Pagbulig Sa Mga Pamilya Agod Mapat-od Ang Isa Ka Dayon Nga Palaabuton
1 “Ang kakagod maayo,” siling sang isa ka manugpuhunan sa isa ka klase sang mga manugtapos sa kolehiyo, nga nagadugang: “Mahimo kamo mangin makagod kag sa gihapon mahuptan ang pagtahod sa inyo kaugalingon.” Kinaandan ina sa kon paano ginapasanyog sang kalibutan ang kaugalingon nga interes subong ang paagi sa pagpat-od sa palaabuton sang isa. Sa kabaliskaran, si Jesus nagtudlo nga ang isa ka Cristiano dapat ‘magsikway sang iya kaugalingon . . . kay ano bala ang mapulos sang tawo kon maangkon niya ang bug-os nga kalibutan apang madula ang iya kalag?’ (Mat. 16:24-26) Agod mapat-od ang isa ka dayon nga palaabuton, dapat isentro sang isa ka tawo ang iya bug-os nga kabuhi sa paghimo sa kabubut-on sang Dios—ang labing importante nga tulumuron para sa mga pamilya karon. (Sal. 143:10; 1 Tim. 4:8) Ina nga mensahe ginapaalinton sa katapusan nga kapitulo sang libro nga Ang Sekreto sang Kalipay sa Pamilya. Ining bag-ong publikasyon magabulig sa pamilya nga mahangpan kon ano gid ang importante sa kabuhi. Sa Marso, ano ang aton mahimo isiling agod mapalig-on ang mga masugilanon naton nga basahon ang Kalipay sa Pamilya nga libro? Yari ang pila ka panugda:
2 Sa ganhaan man kag sa dalan, mahimo nimo tilawan nga gamiton ang tract nga “Magkalipay sa Pagkabuhi Subong Pamilya” sa pagsugod sang paghambalanay. Makapamangkot ka:
◼ “Bangod sang tanan nga kabalaka sa modernong pagkabuhi, nagahunahuna ka bala nga posible matigayon ang isa ka malipayon gid nga pagkabuhi sa pamilya? [Pasabta sia.] Ini nga tract nagapasalig sa aton nga posible ini. Luyag mo bala ini basahon?” Kon ginbaton ini, makapadayon ka paagi sa pagsiling: “Bangod interesado ka sa sining topiko, ayhan maluyagan mo man ining libro nga nagahatag sing detalyado nga laygay sa kon paano makasapo sing kalipay sa pamilya.” Ipakita ang mga kaundan sa Kalipay sa Pamilya nga libro. Ipakita ang pila ka titulo sang pila ka kapitulo. Buksi ang pahina 10, kag basaha ang halin sa katapusan nga dinalan sang parapo 17 tubtob sa katapusan sang parapo 18. Itanyag ang libro. Maghimo sing kahimusan nga makaduaw liwat agod mahambalan ini sing dugang.
3 Masundan mo ang inyo nahauna nga paghambalanay tuhoy sa malipayon nga pagkabuhi sang pamilya paagi sa pagsiling:
◼ “May luyag ako ipakita sa libro nga nakuha mo nga sa banta ko maluyagan mo. Ang katapusan nga kapitulo nagapaathag sang tunay nga sekreto sang kalipay sa pamilya. [Basaha ang parapo 2 sa pahina 183.] Talupangda nga ang pagpangabudlay sing tingob sa paghimo sing kabubut-on sang Dios amo ang yabi. Ginarekomendar namon nga tun-an sing tingob sang mga pamilya ang Biblia agod mahibaluan kon ano ang kabubut-on sang Dios kag kon paano ini maaplikar sa panimalay. Nagatanyag kami sing libre nga kurso sa pagtuon sa Biblia nga nagakinahanglan lamang sing pila ka bulan agod matapos. Kon itugot mo, ipakita ko sa imo kon paano ini ginahimo.” Magbalik nga dala ang brosyur nga Ano ang Ginapatuman sang Dios sa Aton? ukon ang Ihibalo nga libro, kon ano man ang nagakabagay.
