Luyag Ko Makasugod Sing Isa ka Pagtuon sa Biblia!
1 Madamo sa aton ang nagpabutyag sing handum nga makasugod sing isa ka pagtuon sa Biblia, kag tungod sa maayo nga rason. Matigayon naton ang aton tulumuron nga makahimo sing bag-ong mga disipulo sa hilikuton nga pagtuon sa Biblia. (Mat. 28:19, 20) Apang madamo sa aton ang nagpaligad sing binulan, ayhan sing tinuig, nga wala maagom ang pinasahi nga kalipay gikan sa pagtudlo sa isa sang kamatuoran. Ano ang himuon naton tuhoy sini sa Nobiembre? Sanglit ang Ihibalo nga libro itanyag sini nga bulan, pinasahi kita nga makapanikasog nga gamiton ini sa pagsugod sing bag-ong mga pagtuon sa Biblia.
2 Magtalana Sing Isa Ukon Duha ka Talipuspusan Sang Semana: Ginapalig-on namon ang tanan nga magtalana sing pila ka tion sini nga bulan sa pagkonsentrar nga makasugod sing bag-ong pagtuon sa Biblia. Ang mga konduktor sang Pagtinuon Sang Kongregasyon sa Libro dapat magpili sing (mga) talipuspusan sang semana nga gamiton sing espesipiko para sa sini nga katuyuan kag dayon organisahon ang ila mga grupo agod makapanikasog sing nahiusa sa hilikuton nga pagduaw liwat.
3 Dalha ang imo rekord sang mga pagduaw liwat sa sining mga miting sa pag-alagad. Nian duawa ang tanan nga nagpakita sing interes, nagkuha sing literatura, ukon nagtambong sa mga miting. Himua ang kada pagduaw upod ang espesipiko nga tulumuron nga makasugod sing pagtuon.
4 Ipasundayag ang Isa ka Pagtuon sa Biblia: Sa pinili nga mga miting sa pag-alagad, dapat ipasundayag ang isa ka nahanda-sing-maayo nga demonstrasyon, nga nagapakita kon paano magsugod sing pagtuon sa pagduaw liwat. Ayhan makasiling ka: “Madamo nga tawo ang may Biblia, apang wala sila makahibalo nga ginasabat sini ang importante nga mga pamangkot nga ginaatubang naton tanan sa kabuhi. [Ipakita ang kaundan sang Ihibalo nga libro, kag basaha ang titulo sang mga kapitulo 3, 5, 6, 8, kag 9.] Nagagamit sining bulig sa pagtuon sing isa ka oras ukon kapin pa sa sulod sang isa ka semana, matigayon mo ang sadsaran nga paghangop sa Biblia sa sulod lamang sang pila ka bulan. Kon pilion mo ang isa sining mga topiko, malipay ako nga ipakita sa imo kon paano ginahimo ang pagtuon.” Kon mangalag-ag sia sa pagtuon bangod sang iya masako nga iskedyul, ipaathag nga may yara man kita pinalip-ot nga programa. Ipakita ang Ginapatuman nga brosyur, kag ipanugda nga tun-an ang isa ka malip-ot nga leksion sa isa ka semana sa sulod sang 15 tubtob 30 minutos.
5 Kon kita tanan manikasog sing nahiusa sa pagsugod sing mga pagtuon kag kon ipangamuyo naton nga pakamaayuhon ni Jehova ang aton panikasog, pat-od gid nga makakita kita sing bag-ong mga pagtuon! (1 Juan 5:14, 15) Kon luyag mo makasugod sing isa ka pagtuon sa Biblia, mahimo nga ini ang imo kahigayunan nga makasugod sing isa ka pagtuon.