Agdaha Sila sa Pagkari

¹ Ang imbitasyon sang nagligad nga mga siglo ginapalanog karon sa 233 ka kadutaan sa bug-os nga kalibutan: “Kari, kamo nga katawhan, kag magataklad kita sa bukid ni Jehova, . . . kag tudluan niya kita sang iya mga dalanon, kag magalakat kita sa iya mga banas.” (Isa. 2:3) Ang pagtuytoy sa katawhan pakadto sa organisasyon ni Jehova amo ang isa sang labing maayo nga mga paagi nga mabuligan naton sila sa paghimo sing espirituwal nga pag-uswag nga nagadul-ong sa kabuhi nga walay katapusan.

² Ang pila ka manugbantala nagapangalag-ag sa pag-agda sa mga tawo sa Kingdom Hall kon indi anay sila magpakita sing daku nga pag-uswag sa pagtuon sa Biblia sa puluy-an. Apang, kon kaisa ang mga tawo nagatambong na sa mga miting sa kongregasyon bisan antes pa masugdan ang isa ka pagtuon sa Biblia upod sa ila. Indi kita dapat magpalantang sa pag-agda kag sa pagpalig-on sa mga tawo sa pagtambong sa mga miting.

³ Kon Ano ang Himuon: Gamita sing maayo ang mga handbill sa pagpahibalo sa mga tawo tuhoy sa aton lokal nga mga miting. Sambita nga ang mga miting wala sing bayad kag wala sing koleksion nga ginahimo. Ipaathag kon paano ginahiwat ang mga miting. Ipakita nga mga kurso gid ini sa pagtuon sa Biblia kag ang materyal nga ginatun-an ginaaman agod masundan sang tanan. Ipatalupangod ang lainlain nga ginhalinan kag pangabuhi sang mga nagatambong. Sambita nga mga tagadiri lang sila kag ang tanan sing pangidaron nga kabataan ginaabiabi sa pagkari. Dapat naton agdahon ang aton ginatun-an, nagatanyag nga buligan sila sa ano man nga paagi agod makatambong.

⁴ Ang isa sang katapusan nga mga butang nga ginarekord sa Biblia amo ang mainit nga imbitasyon sa pagpakig-ambit sa mga aman ni Jehova para sa kabuhi: “Kag ang espiritu kag ang nobya padayon nga nagasiling: ‘Kari!’ . . . Kag ang bisan sin-o nga ginauhaw magkari; ang bisan sin-o nga maluyag sa pagkuha sing tubig sang kabuhi nga walay bayad.” (Bug. 22:17) Wala sing tal-us para sa pag-agda sa iban sa pagtambong sa aton mga miting.

⁵ Ang Isaias 60:8 matagnaon nga nagalarawan sang ginatos ka libo ka bag-ong dumalayaw nga nagasulod karon sa mga kongregasyon sang katawhan sang Dios subong sang mga salampati nga “nagalupad subong sang panganod, kag subong sang mga salampati sa ila mga talambuan.” Sarang naton tanan maagda ang mga bag-uhan sa aton mga miting kag pabatyagon sila nga ginaabiabi. Sa sining paagi, nagakooperar kita kay Jehova samtang ginapadasig niya ang hilikuton sa pagtipon.​—⁠Isa. 60:⁠22.