‘Pabakura Ang Inyo Panimalay’
1 Sa walay duhaduha, ang pagkabuhi sang pamilya nagakawasdak sa tanan nga bahin sang duta. Ang kalibutan ni Satanas nagapatuyang sa daya kag imoralidad. (1 Juan 5:19) Ginapadaku sini ang kinahanglanon nga dapat naton ‘pabakuron ang aton panimalay’ kag tudluan ang iban kon paano man nila ini himuon sa ila panimalay.—Hulu. 24:3, 27.
2 Ang mga Prinsipio sang Biblia Isa ka Pangamlig: Ang sekreto sang matuod nga kalipay sa pamilya masapwan sa pag-aplikar sa mga prinsipio sang Biblia. Ining mga kamatuoran nagabulig sa tagsa ka katapo sang panimalay. Ang pamilya nga nagaaplikar sini magaagom sing diosnon nga paghidait kag kalipay.—Ipaanggid ang Isaias 32:17, 18.
3 Ang mga prinsipio nga makabulig sa aton nga mapabakod ang aton panimalay ginabalay sa bag-ong libro, Ang Sekreto sang Kalipay sa Pamilya. Ang tagsa ka kapitulo nagatapos paagi sa isa ka kahon sa pagtudlo nga nagapadaku sang mga prinsipio nga dapat dumdumon sang mga katapo sang pamilya. Ang kalabanan sini nga mga kahon nagasugod paagi sa pamangkot, “Paano ining mga prinsipio sang Biblia makabulig . . . ?” Nagabulig ini sa aton nga magkonsentrar sa mga panghunahuna sang Dios tuhoy sa topiko nga ginahambalan.—Isa. 48:17.
4 Hibalua sing maayo ang libro. Tun-i ang pagpangita sa mga prinsipio nga makabulig kon mag-utwas ang lainlain nga mga problema. Ang libro nagahinun-anon sang mga bagay subong sini: kon ano ang dapat pangitaon kon nagahunahuna tuhoy sa posible nga mangin tiayon (kapitulo 2), kon anong importante nga mga yabi ang nagabukas sang ganhaan padulong sa dayon nga kalipay sa pag-asawahay (kapitulo 3), kon paano padakuon sang mga ginikanan ang ila mga tin-edyer nga mangin responsable nga mga hamtong (kapitulo 6), kon paano amligan ang pamilya gikan sa makahalalit nga mga impluwensia (kapitulo 8), mga prinsipio nga magabulig sa mga pamilya nga may nagasolo nga ginikanan (kapitulo 9), espirituwal nga bulig para sa mga pamilya nga ginatublag sang alkoholismo kag kasingki (kapitulo 12), kon ano ang himuon kon ang higot sang pag-asawahay daw mabugto na (kapitulo 13), kon ano ang sarang mahimo agod mapadunggan ang tigulang na nga mga ginikanan (kapitulo 15), kag kon paano maagom ang isa ka dayon nga palaabuton para sa pamilya (kapitulo 16).
5 Gamita sing Bug-os ang Bag-ong Libro: Kon wala pa ninyo ini mahimo, ngaa indi ninyo tun-an subong pamilya ang Kalipay sa Pamilya nga libro. Subong man, kon ang inyo pamilya nagaatubang sing bag-ong mga problema ukon mga hangkat, repasuha ang mga kapitulo nga nagahinun-anon sini, kag mapangamuyuon nga binagbinagon kon paano maaplikar ang laygay. Dugang pa, sa Marso, mag-iskedyul sing dugang pa nga tion sa pag-alagad sa latagon agod mapahamtang Ang Sekreto sang Kalipay sa Pamilya sa madamo nga tawo kon mahimo.
6 Ang mga pamilya nga nagabuhat sing diosnon nga debosyon magabakod kag magahiusa sa espirituwal kag mangin handa gid sa pag-atubang sa mga pagsalakay ni Satanas. (1 Tim. 4:7, 8; 1 Ped. 5:8, 9) Daw ano gid ang aton pasalamat sa balaan nga instruksion gikan sa Ginhalinan sang pamilya!