Sangkol Kag Nasangkapan Sa Pagtudlo Sa Iban
1 Sang gintangdo si Moises subong tiglawas ni Jehova, wala sia magbatyag nga sangkol sa pagpahayag sang pulong sang Dios kay Paraon. (Ex. 4:10; 6:12) Ginpahayag ni Jeremias ang iya kakulang sing kompiansa sa pag-alagad subong manalagna ni Jehova, nagasugid sa Dios nga indi sia makahibalo maghambal. (Jer. 1:6) Walay sapayan sang ila primero nga kakulang sing kompiansa, ang duha ka manalagna nangin walay kahadlok nga mga saksi para kay Jehova. Ginhimo sila nga sangkol sing nagakaigo sang Dios.
2 Karon, bangod kay Jehova, may yara kita mga kinahanglanon agod matuman ang aton ministeryo nga may kompiansa. (2 Cor. 3:4, 5; 2 Tim. 3:17) Kaangay sang isa ka sangkol nga mekaniko nga madamo sing kagamitan, nasangkapan kita sing nagakaigo nga tumanon sing lantip ang gintangdo sa aton nga ministeryo. Sa Enero itanyag naton ang gamay nga edisyon sang Mabuhi sing Dayon nga libro. Bisan pa indi na bag-o ini nga libro, matahom ini nga bulig sa pagtudlo nga makabulig sa mga tawo nga matun-an ang kamatuoran. Ang masunod nga ginpanugda nga mga presentasyon mahimo magamit.
3 Ang tema tuhoy sa edukasyon mahimo magamit sa pagpukaw sing interes sa Pulong sang Dios. Masugdan mo ang paghambalanay paagi sa pagsiling:
◼ “Ginapadaku gid karon ang pagkakinahanglanon sing de-kalidad nga edukasyon. Sa imo opinyon, ano nga sahi sang edukasyon ang dapat kuhaon sang isa ka tawo agod pat-uron ang labing daku nga kalipay kag kadalag-an sa kabuhi? [Pasabta sia.] Ang dayon nga mga benepisyo mahimo matigayon sadtong nagakuha sing ihibalo sang Dios. [Basaha ang Hulubaton 9:10, 11.] Ining libro napasad sa Biblia. Ginatudlo sini ang lamang nga ginhalinan sang ihibalo nga makadul-ong sa kabuhi nga walay katapusan.” Basaha ang nahaunang dinalan sang parapo 19 sa pahina 15 sang Mabuhi sing Dayon nga libro. Itanyag ang libro kag maghimo sing kahimusan para sa isa ka pagduaw liwat.
4 Kon nagabalik sa tagbalay nga napaathagan mo sang importansia sang edukasyon sang Biblia, mahimo ka makasiling:
◼ “Sang nagligad ko nga pagduaw, ginhambalan naton ang Biblia subong ang ginhalinan sang edukasyon nga nagapasalig sang aton dayon nga palaabuton. Sa pagkamatuod, kinahanglan ang panikasog agod matun-an ang dapat naton mahibaluan gikan sa Kasulatan. [Basaha ang Hulubaton 2:1-5.] Madamong tawo ang nabudlayan sa paghangop sa pila ka bahin sang Biblia. Luyag ko ipasundayag sa imo sa malip-ot ang isa ka paagi nga ginagamit namon agod buligan ang mga tawo nga makatuon sing dugang pa nahanungod sa sadsaran nga mga panudlo sang Biblia.” Ipasundayag sa malip-ot ang isa ka pagtuon sa Biblia, nga nagagamit sang nahaunang mga parapo sang libro. Kon luyag sang tagbalay ang isa ka regular nga pagtuon, ipaathag nga magabalik ka agod padayunon ini sa masunod nga semana. Sa ulihi sa nagakaigo nga tion, sarang mo maliton ang pagtuon sa libro nga Ang Ihibalo nga Nagadul-ong sa Kabuhi nga Walay Katapusan.