4 Kon nagapakigsugilanon sa mga kabutho sa eskwelahan ukon sa mga pamatan-on sa teritoryo, mahimo ka makatigayon sing sabat sa sining pamangkot:
◼ “Daw ano bala ka importante nga huptan nga bukas sang mga ginikanan kag sang mga kabataan ang ila mga linya sang komunikasyon? [Pasabta sia.] Talupangda kon ano ang ginasiling sini nga libro tuhoy sa pagkabuhi sa pamilya sa tema nga ‘Bunayag kag Tampad nga Komunikasyon.’ [Basaha ang bug-os nga parapo 4 kag ang nahaunang dinalan sang parapo 5 sa pahina 65 sa Kalipay sa Pamilya nga libro.] Ang masunod nga mga parapo nagahatag sing praktikal nga mga panugda sa kon paano mapauswag ang komunikasyon sa sulod sang inyo pamilya. Kon luyag mo basahon ining libro, matigayon mo ang isa ka kopya sa diutay lamang nga kontribusyon.” Ipaathag nga magabalik ka sa ulihi agod mahibaluan ang iya mga komento tuhoy sa mabasa niya.
5 Mapadayon mo ang imo nahaunang pagpakighambal sa isa ka pamatan-on tuhoy sa kaangtanan sang ginikanan kag anak paagi sa pagsiling sini:
◼ “Ginaapresyar ko ang interes nga ginpakita mo sa importansia sang maayo nga komunikasyon sa sulod sang pamilya. Ano ang masiling mo nga amo ang labing importante nga topiko nga dapat hambalan sang mga ginikanan kag mga kabataan?” Pahanuguti sia sa pagsabat. Nian buksi ang pahina 68 sang Kalipay sa Pamilya nga libro, kag basaha ang sabat sa nahaunang katunga sang parapo 11. “Ang semanal nga pagtuon sa Biblia amo ang labing maayo nga paagi sa pagtigayon sing ihibalo tuhoy sa Dios.” Itanyag ang brosyur nga Ano ang Ginapatuman sang Dios sa Aton? Ipaathag nga ang 16 ka leksion sini nagaaman sing sadsaran nga balayan sang mensahe sang Biblia. Basaha ang introduksion sa pahina 2, kag nian ipanugda nga sugdan ang pagtuon sa nahaunang leksion.
6 Kon masugilanon mo ang isa ka ginikanan sa pamalaybalay nga hilikuton, ukon ayhan sa parke, mahimo nimo mapukaw ang interes paagi sa pagsiling:
◼ “Napat-od ko nga nagaugyon ikaw nga ang pagpadaku karon sa kabataan isa gid ka daku nga hangkat. Ano sa banta mo ang makaamlig sa imo pamilya gikan sa malain nga mga impluwensia? [Pasabta sia.] Yari ang pila ka labing maayo nga panugda nga ginaapresyar ko.” Isaysay ang ilustrasyon sa parapo 1 kag basaha ang parapo 2 sa pahina 90 sa Kalipay sa Pamilya nga libro. Ipaathag kon paano ini nagahatag sing balanse nga panuytoy nga epektibo gid sa pag-amlig sa mga pamilya gikan sa makahalalit nga mga impluwensia. Itanyag ang libro kag maghimo sing kahimusan sa pagbalik agod mahambalan ang bisan anong mga pamangkot nga mahimo mag-utwas.
7 Sa imo ikaduha nga pagduaw sa ginikanan nga nagbaton sing “Kalipay sa Pamilya” nga libro, mapadayon mo ang paghambalanay sa sining paagi:
◼ “Sadtong una naton nga paghambalanay, nakita ko nga nagaulikid gid ikaw sa imo mga anak kag luyag mo sila amligan gikan sa malain nga mga impluwensia. Ayhan wala mo pa ini mabasa, apang may yara tuman ka importante nga punto sa libro nga ginbilin ko sa imo nga dapat mo makita. [Basaha ang parapo 19 sa pahina 59.] Ang pagpalambo sing isa ka kaangtanan sa Dios nagakahulugan sang pagkilala sa iya paagi sa mga pahina sang Biblia. Luyag mo bala nga ipasundayag ko sa imo kon paano namon ginatun-an ang Biblia subong isa ka pamilya?”
8 Indi mapakita sang kalibutanon nga mga manuglaygay sa mga pamilya ang dalanon padulong sa kalipay kundi pat-od gid nga magabilin sa ila nga nalugaw-an. Ipanagtag naton ang Kalipay sa Pamilya sing lapnag agod ang mga tawo bisan diin mahimo mabuligan sang Pulong sang Dios agod mapat-od ang isa ka malipayon kag dayon nga palaabuton.—1 Tim. 6:19.