Makapanaksi Ka Bala sa Gab-i?
1. Suno sa isa ka libro, ano nga oras nagapamalaybalay si apostol Pablo?
1 Suno sa libro nga Daily Life in Bible Times, si apostol Pablo masami nga nagapamalaybalay “halin sa alas kuatro sa hapon asta sa kagab-ihon.” Wala kita nakasiguro kon amo gid sini ang iskedyul ni Pablo, pero napat-od naton nga “ginahimo [niya] ang tanan nga butang tungod sa maayong balita.” (1 Cor. 9:19-23) Mahimo nga gin-iskedyul gid niya ang iya mga hilikuton para makapamalaybalay sia sa tion nga madamo sia sing maistorya.
2. Ngaa epektibo nga magpanaksi sa gab-i?
2 Sa madamo nga lugar, kinaandan na nga nagapamalaybalay ang mga kauturan sa aga. Pero, epektibo man bala ini sa inyo lugar? Ang isa ka payunir nagsiling: “Wala sing tawo sa mga balay kon aga. Ang kalabanan sa ila ara lang kon gab-i.” Ang pagpanaksi sa gab-i amo ang pinakamaayo nga tion para maistorya ilabi na ang mga lalaki parte sa maayong balita. Masami nga relaks ang mga tawo kag nanamian makig-istorya. Ang mga gulang dapat maghiwat sing miting para sa pagpanaksi sa gab-i kon mapuslanon ini.
3. Paano naton mapakita ang pagkamahinantupon kon nagapanaksi sa gab-i?
3 Mangin Mahinantupon: Kon nagapanaksi sa gab-i, kinahanglanon ang pagkamahinantupon. Halimbawa, kon nakita mo nga alang-alang ang tagbalay, pareho abi kon nagapanyapon sila, mas maayo kon magbalik ka na lang. Kon madulom, magpuesto ka sa lugar nga makita ka sang tagbalay kag ihambal mo dayon ang imo ngalan kag ang imo tuyo. Maalamon man nga may upod ka ukon grupo kamo, kag magpanaksi sa masanag nga dalan nga may mga tawo. Indi magpasobra kagab-i para indi madisturbo ang mga tagbalay nga manugtulog na. (2 Cor. 6:3) Kon ang isa ka lugar delikado kon magdulom na, magpanaksi sing tulutemprano.—Hulu. 22:3.
4. Ano ang mga pagpakamaayo sang pagpanaksi sa gab-i?
4 Mga Pagpakamaayo: Mas malipayon ang aton ministeryo kon mas madamo kita sing mapanaksihan. Kag kon mas madamo kita sing mapanaksihan, mas madamo man kita sing mabuligan nga “maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Puede mo bala maadjust ang imo iskedyul para makapanaksi sa gab-i?