Paggamit sing Maayo sang Ang Lalantawan kag Magmata!
1 Ang Lalantawan kag Magmata! amo ang labing bilidhon kag labing mapuslanon nga mga magasin nga sarang mabasa sang mga tawo karon. Ngaa? Bangod ang espirituwal nga mga kamatuoran nga ginaunod sini may walay katapusan nga kaayuhan sa kabuhi sang tawo. Apang, madamo ang indi bug-os nga mahunahunaon sang ila espirituwal nga kinahanglanon, ukon wala sila makahibalo kon diin mangita agod mapaayawan ini. Pribilehiyo naton nga ilugon si apostol Pablo paagi sa pagbulig sa mga tawo nga imuklat ang ila mga mata sa espirituwal.—Mat. 5:3; Binu. 26:18.
2 Mangin Positibo kag Maghanda sing Maayo: Mahimo nga may katulad-karnero nga mga tawo sa inyo teritoryo nga magahulag sa kamatuoran. Ang iban mahimo nga nagakinahanglan lamang sing malulo nga pagpalig-on nga basahon ang mga magasin. Busa, mangin positibo kag mahayluhon samtang ginatanyag ninyo Ang Lalantawan kag Magmata! Maghupot sing suplay sang mga magasin kag himusli ang tanan nga kahigayunan nga mapanagtag ini, bisan kon nagagamit sing iban pa nga mga publikasyon.
3 Ano ang nagahimo sa aton nga mas epektibo sa pagpanagtag sing mga magasin? Sa pagsugod, dapat gid naton mismo apresyahon ang ila kabilihanan. Dapat kita mangin pamilyar sa mga artikulo sa mga magasin nga aton ginatanyag, kag magapasangkad ini sang aton pagsalig kag sang aton kalangkag nga itanyag ini. Hupti ini sa hunahuna samtang imo ini primero ginabasa. Mangin alisto sa pagpili sing mga punto nga mapatalupangod sa ministeryo. Pamangkuta ang imo kaugalingon: ‘Kay sin-o ining artikulo ilabi na nga makagalanyat? Apresyahon bala ini sang isa ka ginang sa puluy-an, sang isa ka pamatan-on, ukon ayhan sang isa ka negosyante? Mangin makawiwili bala ini nga punto sa estudyante, sa minyo nga tawo, sa isa nga nabalaka sa palibot?’ Agod tunay nga mangin epektibo, marekomendar ang mga magasin pasad sa aton personal nga ihibalo kag pagkalipay sa suno sa panahon nga mga artikulo sini.
4 Himusli ang Daan nga mga Magasin: Dumduma, Ang Lalantawan kag Magmata! wala nagakadulaan sing balor, bisan pa nga indi tanan mapahamtang sa sulod sang isa ukon duha ka bulan sang ila petsa sang guwa. Ang pagkaimportante sang impormasyon nga ginaunod sini wala nagabuhin sa pagligad sang tion, kag indi kita dapat mang-alag-ag nga itanyag ang daan nga mga kopya kon maayo ang hitsura sini. Ang pagtugot nga magtumpok ang daan nga mga magasin kag ang indi gid paggamit sini pagpakita sing kakulang sing apresasyon para sa sining bilidhon nga mga instrumento. Ang tagsa ka magasin nagaunod sing mga kamatuoran nga mahimo makapukaw kag makapaayaw sang espirituwal nga mga gana. Sa baylo nga ihal-id ang daan nga mga guwa kag kalimtan ini, indi bala mas maayo nga panikasugan sing pinasahi nga ipahamtang ini sa mga kamot sang mga interesado ukon sa dimagkubos ibilin ini sa mga balay nga wala sing tawo?
5 Ang Magmata! nga magasin nakabulig sa madamo nga sa primero indi mahuyugon sa espirituwal nga mga tawo nga mangin mahunahunaon sa ila espirituwal nga kinahanglanon. Ang Lalantawan isa ka pangunang instrumento sa espirituwal nga pagpakaon nga programa sa katawhan ni Jehova. Ining mga magasin matahom nga nagabuligay, kag may importante nga papel sa pagbantala sing maayong balita.
6 Samtang ginahimuslan naton ang tanan nga kahigayunan nga ipahamtang ang mga magasin, makasalig kita sing bug-os sa epektibo nga pagpaayaw sini sa espirituwal nga mga kinahanglanon sang mga katulad-karnero. Luyag naton huptan ang positibo nga panimuot, maghanda sing maayo, kag mangin regular sa ministeryo. Subong mga manugbantala sing maayong balita, kabay nga kita tanan tayuyon nga magagamit sing maayo sang Ang Lalantawan kag Magmata! nga mga magasin.