Pagpaambit Sa Iban Sing Ang Sekreto Sang Kalipay Sa Pamilya
1 Ang pamilya amo ang sadsaran nga bahin sang katilingban sang tawo, kag gikan sa pamilya nagahalin ang mga baranggay, siudad, probinsia, kag bug-os nga pungsod. Sa karon ang pamilya labi nga ginaipit sangsa nagligad. Ang makusog nga mga puwersa nagapahog sa mismo nga pagluntad sang pamilya. Daku gid ang aton pasalamat nga si Jehova, ang Desinyador sang kahimusan sang pamilya, naghatag sa aton sing mga instruksion agod maagom naton ang kalipay sa pamilya! Nasapwan sang mga nagasunod sa iya mga giya nga nabuhinan ang mga problema kag isa ka madinalag-on nga pamilya ang resulta. Sa Septiembre pribilehiyo naton nga ipaambit sa iban ang libro nga Ang Sekreto sang Kalipay sa Pamilya. Sugilanuna ang mga tawo tuhoy sa pagkabuhi sang pamilya. Mangin mainabyanon, positibo, kag mahinantupon. Ano ang mahimo nga isiling mo?
2 Mahimo ka makasugod paagi sa pagpamangkot, subong sang:
◼ “Natalupangdan mo bala nga madamo nga pamilya ang nabudlayan sa pagbatas sa mga pag-ipit sa kabuhi? [Pasabta sia.] Ginapakita sang mga report nga madamong tawo ang may mga kabudlayan sa puluy-an. Ano sa banta mo ang magabulig sa mga pamilya nga masapwan ang labi pa nga kalig-unan kag kalipay? [Pasabta sia.] Bangod Dios ang nagtukod sang kahimusan sang pamilya, indi ayhan makatarunganon nga usisaon ang mga giya nga ginhatag niya? [Basaha ang 2 Timoteo 3:16, 17.] Ining mapuslanon nga instruksion ginbalay sa sining libro, Ang Sekreto sang Kalipay sa Pamilya.” Nian pamangkuta sia kon ano sa banta niya ang kinaandan nga problema sang pamilya, ipakita sa iya ang kapitulo nga nagahinun-anon sa problema, kag itanyag ang libro.
3 Sa pagduaw liwat, mahimo nimo himuon ang tulumuron nga makasugod sing isa ka pagtuon sa Biblia paagi sa pagsiling:
◼ “Ginbinagbinag ko ang ginsiling mo tuhoy sa pagkabuhi sang pamilya, kag may dala ako sa imo nga ginahunahuna ko nga maluyagan mo. [Ipakita ang Ginapatuman nga brosyur, buksi sa pahina 16, kag basaha ang anom ka pamangkot sa ibabaw.] Maathag gid nga ang kada isa sa pamilya dapat maghimo sang iya bahin agod makaamot sa kalipay sang pamilya. Kon itugot mo, ipasundayag ko sa imo, sa sulod sang pila lamang ka minuto, kon paano ka makabenepisyo sing labi gid gikan sa sining impormasyon.” Nian sugdan ang pagtuon sa leksion 8.
4 Ang isa pa ka paagi sa pagsugod sing paghambalanay amo ang pagsambit sa isa ka problema, ayhan paagi sa pagsiling:
◼ “Walay sapayan nga ang tanan luyag makaagom sing pagkakontento kag pagkanaayawan, daw madamong pamilya ang wala gid magmadinalag-on sa sini. Ano sa banta mo ang makabulig sa ila agod masapwan ang matuod nga kalipay? [Pasabta sia.] Sang una, ginsugid sang Biblia kon ano nga sahi sang mga problema ang makita naton sa mga pamilya karon. [Basaha ang 2 Timoteo 3:1-3.] Apang, ginasugid man sang Biblia sa mga pamilya kon ano ang himuon agod malubad ining mga problema kag matigayon ang dayon nga kalipay. Ang mga prinsipio sini ginhatag sa sining libro, Ang Sekreto sang Kalipay sa Pamilya.” Nian ipakita ang kahon sa repaso, sa katapusan sang nagakaigo nga kapitulo, basaha ini, kag itanyag ang libro.
5 Sa imo pagbalik, gamita ang “Ginapatuman” nga brosyur sa pagsugod sing pagtuon. Makasiling ka:
◼ “Nalipay ako sa imo kahanda nga usisaon ang mga prinsipio sang Biblia may kaangtanan sa pagkabuhi sang pamilya. Ginpakita sang eksperiensia nga ang labing maayo nga mga resulta matigayon paagi sa pagsunod sa praktikal nga laygay nga masapwan sa Biblia. Yari ang isa ka simple nga paathag kon ngaa amo sini.” Basaha ang nahaunang parapo sang leksion 1 sa Ginapatuman nga brosyur, lakip ang Salmo 1:1-3 ukon ang Isaias 48:17, 18. Kon may kahigayunan, binagbinaga ang nabilin nga bahin sang leksion. Maghimo sing kahimusan nga makabalik agod matun-an ninyo ang masunod nga leksion.
6 Tuhoy sa mga Kontribusyon: Kon nagapahamtang sing literatura, nagapangalag-ag ka bala kon kaisa sa pagsambit sa kontribusyon nga ginapangayo naton para sa literatura? Maayo nga dumdumon nga ang aton literatura hamili, kag mahal ang pag-imprinta. Amo ina ang rason nga luyag gid naton ipaathag ang aton boluntaryo nga hilikuton kag ang rason sang pagpangayo naton sing kontribusyon. Magabulig ini sa ila nga mahangpan nga wala kita nagabaligya sing literatura kag magahatag sa ila sing kahigayunan sa paghatag sing manubo nga amot sa aton bug-os kalibutan nga hilikuton.
7 Sa tapos matanyag ang “Kalipay sa Pamilya” nga libro, halimbawa, mahimo nimo ini masiling:
◼ “Ang pagbalhag sa amon literatura ginahimo sang boluntaryo nga mga manugpangabudlay kag ginasuportahan sing boluntaryo nga mga kontribusyon. Amo ina ang rason nga nagapangayo kami sing manubo nga kontribusyon agod makabulig sa pagtabon sa mga gasto sa pag-imprinta kag sa mga materyales subong man sa pagpadala sining literatura sa bug-os nga kalibutan. Ang imo kontribusyon makabulig sa amon bug-os kalibutan nga hilikuton kag makabulig sa iban nga matigayon ining matahom nga impormasyon.” Paagi sa pagtanyag sa sining paagi, makasalig kita nga ang aton literatura pabaloran kag indi kita pagatamdon subong mga manugbaligya lamang sing mga libro.
8 Manikasog gid kita nga ipaambit sa iban ang sekreto nga nagadul-ong sa kalipay sang pamilya—ang pagsunod sa mga instruksion nga makita sa Pulong sang Dios.—Sal. 19:7-10.