa gab-i. Makapanaksi ka sa balay-balay nga nagagamit sing magasin ukon sing tanyag nga literatura para sa bulan. Ang gab-i isa ka maayong tion sa pagduaw sa mga tawo nga wala sa balay kon magduaw ang mga manugbantala sing mas maaga sa adlaw ukon sa talipuspusan sang semana. Ayhan may maayong teritoryo man para sa pagpanaksi sa dalan, nga nagatugot sa imo nga masugilanon ang mga tawo nga nagapauli halin sa trabaho. Nasapwan sang madamo nga ang gab-i amo ang labing maayo nga tion sa paghimo sing mga pagduaw liwat.
5 Mangin Mahalungon kag Mainandamon: Ang paglakat sa kasisidmon mahimo nga delikado sa pila ka lugar. Maalamon ang maglakat sing pares-pares ukon grupo-grupo sa masanag nga mga kalye kag duawon lamang ang mga puluy-an sa mga lugar nga wala sing peligro. Kon manuktok sa ganhaan, magtindog sa lugar nga makita ka, kag ipakilala sing maayo ang imo kaugalingon. Mangin mahinantupon. Kon nakita mo nga nagduaw ka sa di-nagakaigo nga tion, subong sang kon ang pamilya nagapanihapon, ayhan mapanugda mo nga magaduaw ka na lang sa lain nga tion. Kinaandan na nga labing maayo ang magpanaksi sa maaga pa nga mga inoras sa gab-i, sa baylo sangsa gulugab-i na, nga ayhan ang mga tagbalay nagahanda na sa pagtulog.
6 Makapat-od kita nga, samtang ginahimo naton sa Dios ang “sagrado nga pag-alagad sa adlaw kag gab-i,” pakamaayuhon gid ni Jehova ang aton mga panikasog.—Bug. 7:15.