“Ini Nagakahulugan sing Kabuhi nga Walay Katapusan”
1 Sa Juan 17:3 si Jesus nagsiling nga ang pagkuha sing ihibalo tuhoy sa Dios kag kay Cristo nagakahulugan sing kabuhi nga walay katapusan! Apang paagi lamang bala sa pagtigayon naton sing ihibalo tuhoy kay Jehova kag kay Jesus nga maagom naton ang kabuhi nga dayon? Indi. Ang mga Israelinhon nakahibalo nga si Jehova amo ang ila Dios, apang wala ginpakita sang ila dalanon sang kabuhi ina nga pagtuo. Subong resulta, nadula nila ang iya kahamuot. (Os. 4:1, 2, 6) Karon minilyon ka tawo ang mahimo nga “may kakugi sang Dios; apang indi suno sa sibu nga ihibalo.” (Roma 10:2) Dapat nila makilala si Jehova, “ang lamang matuod nga Dios,” kag mag-alagad sa iya sing nagakaigo. Bangod sina, itanyag naton sa Nobiembre ang libro nga Ang Ihibalo nga Nagadul-ong sa Kabuhi nga Walay Katapusan. Yari ang pila ka panugda nga makabulig sa imo.
2 Sanglit ang ideya tuhoy sa pagkabuhi sing dayon bag-o sa kalabanan nga mga tawo, ini nga introduksion mahimo nga magganyat sang ila interes:
◼ “Ginapamangkot namon ang amon mga kaingod sing isa ka pamangkot. Kon gin-agda ka sa pagkabuhi sing dayon sa kalibutan nga kaangay sini, batunon mo bala ang imbitasyon? [Ipakita ang larawan sa pahina 4-5 sa Ihibalo nga libro. Pasabta sia.] Apang ano sa banta mo ang dapat mo himuon agod maagom ina nga palaabuton? [Pasabta sia.] Talupangda kon ano ang kinahanglanon suno sa Juan 17:3. [Basaha.] Nabuligan sini nga libro ang madamo sa pagtigayon sini nga sahi sang ihibalo. Luyag mo bala makatigayon sing personal nga kopya agod mabasa mo? [Pasabta sia.] Sa masunod ko nga pagduaw, mahimo naton hambalan kon ngaa makatarunganon ang magpati nga mahimo naton matigayon ang kabuhi nga walay katapusan diri mismo sa duta.”
3 Kon nagaduaw liwat sa mga ginpaathagan mo sing Juan 17:3, mahimo ka magpadayon sa sining paagi:
◼ “Sang nagligad ko nga pagduaw, ginhambalan naton ang Juan 17:3, nga nagasiling nga ang pagkuha sing ihibalo tuhoy sa Dios kag kay Cristo nagakahulugan sing kabuhi nga walay katapusan. Apang madamo nga tawo ang nagapati nga ang mas maayo nga kabuhi matigayon lamang sa langit. Ano ang masiling mo tuhoy sina? [Pasabta sia.] Kon yara ang libro nga ginbilin ko sa imo, luyag ko ipakita sa imo ang pila ka bersikulo sa Biblia nga nagapamatuod nga ang Paraiso ipasag-uli sa duta. [Ipaathag ang parapo 11-16 sa pahina 9-10 sang Ihibalo nga libro.] Sa masunod ko nga pagduaw, luyag ko ipakita sa imo kon ngaa masaligan mo ining mga saad sa Biblia. Samtang, ayhan mabasa mo ang kapitulo 2 sa imo kopya sang libro.”
