Kon Paano ang mga Katapo sang Pamilya Nagabinuligay nga Makapakigbahin sing Bug-os—Sa Ministeryo
1 Ano pa ang mas makalilipay sangsa makita ang mga bana kag mga asawa, mga ginikanan kag mga kabataan nga nagapangabudlay sing magkaupod sa Cristianong ministeryo, nga nagadayaw sing dayag sang ngalan ni Jehova? (Sal. 148:12, 13) Ang tanan nga pamilya dapat nga may yara maayo nga rutina para sa regular nga pagpakigbahin sa pag-alagad sa latagon. Ang imo bala pamilya may natalana nga adlaw kada semana nga ihinguyang sa ministeryo? Kon amo, nian, nahibaluan gid sang kada isa kon ano ang planuhon kag sarang makapakigbahin sing bug-os.—Hulu. 21:5a.
2 Bilang pagsakdag sa adlaw sang pag-alagad sang pamilya, ngaa indi himuon nga isa ka nahiusa nga proyekto ang paghanda sing mga presentasyon nga gamiton sang inyo pamilya? Ang mga sesyon sa pag-ensayo makabulig gid sing daku, kag makapatubas ini sing matuod nga espiritu sang pagbinuligay sang pamilya. Makalilipay gid kon ang ministeryo sa latagon isa ka pangpamilya nga hilikuton kag ang tanan nga katapo nakahanda sing maayo!
3 Gin-updan sang isa ka nagalakbay nga manugtatap ang isa ka bug-os nga pamilya sa hilikuton sa magasin. Samtang nagapamalaybalay sia upod sa isa sa mga anak nga babayi, namangkot ang anak nga babayi: “Daw ano kadugay mo ako updan?” Nian ginpaathag niya nga pagkatapos sini magapangabudlay sia upod sa iya amay. Maathag gid nga sia kag ang iya amay nalipay mangabudlay sing magkaupod. Isa gid ka maayo nga espiritu sang pamilya!
4 Ang pila ka pamilya mahimo mag-auxiliary payunir sing magkaupod sa isa ka bulan sa sulod sang isa ka tuig. Ukon mahimo nga sa dimagkubos isa ka katapo sang pamilya ang padayon nga mag-auxiliary payunir ukon magregular payunir pa gani. Paagi sa maayo nga pagplano kag pagbinuligay, ayhan madugangan sang tanan nga katapo sang panimalay ang ila personal nga bahin sa pag-alagad paagi sa pagsuporta sa isa nga nagapayunir. Ang pamilya pat-od gid nga pakamaayuhon bangod sining dugang nga hilikuton kag bangod sang maayong mga eksperiensia nga natigayon sa ministeryo.—Mal. 3:10.
5 Ang pagpakigbahin sing bug-os sa ebanghelyo nga hilikuton magabulig nga mahuptan ang pamilya nga suod, makugi, mabungahon, kag malipayon sa pag-alagad kay Jehova!—Ipaanggid ang Filipos 2:1, 2.