“Magkadto Kita sa Balay ni Jehova”

¹ May kalangkag nga ginbaton ni David ang pangagda: “Magkadto kita sa balay ni Jehova.” (Sal. 122:1) Ang “balay” ni Jehova, nga ginalaragway sang templo, amo ang duog nga ginatipunan sang mga maluyag magsimba sa matuod nga Dios. Isa anay ini ka santuaryo sang kalig-unan kag paghidait. Karon, ang bug-os kalibutan nga Cristianong kongregasyon amo ang “balay” sang Dios, “ang haligi kag pamakod sang kamatuoran.” (1 Tim. 3:15) Ang tanan nga mga aman para sa kaluwasan matigayon paagi sa sining alagyan. Bangod sina, “magadugok sa iya ang tanan nga pungsod” kon luyag nila maagom ang mga pagpakamaayo nga ginsaad sa idalom sang pagginahom sang Ginharian sang Dios.​—Isa. 2:2.

² Ining “balay” ginahuman sang kapin sa 69,000 ka kongregasyon sa 229 ka kadutaan. Ang ganhaan sang mga Kingdom Hall sa palibot sang kalibutan bukas, kag kapin sa apat ka milyon ka makugi nga mga manugpangabudlay ang nagapangagda: “Kari! . . . Ang buot magkuha sang tubig sang kabuhi sa walay bayad.” (Bug. 22:17) Madamo ang nakabati sa sining mensahe kag nagsabat sing mainapresyahon. Ang iban natandog apang wala pa makakari sa balay ni Jehova paagi sa pagpakig-upod sa Cristianong kongregasyon. May “espirituwal nga kinahanglanon” sila nga sarang matigayon paagi sa mga aman nga masapwan lamang sa kongregasyon. (Mat. 5:3) Nagakabuhi kita sa makahalanguyos nga tion, kag ang katapusan sining sistema madasig nga nagahinampot. Ang dimasinapakon ukon nagapang-alag-ag nga panimuot mahimo magresulta sa makatalagam nga pagpalantang. Hilingagawon gid nga ang mga tawo magatinguha nga “magpalapit sa Dios” paagi sa pagpalapit sing suod sa iya organisasyon. (Sant. 4:8) Paano naton sila mabuligan?

³ Ipatuhoy ang Interes sa Organisasyon: Sugod sa aton una nga pagpakigsugilanon sa mga interesado, dapat naton ipatuhoy ang ila igtalupangod sa organisasyon. Bisan pa personal naton nga makita ang mga kasulatan kag mapaathag ang sadsaran nga mga doktrina, ina nga ihibalo wala maghalin sa aton. Ang tanan nga natun-an naton naghalin sa organisasyon, nga ginpaagi sa ulipon nga klase nga nagahatag sing “pagkaon sa nagakaigo nga tion.” (Mat. 24:​45-47) Sugod sa pamuno, dapat mahibaluan sang mga bag-uhan nga indi lamang kita ukon bisan ang lokal nga kongregasyon ang nadalahig sa putli nga pagsimba; may isa ka organisado, teokratiko, bug-os kalibutan nga katilingban nga nagapanghikot sa idalom sang panuytoy ni Jehova.

⁴ Ang panuytoy nga ginabaton naton nagahalin kay Jehova, nga nagsaad nga tuytuyan niya kita kag tudluan. (Sal. 32:8; Isa. 54:13) Ining instruksion ginapalapnag ilabi na paagi sa aton literatura. Kon buligan naton ang mga interesado sa pagpalambo sing mataas nga pagtahod sa literatura, nagakilala sini subong ang tuburan sang nagaluwas-kabuhi nga instruksion, mahimo nga basahon nila kag iaplikar ang mensahe sini sa baylo nga sikwayon sa gilayon. Dapat naton pirme itanyag kag gamiton ining literatura sa paagi nga nagapalambo sing pagtahod sa sini. Nagatudlo ini sa mga bag-uhan nga apresyahon ang organisasyon kag saligan ang mga aman sini.

⁵ Sugiri ang mga interesado nga may isa ka sentro nga duog tilipunan sa komunidad diin ginaaman sing regular ang instruksion. Hatagi sila sang direksion sang Kingdom Hall kag sang iskedyul sang mga miting. Ipaathag ang kinatuhayan sang aton mga miting kag sang relihiosong pagtilipon nga natambungan nila sang nagligad. Ang tanan ginaabiabi; wala sing pagpangolekta ukon personal nga pagpangayo sing kuwarta. Samtang ang gintangdo nga mga ministro ang nagadumala sang mga programa, may kahigayunan ang tanan nga makapakigbahin paagi sa pagkomento kag sa pagpakigbahin sa programa. Ang mga pamilya ginaabiabi; ang kabataan ginalakip sa aton mga paghambalanay sa Biblia. Ang aton mga ministro wala nagasuksok sing pinasahi nga mga sutana ukon mga panapton. Ang Kingdom Hall ginapunihan sing matahom kag wala sing mga kandila, istatwa, ukon imahen. Ang mga nagatambong halos mga tagadiri lamang.

