Mapasibu Mo Bala ang Imo Iskedyul?
1. Ngaa dapat naton mapasibu ang aton iskedyul para makabantala?
1 Subong matuod nga mga Cristiano, ginbaton naton ang pangagda nga mangin “mangingisda sang mga tawo.” (Mat. 4:19) Kaangay sa literal nga mangingisda, matigayon gid naton ang maayo nga mga resulta sa pagpangita sang mga tawo kon mag-iskedyul kita sa pagbantala sa tion nga ang mga tawo yara sa ila balay. Sa kahapunon kag sa kasisidmon, madamo ang yara sa ila puluy-an. Sing masami, relaks sila kag mahimo magbaton sing mga bisita sini nga tion. Mapasibu mo bala ang imo iskedyul sa pagbantala sa amo sini nga mga inoras?—1 Cor. 9:23.
2. Ano ang pila ka pamaagi nga mapaambitan ang mas madamo pa nga tawo sing maayong balita?
2 Pagpanaksi sa Gab-i: Ang pagplano sing abanse agod magbantala sa gab-i mahimo makabulig sa aton nga madamo pa ang aton mabantalaan sang maayong balita. (Hulu. 21:5) Ang mga pamatan-on mahimo magbantala pagkatapos sang klase. Sarang man ini mahimo sang iban pagkatapos sang ila trabaho. Ang iban nga grupo sa pagtuon mahimo man mag-iskedyul sa pagbantala sing isa ka oras antes sang pagtuon.
3. Sa anong mga paagi mahimo ka makabantala sa kahapunon kag sa kasisidmon sa inyo teritoryo?
3 Ang pagbantala sa pamalaybalay sa kahapunon kag sa kasisidmon mahimo magresulta sa pagpakigsugilanon sa mga tawo nga masami wala sa ila balay. Sa madamo nga teritoryo, ang pagbantala sa dalan kag ang iban pa nga pangpubliko nga pagpanaksi mahimo man himuon sa gab-i. Kag madamo ang nakasapo nga maayo gid ang mga pagduaw liwat kag ang pagsugod sing mga pagtuon sa Biblia sa gab-i.
4. Ngaa importante nga mangin mahantupon kag mangin mapatugsilingon kon nagapanaksi sa gab-i?
4 Kinahanglan ang Pagkamahinantupon: Ang paghantop kinahanglanon kon nagapakigbahin sa pagpanaksi sa gab-i. Masami nga maayo tempranuhon ang pagpanaksi sa gab-i, sa baylo nga duawon ang mga tagbalay sa oras nga ila inugtulog. (Fil. 4:5) Kon nagapanuktok ka sa ganhaan, magtindog ka sa duog nga makita ka nila, kag ipakilala sing maayo ang imo kaugalingon. Gilayon nga ipahibalo ang katuyuan sang imo pagduaw. Kon alang-alang ang tion sang imo pagduaw, halimbawa kon nagakaon ang pamilya, magsiling nga mabalik ka na lang ugaling sa iban nga higayon. Mangin mapatugsilingon pirme.—Mat. 7:12.
5. Paano naton malikawan ang posible nga mga katalagman samtang nagabantala?
5 Dapat man kita mangin mahalungon. Kon nagapanaksi ka sa kasisidmon ukon sa gab-i, maayo nga maglakat nga may upod. Maglakat sa dalan nga masanag kag indi ka magbulag sa iban. Magpanaksi lamang sa mga duog nga sa banta mo indi ka delikado. Likawi ang mga duog nga mahimo makatalagam kon gab-i.—Hulu. 22:3.
6. Ano ang dugang pa nga kaayuhan ang matigayon gikan sa pagpanaksi sa kahapunon kag sa kasisidmon?
6 Ang pagpanaksi sa kahapunon ukon sa kasisidmon magabulig sa aton nga makapanghikot upod sa mga auxiliary kag regular nga payunir. (Roma 1:12) Mapasibu mo bala ang imo iskedyul agod makapakigbahin sa sini nga aspekto sang pag-alagad?