5 Madamong tawo ang ginaligban sang pag-antos sang minilyon ka kabataan sa kalibutan. Ayhan mabuligan mo ang tagbalay nga mahangpan kon ano ang pagtamod sang Dios sa sining kahimtangan, paagi sa pagsiling:
◼ “Walay duhaduha nga nakakita ka na sing mga balita nahanungod sa mga kabataan sa bug-os nga globo nga nagutuman, nagamasakit, kag napatumbayaan. Ngaa wala mapauswag sang nabalaka nga mga organisasyon ang kahimtangan? [Pasabta sia.] Talupangda ang ginasaad sang Dios para sa mga kabataan kag mga hamtong, subong sang narekord sa Biblia. [Basaha ang Bugna 21:4.] Ining libro nagahatag sing dugang nga mga detalye nahanungod sa isa ka kalibutan nga paluntaron sang Dios diin wala na sing pag-antos.” Buksi ang isa ka ilustrasyon nga nagalaragway sa Paraiso, ayhan sa pahina 12 kag 13 ukon 156-7, kag binagbinaga ini. Itanyag ang libro, kag maghimo sing kahimusan para sa masunod nga pagduaw.
6 Kon ginhambalan ninyo primero ang nahanungod sa pag-antos sang mga kabataan, sa masunod nga pagduaw mahimo ninyo mapadayon ang paghambalanay paagi sa pagsiling:
◼ “Sang nagduaw ako sining karon lang, ginpabutyag mo ang imo kabalaka nahanungod sa kahimtangan sang mga kabataan nga nagaantos bangod sang naguba nga mga puluy-an, gutom, balatian, kag kasingki. Makalulugpay ang makabasa sa Biblia tuhoy sa isa ka kalibutan diin wala na sing kabataan ukon hamtong nga magabalatian, masakitan, ukon mapatay. Ang isa ka tagna sa tulun-an sang Isaias nagalaragway sing isa ka mas maayo nga kabuhi nga magaluntad sa duta.” Basaha kag binagbinaga ang Isaias 65:20-25. Magtanyag sing pagtuon sa Biblia.
7 Sanglit ang pagpangamuyo kinaandan na sa mga tawo nga relihioso, masugdan mo ang paghambalanay sa sining topiko paagi sa pagsiling:
◼ “Ang kalabanan sa aton nakaeksperiensia sing mga problema sa aton kabuhi nga nagpahulag sa aton nga mangayo sing bulig sa Dios paagi sa pangamuyo. Apang, madamo ang nagabatyag nga ang ila mga pangamuyo wala ginasabat. Daw subong pa gani nga ang mga lider sang relihion nga nagapangamuyo sing paghidait wala ginapamatian. Masiling naton ina bangod ang inaway kag kasingki padayon nga nagapapiot sa katawhan. Nagapamati gid bala ang Dios sa mga pangamuyo? Kon amo, ngaa tuman kadamo nga pangamuyo ang daw wala ginasabat? [Pasabta sia.] Ginapaathag sang Salmo 145:18 kon ano ang ginakinahanglan agod ang aton mga pangamuyo pagasabton. [Basaha ang kasulatan.] Una, ang mga pangamuyo sa Dios dapat hanuot kag nahisuno sa kamatuoran nga masapwan sa iya Pulong, ang Biblia.” Buksi ang Mabuhi sing Dayon nga libro sa kapitulo 27, kag ipakita ang ginasiling sini nahanungod sa kabilihanan sang pangamuyo. Itanyag ang libro kag maghimo sing kahimusan sa pagbalik agod hambalan ini sing dugang pa.
8 Kon ginasundan ang nagligad nga paghambalanay nahanungod sa pangamuyo, mahimo ninyo tilawan ini nga paagi:
◼ “Nalipay ako sa aton paghambalanay sa tema nahanungod sa pangamuyo. Pat-od gid nga masapwan mo nga ang panghunahuna ni Jesus tuhoy sa kon ano ang ipangamuyo mapuslanon gid nga panuytoy para sa imo.” Basaha ang Mateo 6:9, 10, nagapakita sang pangunang mga kabalaka nga gingamit ni Jesus sa iya huwaran nga pangamuyo. Ipasundayag ang isa ka pagtuon sa kapitulo 27 sang libro.
9 Tuhoy sa pagpaambit sing ihibalo sang Dios sa iban, mahimo kita mamangkot, “Sin-o ang sangkol sing nagakaigo para sa sining mga butang?” Ang Kasulatan nagasabat: “Kita.”—2 Cor. 2:16, 17.