⁶ Amat-amat nga Ipatuhoy ang Interes sa mga Pagtuon sa Biblia: Ang pangunang katuyuan sang pagtuon sa Biblia amo ang pagtudlo sing kamatuoran sang Pulong sang Dios. Dapat man ini magtukod sa estudyante sing apresasyon sa organisasyon ni Jehova kag magpaalisto sa iya sang pagkakinahanglanon nga mangin bahin sini. Ang dakung hilikuton nga nahimo ni Jesus kag sang iya mga disipulo sang unang siglo nagganyat sa mga hanuot kag naghiusa sa ila para sa hilikuton sa idalom sang isa ka sentro nga nagadumala nga hubon. Sa mga komunidad diin maayo ang pagbaton, gintukod ang mga kongregasyon sa paghatag sing regular nga paghanas kag pagpanudlo. Ang mga nagapakig-upod napalig-on sa espirituwal, nga nakabulig sa ila sa pagbatas sang mga panahon sang kapipit-an. (Heb. 10:​24, 25; 1 Ped. 5:​8-10) Sa aton adlaw katuyuan ni Jehova nga ‘tingubon liwat ang tanan nga butang kay Cristo.’ (Efe. 1:​9, 10) Subong resulta, may yara kita bug-os kalibutan nga “paghiliutod.”​—1 Ped. 2:17.

⁷ Ang semanal nga pagtuon sa Biblia nagalakip sang instruksion nga magabulig sa mga estudyante nga apresyahon ang organisasyon kag himuslan ang mga aman para sa ila kaluwasan. Maghinguyang sing pila ka minuto kada semana sa pagsaysay ukon sa paglaragway sang pila ka butang nahanungod sa organisasyon kag kon paano ini nagapanghikot. Makasapo kamo sing mapuslanon nga mga punto nga mahambalan sa Mayo 1, 1985, nga Lalantawan. Ang mga brosyur nga Jehovah’s Witnesses in the Twentieth Century kag ang Mga Saksi ni Jehova​—Nahiusa nga Nagahimo sang Kabubut-on sang Dios sa Bug-os nga Kalibutan nagapaathag sang pangunang mga bahin sang organisasyon kag kon paano kita makabenepisyo sa sini. Ang paghimos nga matan-aw sang mga estudyante sang Biblia ang video nga Jehovah’s Witnesses​—The Organization Behind the Name magapakita sa ila kon ano ang ginahimo sini. Ang pinili nga mga report kag mga eksperiensia gikan sa Yearbook magapakita sang kadalag-an sang hilikuton sa mga pungsod kag mga kultura magluwas sa aton. Mahimo man magamit ang iban nga mga publikasyon. Sa sulod sang isa ka hut-ong sang tion, amat-amat nga ipaathag kon ngaa nagapamalaybalay kita, ang katuyuan sang aton mga miting, kon paano ginagastuhan ang aton hilikuton, kag ang bug-os kalibutan nga kasangkaron sang aton hilikuton.

⁸ Ang makilala ang iban pa nga mga Saksi mahimo nga may nagapapagsik nga epekto sa mga bag-uhan, nagapasangkad sang ila ideya tuhoy sa kongregasyon. Bangod sina, agdaha ang iban nga mga manugbantala nga mag-upod sa pagtuon sa tion kag tion. Ang isa sa kongregasyon nga may kaanggid nga eksperiensia ukon kaanggid nga mga interes mahimo nga magadugang sing bag-o nga kasangkaron sa pagtamod sang imo ginatun-an. Ayhan makaupod sa imo ang isa ka gulang agod lamang makilala sia. Ang paghimos nga makaduaw ang manugtatap sa sirkito ukon ang iya asawa sa pagtuon mahimo nga isa gid ka pagpakamaayo. Kon may mga Saksi sa kaingod, ang pagpakilala sa ila sa estudyante sa Biblia makahatag sing dugang nga pagpalig-on sa estudyante nga magtambong sa mga miting sa kongregasyon.

⁹ Palig-una ang mga Bag-uhan nga Magtambong sa mga Miting: Dapat mahibaluan sang mga bag-uhan kon daw ano ka importante ang magtambong sa mga miting. Tinguhai nga pukawon ang ila interes. Ipakita ang mga artikulo nga pagatuptupan sa Pagtinuon sa Lalantawan. Ihatag ang mga titulo sang masunod nga mga pamulongpulong publiko. Isaysay ang talalupangdon nga mga punto sa materyal nga pagatuptupan sa Teokratikong Eskwelahan sa Pagministro kag Pagtinuon sa Libro sang Kongregasyon. Isugid ang imo kaugalingon nga balatyagon tuhoy sa natun-an mo sa sining mga miting kag kon ngaa nabatyagan mo ang pagkakinahanglanon nga magtambong. Kon may yara, mag-aman sing transportasyon. Ang pagtelepono antes sang miting magahatag man sing dugang nga pangpapagsik sa pagtambong.

