Mga Ginikanan—Magpahamtang sing Maayo nga Halimbawa sa Inyo Kabataan
1 Ang Pulong sang Dios nagasugid sa aton nga “ang amay [kag ang iloy] sang matarong pat-od nga magakalipay.” (Hulu. 23:24, 25) Daw ano nga pagpakamaayo para sa mga ginikanan nga nagpahamtang sing maayo nga halimbawa sa ila kabataan! Ang isa ka katapo sang Komite sang Sanga nagsiling tuhoy sa iya mga ginikanan: “Ang kamatuoran amo ang ila bug-os nga kabuhi, kag luyag ko ini nga mangin akon bug-os nga kabuhi man.” Ano ang dapat makita sang mga kabataan sa ila mga ginikanan?
2 Maayong Pamatasan kag Tudok nga Pagtahod: Salabton sang mga ginikanan nga ipatudok sa ila kabataan ang maayong mga kinaiya. Ang maayong pamatasan matun-an, indi lamang paagi sa pagtudlo sa hambal, kundi paagi sa pagpanilag kag pag-ilog. Busa, ano nga pamatasan ang inyo ginapakita? Mabatian bala kamo sang inyo kabataan nga nagasiling “pasayluha ako,” “palihug,” kag “salamat”? Sa pamilya, nagapakig-angot bala kamo sa isa kag isa nga may tudok nga pagtahod? Nagapamati bala kamo kon nagahambal ang iban? Nagapamati bala kamo kon ang inyo kabataan nagapakighambal sa inyo? Makita bala ining maayong mga kinaiya sa Kingdom Hall kag sa sulod sang puluy-an?
3 Malig-on nga Espirituwalidad kag Makugi nga Hilikuton: Ang isa ka utod nga lalaki nga naghinguyang sing kapin sa 50 ka tuig sa bug-os tion nga pag-alagad nagahinumdom: “Ang akon iloy kag amay maayo gid nga halimbawa sa ila apresasyon sa mga miting kag sa ila kakugi para sa ministeryo.” Paano ninyo ginapakita sa inyo kabataan nga interesado kamo sa paghupot sa espirituwalidad sang katapo sang inyo panimalay? Ginabinagbinag bala ninyo sing ulupod ang adlaw-adlaw nga teksto? May yara bala kamo tayuyon nga pagtuon sang pamilya? Makita bala kamo sang inyo kabataan nga nagabasa sing Biblia kag sing mga publikasyon sang Sosiedad? Ano ang ila mabatian kon nagapangamuyo kamo para sa pamilya? Nagapakighambal bala kamo sa inyo kabataan tuhoy sa mga butang nga makapabakod sa espirituwal, nagapamulong sing positibo nga mga butang tuhoy sa kamatuoran kag sa kongregasyon? Nalangkag bala kamo sa pagtambong sa tanan nga miting kag sa pagpakigbahin sa ministeryo sa latagon subong isa ka pamilya?
4 Mga ginikanan, binagbinaga ang halimbawa nga ginapakita ninyo sa inyo kabataan. Ipakita ang pinakamaayo, kag pakabahandion nila ini sa ila bug-os nga kabuhi. Ang asawa sang nagalakbay nga manugtatap, nga karon setentahon na ang edad, nagsiling: “Nagapanginpulos gihapon ako sa maayong halimbawa sang akon mahigugmaon nga Cristianong mga ginikanan. Kag ginapangamuyo ko sing hugot nga mapamatud-an ko ang akon bug-os nga apresasyon sa sining pinanubli paagi sa nagakaigo nga paggamit sini sa tanan nga tion sa palaabuton.”