Makigbahin Sa Hilikuton Nga Indi Na Maliwat
1 Sa lainlain nga mga tion sa maragtas sang bug-os nga katawhan, kinahanglan nga hukman ni Jehova ang iya mga kaaway. Apang, bangod sang iya kaluoy, ginhatagan niya sing kahigayunan ang mga matarong sing tagipusuon para makalampuwas. (Sal. 103:13) Ang ila paghulag amo ang nagpat-od sang ila nadangatan.
2 Halimbawa, antes sang Anaw, sang 2370 B.C.E., si Noe “manugbantala sing pagkamatarong.” Ang mga nagkalamatay amo yadtong wala magsapak sa balaan nga paandam. (2 Ped. 2:5; Heb. 11:7) Antes nalaglag ang Jerusalem sang 70 C.E., maathag nga ginbalay ni Jesus ang dapat nga himuon sang isa agod makalampuwas sa kalaglagan nga mahanabo sa siudad. Ang tanan nga nagsikway sa iya nagapaandam nga mensahe nag-antos sing makasiligni nga mga resulta.—Luc. 21:20-24.
3 Modernong-Adlaw nga Hilikuton sa Pagpaandam: Madugay na nga ginsiling ni Jehova nga ipabutyag niya ang iya kaakig batok sa karon malauton nga sistema kag nga mga mahagop lamang ang makalampuwas. (Sof. 2:2, 3; 3:8) Ang tion para ibantala ining nagapaandam nga mensahe malapit na maubos! Ang “dakung kapipit-an” malapit na, kag ang mga mahagop ginatipon na karon. Sa pagkamatuod, ang “kaumhan . . . maputi na nga alanyon.” Gani, wala na sing iban pa nga hilikuton ang mapaanggid sa sini kon tuhoy sa pagkaimportante kag pagkahilingagawon.—Mat. 24:14, 21, 22; Juan 4:35.
4 Dapat kita makigbahin sa pagpalanog sa modernong-adlaw nga paandam sa iban, “mamati man sila ukon indi.” Isa ini ka hatag-Dios nga hilikuton nga dapat naton tumanon. (Ezeq. 2:4, 5; 3:17, 18) Ginapakita naton ang aton tudok nga gugma para sa Dios, ang aton matuod nga pag-ulikid para sa aton mga isigkatawo, kag ang aton dimationg nga pagtuo sa aton Manluluwas, si Jesucristo paagi sa pagpakigbahin naton sing bug-os sa sining hilikuton.
5 Karon Na ang Tion sa Paghulag: Pagkatapos sang nagligad nga mga paghukom ni Jehova, ang kalautan madasig liwat nga nagaluntad bangod aktibo gihapon si Satanas kag ang iya mga demonyo. Apang, sini nga tion mangin tuhay ini. Ang impluwensia ni Satanas dulaon. Ang bug-os globo nga paandam indi na liwat kinahanglan. (Bug. 7:14; Roma 16:20) May pinasahi kita nga pribilehiyo nga makigbahin sa hilikuton nga indi na maliwat. Karon na ang tion agod himuslan naton ini nga kahigayunan.
6 Tuhoy sa iya pagbantala nga hilikuton, si apostol Pablo nagsiling: “Matinlo ako sa dugo sang tanan nga tawo.” (Binu. 20:26) Wala sia magbatyag sing kasal-anan sa dugo bangod sa indi paghatag sing paandam. Ngaa wala? Bangod nakasiling sia tuhoy sa iya ministeryo: “Tungod sini nagapangabudlay ako sing lakas, nga nagapanikasog gid.” (Col. 1:29) Tigayunon naton ini man nga kalipay sa pagpakigbahin sing bug-os sa hilikuton nga indi na maliwat!—2 Tim. 2:15.