“Magsuklob sing Bag-ong Personalidad”

¹ Ginaapresyar sang mga Cristiano nga nahibaluan nila ang kamatuoran! Natun-an naton kon paano kita magkabuhi agod malikawan ang dalanon sang mga tagakalibutan. Bangod “nahamulag sa kabuhi nga iya sang Dios,” “ginadulman sila sa painuino.” (Efe. 4:18) Gintudluan kita nga sikwayon ang kalibutanon nga panghunahuna paagi sa pag-uba sa daan nga personalidad kag sa pagsuklob sa bag-o.​—⁠Efe. 4:​22-24.

² Ang daan nga personalidad nagadul-ong sa nagapaubos sing dalayon nga dalanon sang moral nga kalainan, nga nagaresulta sa kadagtaan kag kamatayon. Gani, hanuot kita nga nagapangabay sa mga nagapamati sa mensahe sang Ginharian nga sikwayon ang tanan nga kasingkal, kaakig, kalainan, malaw-ay nga hambal, kag pamuyayaw. Dapat ubahon sang mga maluyag sang kahamuot sang Dios ang daan nga personalidad sing mapinamat-uron kag sing bug-os​—⁠kaangay sa kon paano nila ginauba ang mahigko nga panapton.​—⁠Col. 3:​8, 9.

³ Isa ka Bag-o nga Puwersa nga Nagapahikot sa Hunahuna: Ang pagsuklob sing bag-ong personalidad nagalakip sang paghimo nga bag-o sa puwersa nga nagapahikot sa aton hunahuna. (Efe. 4:23) Paano ginahimo nga bag-o sang isa ina nga puwersa, ukon panimuot sang panghunahuna, agod mahuyog sa husto nga direksion? Ginahimo ini paagi sa tayuyon kag maukod nga pagtuon sa Pulong sang Dios kag sa pagpamalandong sa kon ano ang kahulugan sini. Nian, ang bag-o nga talaksan sang panghunahuna ginapalambo, kag ginatan-aw sang isa ka tawo ang mga bagay gikan sa panan-aw sang Dios kag ni Cristo. Ang kabuhi sang isa ginabag-o samtang ginapapanaptan niya ang iya kaugalingon sing madamong tulad-Cristo nga mga kinaiya, lakip ang kaawa, kaayo, pagpaubos sing hunahuna, kalum-ok, pagkamabinatason, kag gugma.​—⁠Col. 3:​10, 12-14.

⁴ Paagi sa pagsuklob sing bag-ong personalidad, ginahamulag naton ang aton kaugalingon gikan sa kalibutan. Ang aton dalanon sang kabuhi nagahimo sa aton nga tuhay. Nagahambal kita sing kamatuoran kag nagagamit sing maayo nga hambal agod palig-unon ang iban. Ginapunggan naton ang aton kaakig, kasingkal, singgit, pamuyayaw, kag ang tanan nga kalainan kag ginabuslan ini sing matarong, diosnon nga mga kinaiya. Nagalampas kita sa kon ano ang masami nga ginakinahanglan sa aton agod mangin mapinatawaron. Ini tanan ginahimo ­dayon sing tinagipusuon.​—⁠Efe. 4:​25-32.

⁵ Indi gid pag-ubaha ang bag-ong personalidad. Indi naton maalagad sing kalahamut-an si Jehova kon wala ini. Tuguti ini nga buligan ang mga tawo nga maganyat sa kamatuoran, kag tuguti ini nga himayaon si Jehova, ang Manunuga sang aton dalayawon nga bag-ong personalidad.​—⁠Efe. 4:⁠24.