Pamangkot
◼ Paano ang isa ka tawo nga madugay na nga indi aktibo mahimo mabuligan nga mangin kalipikado liwat subong manugbantala sing maayong balita?
Kon ang isa ka di-aktibo nga tawo magahatag sing pamatuod sang iya tinagipusuon nga handum sa pag-alagad kay Jehova, isa ini ka rason sa pagkasadya. (Luc. 15:4-6) Bangod sang pagpamatok ukon mga pag-ipit sa kabuhi, mahimo nga wala niya anay ginhatagan sing tion ang iya personal nga pagtuon, pagtambong sa mga miting, kag pagpakigbahin sa ministeryo sa latagon. Sa anong labing maayo nga paagi mahimo sia buligan agod mag-uswag sia sa espirituwal?
Kita tanan dapat maghimo sing tikang agod pasaligon sia sang aton matuod nga Cristianong gugma. Ang mga gulang dapat mangin maabtik sa paghibalo sang iya espesipiko nga espirituwal nga mga kinahanglanon. (Sant. 5:14, 15) Kon nangin di-aktibo sia sa malip-ot lamang nga tion, ang bulig sang isa ka eksperiensiado nga manugbantala mahimo nga amo lamang ang kinahanglan agod mapaaktibo sia liwat sa pag-alagad sa latagon. Apang, kon ang di-aktibo madugay na nga wala makig-upod sa kongregasyon, dugang pa nga bulig ang mahimo nga kinahanglan. Agod palig-unon ang pagtuo kag apresasyon, ang personal nga pagtuon sa Biblia sa isa ka nagakaigo nga publikasyon mahimo kinahanglanon. Sa sina nga kahimtangan, ang manugtatap sa pag-alagad magahimo sing kahimusan agod ang isa ka kalipikado nga manugbantala magdumala sing pagtuon. (Heb. 5:12-14; tan-awa ang “Pamangkot” sa Nobiembre 1998 nga Ang Aton Ministeryo sa Ginharian.) Kon may kilala ka nga nagakinahanglan sing amo sini nga bulig, sugilanuna ang manugtatap sa pag-alagad sang inyo kongregasyon.
Antes agdahon ang madugay na nga di-aktibo sa pagpakigbahin liwat sa ministeryo, maayo nga masugilanon sia sang duha ka gulang agod tan-awon kon bala kalipikado sia subong isa ka manugbantala sang Ginharian. Sundon nila ang paagi kaanggid sa ginagamit kon nagapakigsapol sa mga bag-uhan nga nagatinguha nga mangin kalipikado subong mga manugbantala sing maayong balita. (Tan-awa ang Nobiembre 15, 1988, Lalantawan, pahina 17.) Ang isa ka di-aktibo dapat may hanuot nga handum nga ibantala ang maayong balita sa iban. Dapat man niya tumanon ang sadsaran nga mga tulumanon nga ginbalay sa pahina 98-9 sa Aton Ministeryo nga libro kag mangin tayuyon sa pagtambong sa mga miting sang kongregasyon.
Ang maayong espirituwal nga rutina makabulig sing daku agod buligan ang isa nga nagbalik nga pabakuron kag huptan ang iya hamili nga kaangtanan kay Jehova kag padayon nga maglakat sa dalan padulong sa kabuhi nga walay katapusan. (Mat. 7:14; Heb. 10:23-25) Ang iya “tanan hanuot nga pagpanikasog” kag pagpalambo sing Cristianong mga kinaiya nga nagapadayon magapugong sa iya nga mangin “di-aktibo ukon di-mabungahon” liwat subong isa ka Cristianong disipulo.—2 Ped. 1:5-8.