4 Yari ang isa ka presentasyon nga ayhan luyag mo gamiton sa mga tawo nga relihioso:
◼ “Ginapakighambal namon sa amon mga kaingod ang nahanungod sa kon ngaa may madamong nanuhaytuhay nga relihion sa kalibutan. May kapin sa 10,000 ka relihion sa bug-os nga kalibutan. Apang, isa lamang ang Biblia. Ngaa sa banta mo nagaluntad ini nga kagumon sa relihion? [Pasabta sia. Buksi ang Ihibalo nga libro sa kapitulo 5, kag basaha ang parapo 1.] Makabaton ka sing makaalayaw nga mga sabat sa sinang mga pamangkot paagi sa pagbasa sini nga kapitulo. Nalipay ako nga ibilin sa imo ang libro sa manubo lamang nga kontribusyon.” Kon ini ginbaton, maghimo sing kahimusan sa pagbalik, kag magsiling: “Sa akon pagbalik, ayhan mahimo naton mahambalan kon bala ang tanan nga relihion lainlain lamang nga mga dalan nga nagapadulong sa isa ka duog.”
5 Kon magbalik ka agod padayunon ang paghambalanay sa kon ngaa may tuman kadamo nga relihion, mahimo ka makasiling:
◼ “Sang nagligad nga paghambalanay naton, ginbangon ko ang pamangkot sa kon bala ang tanan nga relihion lainlain lamang nga dalan nga nagapadulong sa isa ka duog. Ano ang panghunahuna mo tuhoy sina? [Pasabta sia.] Luyag ko ipakita sa imo sa libro nga ginbilin ko sa imo kon ano ang ginsiling ni Jesus nahanungod sini. [Buksi ang pahina 5 sang Ihibalo nga libro, kag basaha ang parapo 6-7, lakip ang Mateo 7:21-23.] Ayhan magapalibog ka kon ngaa importante nga mahibaluan kon ano gid ang kabubut-on sang Dios. Basaha palihug ang nabilin nga bahin sining parapo. Sa akon masunod nga pagduaw, nalipay ako sa pagpakita sa imo sang kabilihanan sang pagtigayon sing sibu nga ihibalo sa Biblia.”
6 Ang direkta nga paagi masunson nga madinalag-on sa pagsugod sing mga pagtuon sa Biblia. Yari ang isa ka ginpanugda nga introduksion nga makita sa pahina 12 sang “Reasoning” nga libro:
◼ “Nagaduaw ako sa pagtanyag sing isa ka walay bayad nga pagtuon sa Biblia sa puluy-an. Kon pahanugutan mo, luyag ko ipakita sa imo sa sulod sang pila ka minuto kon paano ginahambalan sa puluy-an sang mga tawo sa mga 200 ka kadutaan ang Biblia subong mga pamilya. Mahimo naton magamit ang bisan diin sining mga topiko subong sadsaran para sa paghambalanay. [Ipakita ang kaundan sa Ihibalo nga libro.] Diin ang labi nga nagawili sa imo?” Buksi ang kapitulo nga napili, kag sugdi ang pagtuon sa nahaunang parapo.
7 Yari ang isa pa ka madinalag-on nga direkta nga pagpalapit nga mahimo mo matilawan sa pagsugod sing mga pagtuon:
◼ “Nagahatag ako sing walay bayad nga pagtuon sa Biblia kag may bakante pa sa akon iskedyul para sa dugang nga mga estudyante. Ini nga bulig sa pagtuon sang Biblia amo ang ginagamit namon. [Ipakita ang Ihibalo nga libro.] Ang pagtuon nagalawig lamang sing pila ka bulan kag nagasabat sang mga pamangkot subong sang: Ngaa ginatugutan sang Dios ang pag-antos? Ngaa nagatigulang kita kag nagakapatay? Ano ang nagakatabo sa aton napatay nga mga hinigugma? Kag paano ikaw makapalapit sa Dios? Mahimo ko bala mapasundayag sa imo ang pagtuon?” Kon ang tanyag nga pagtuon wala ginbaton, mamangkot kon bala luyag niya basahon sing kinaugalingon ang Ihibalo. Kon amo, itanyag ini sa iya.
8 Daw ano nga bahandi ang sibu nga ihibalo tuhoy sa Dios kag kay Cristo para kay bisan sin-o nga nagapanag-iya sini! Gamiton naton ang tanan nga kahigayunan sa Nobiembre agod ipaambit sa iban ang ihibalo nga nagadul-ong sa kabuhi nga walay katapusan.