¹⁰ Kon ang estudyante sa Biblia magtambong sa miting, pabatyaga sia nga ginaabiabi sia. Ipakilala sia sa iban, lakip sa mga gulang. Kon nagatambong sia sa miting publiko, ipakilala sia sa humalambal. Ilibot sia sa Kingdom Hall. Ipaathag ang katuyuan sang estante para sa literatura kag magasin, mga kahon alamutan, librarya, kag tuigan nga teksto. Sugiri sia nga ang tilipunan indi lamang isa ka balay sa pagsimba kundi isa man ka sentro nga sa sini ang pagbantala nga hilikuton ginaorganisar sing lokal.

¹¹ Ipaathag kon paano ginahimo ang aton mga miting. Ipakita sa estudyante ang mga publikasyon nga ginagamit naton. Ipakita nga ang Biblia amo ang aton pangunang libro nga ginatun-an. Ang tanan mahimo makapakigbahin, lakip ang magagmay nga kabataan. Ipaathag nga ang tanan nga musika kag liriko sa aton songbook ginkomposo sang mga Saksi ni Jehova agod gamiton sa aton pagsimba. Ipatalupangod ang nanuhaytuhay nga nagligad nga kabuhi sang mga nagatambong. Kumentuhi sing positibo ang espiritu sang pagkamainabyanon kag pagkamasapupuhon. Ining malulo, hanuot nga interes mahimo nga isa sang pinakamabaskog nga rason sa pagpalig-on sa estudyante nga magtambong liwat.

¹² Kon Ngaa ang Iban Nagaisol: Sa masami, walay sapayan sang tanan nga ginahimo mo, ang iban nagapang-alag-ag sa pagsuod sa organisasyon. Indi gilayon mag-ampo. Ibutang ang imo kaugalingon sa lugar nila. Tubtob sini nga tion, ayhan wala pa nila mabatyagi nga kinahanglan tambungan ang relihioso nga mga serbisyo magluwas sa pinasahi nga mga okasyon. Mahimo sila ginaipit sang mga katapo sang pamilya ukon suod nga mga abyan. Mahimo sila nahadlok sa mga kaingod nga nagapangtamay. Kag, sa pagkamatuod, mahimo nga ang huyog sa pagpakig-upod sa iban kag paglingawlingaw nagaupang sa ila. Mahimo nila ini tamdon subong dimalandas nga mga balagbag; dapat ninyo sila buligan nga tamdon ini sing nagakaigo kag “pat-uron ang mas importante nga mga butang.”​—Filip. 1:10.

¹³ Ihatag ang Makasulatanhon nga mga rason nga magpadayon. Ipadaku nga kita tanan hilingagawon nga nagakinahanglan sing pagpalig-on kag espirituwal nga pagpabakod nga mabaton naton gikan sa aton pag-inupdanay. (Roma 1:​11, 12) Gin-athag ni Jesus nga ang pagpamatok sang pamilya indi isa ka nagakaigo nga rason sa pag-isol. (Mat. 10:​34-39) Ginlaygayan kita ni Pablo nga indi kita mahuya nga ipakilala ang aton kaugalingon sing dayag subong mga disipulo ni Jesus. (2 Tim. 1:​8, 12-14) Ang personal nga mga paghimud-os kag mga balagbag dapat punggan; kay kon indi, mangin siod ini. (Luc. 21:​34-36) Yadtong nagakabagay sa pagpakamaayo ni Jehova dapat mangin bug-os kalag, nga wala gid nagapangduhaduha. (Col. 3:​23, 24) Ang pagpatudok sing apresasyon sa sinang mga prinsipio sang Biblia mahimo magbukas sang dalan agod mag-uswag sila sa espirituwal.

¹⁴ Ang mga Ganhaan Bukas: Ang balay sang matuod nga pagsimba ni Jehova mas mataas sa tanan. Ang imbitasyon ginapalanog sa 229 ka kadutaan sa palibot sang kalibutan: “Kari kamo, . . . magataklad kita sa bukid ni Jehova, . . . kag tudluan niya kita sang iya mga dalanon, kag magalakat kita sa iya mga banas.” (Isa. 2:3) Ang positibo nga sabat sang mga bag-uhan magaluwas sang ila kabuhi. Ang pagpatuhoy sang ila interes sa organisasyon ni Jehova amo ang isa sang labing maayo nga paagi nga mabuligan naton sila.